SƐNEA YEBETUMI ADI ƆTAN SO NKONIM
4 | Ma Onyankopɔn Mmoa Wo Na Di Ɔtan So Nkonim
Bible Afotusɛm:
“Honhom no aba ne ɔdɔ, anigye, asomdwoe, abotare, ayamye, papayɛ, gyidi, odwo, ahohyɛso.”—GALATIFO 5:22, 23.
Nea Ɛkyerɛ:
Onyankopɔn betumi aboa yɛn ama yɛadi ɔtan so nkonim. Ne honhom kronkron no betumi aboa yɛn ama yɛanya suban ahorow a ɛkaa yɛn nko ara a, yɛrennya da. Yɛn ankasa de, yɛrentumi nni ɔtan so nkonim, gye sɛ yɛma Onyankopɔn boa yɛn. Sɛ yɛde yɛn ho to ne so sɛnea ɔsomafo Paul yɛe no a, ɔbɛboa yɛn. Paul kaa sɛ: “Nea ɔhyɛ me den no adaworoma, minya ahoɔden wɔ biribiara mu.” (Filipifo 4:13) Sɛ yɛn nso yɛma Onyankopɔn boa yɛn a, yebetumi aka sɛ: ‘Me mmoa fi Yehowa hɔ.’—Dwom 121:2.
Nea Wubetumi Ayɛ:
“Obi a na mepɛ ntɔkwaw no, Yehowa asesa me ama mabɛyɛ asomdwoe nipa.”—WALDO
Bɔ Yehowa mpae na srɛ no sɛ ɔmma wo ne honhom kronkron no. (Luka 11:13) Fa to n’anim sɛ ɔmmoa wo na nya suban pa. Suban ahorow a ebetumi aboa wo ama woadi ɔtan so nkonim no, sua ho ade wɔ Bible mu. Ebi ne ɔdɔ, asomdwoe, abotare, ne ahohyɛso. Bɔ mmɔden sɛ wobɛda saa suban yi adi wɔ w’abrabɔ mu. Afei, wɔn a wɔrebɔ mmɔden sɛ wobenya saa suban yi bi no, wo ne wɔn mmɔ. Wobetumi ‘akanyan wo ama woada ɔdɔ adi, na woayɛ nnwuma pa.’—Hebrifo 10:24.