Ɛsɛ Sɛ Kristofo Di Homeda Anaa?

Asɛm a ɛnyɛ nokware: Bere a Onyankopɔn bɔɔ ade wiei a ɔhomee da a ɛtɔ so nson no, saa bere no na ɔde Homeda no bae.

Asɛm a ɛyɛ nokware: Bible ka sɛ: “Onyankopɔn hyiraa da a ɛto so ason no, na ɔtew ho, efisɛ ɛno mu na Onyankopɔn home fii n’adwuma a ɔbɔe na ɔyɛe nyinaa ho.” (Genesis 2:3, Akuapem Twi Bible a The Bible Society of Ghana Yɛe) Nea Onyankopɔn yɛe wɔ adebɔ da a ɛtɔ so nson no na kyerɛwsɛm yi ka ho asɛm, na ɛnyɛ mmara bi na na ɔde rema nnipa sɛ yenni so. Ansa na Mose Mmara no reba no, na Bible nkaa wɔ baabiara sɛ onipa bi ahome afi n’adwuma ho.

Asɛm a ɛnyɛ nokware: Ná Israelfo no hyɛ Homeda ho mmara no ase dedaw ansa na Yehowa de Mose Mmara no rema wɔn.

Asɛm a ɛyɛ nokware: Mose ka kyerɛɛ Israelfo no sɛ: “Yehowa yɛn Nyankopɔn ne yɛn yɛɛ apam wɔ Horeb,” wɔ Sinai Bepɔw no ho. Saa apam no, na Homeda ho mmara no ka ho. (Deuteronomium 5:2, 12) Nea Israelfo no yɛe wɔ Homeda no ho no ma yehu sɛ na ɛyɛ ade foforo ma wɔn. Onyankopɔn ka kyerɛɛ Israelfo no sɛ, ɔde Homeda ho mmara no rema wɔn na akae wɔn sɛnea ogyee wɔn fii Egypt no. Sɛ na Israelfo no hyɛ Homeda ho mmara bi ase dedaw bere a na wɔwɔ Egypt no a, na ɛbɛyɛ dɛn na sɛ wɔdi Homeda no a, akae wɔn biribi a na wɔyɛ dedaw? (Deuteronomium 5:15) Adɛn nti na na ɛsɛ sɛ Yehowa san ka kyerɛ wɔn sɛ, ɛnsɛ sɛ wɔsesaw mana wɔ ɛda a ɛtɔ so nson no? (Exodus 16:25-30) Afei, sɛ na wɔadi Homeda no fi bere tenten a, adɛn nti na bere a edi kan a obi buu Homeda ho mmara no so no, na wɔnhu nea wɔnyɛ?—Numeri 15:32-36.

Asɛm a ɛnyɛ nokware: Homeda ho apam no, ɛyɛ apam a ɛbɛtena hɔ afebɔɔ, enti ɛnnɛ nyinaa, ɛsɛ sɛ yedi so.

Asɛm a ɛyɛ nokware: Bible ahorow bi ka Homeda ho asɛm sɛ ɛyɛ “apam afebɔɔ.” (Exodus 31:16, Akuapem Twi Nkwa Asɛm) Nanso, Hebri asɛmfua a wɔkyerɛɛ ase “afebɔɔ” no, ɛnyɛ bere nyinaa na ɛkyerɛ sɛ ɛbɛtena hɔ daa. Etumi nso kyerɛ, “ɛbɛtena hɔ akyɛ.” Ɛho nhwɛso ni. Hebri asɛmfua koro no ara na Bible de kaa Israelfo asɔfodi ho asɛm. Nanso, Onyankopɔn maa saa asɔfodi no baa awiei bɛyɛ mfe 2,000 a atwam ni.—Exodus 40:15; Hebrifo 7:11, 12.

Asɛm a ɛnyɛ nokware: Yesu dii Homeda, enti ɛsɛ sɛ Kristofo nso di Homeda.

Asɛm a ɛyɛ nokware: Nea enti a Yesu dii Homeda ne sɛ, wɔwoo no sɛ Yudani, enti na ɛsɛ sɛ odi Mose Mmara no so fi bere a wɔwoo no no. (Galatifo 4:4) Yesu wu akyi no, Onyankopɔn yii Mmara apam no fii hɔ, na na Homeda no ka ho.—Kolosefo 2:13, 14.

Asɛm a ɛnyɛ nokware: Bere a ɔsomafo Paul bɛyɛɛ Kristoni no, na ɔda so di Homeda.

Asɛm a ɛyɛ nokware: Ɛwom sɛ Paul kɔɔ Yudafo hyia adan mu Homeda de, nanso na ɔnkɔ hɔ sɛ ɔne Yudafo no rekɔsom. (Asomafo Nnwuma 13:14; 17:1-3; 18:4) Mmom, saa bere no, na Yudafo no tumi to nsa frɛ obi ma ɔbɛkasa kyerɛ wɔn a na wɔahyiam wɔ hyiadan mu resom no. Ɛno nti na Paul kɔkaa asɛmpa no kyerɛɛ wɔn wɔ hɔ no. (Asomafo Nnwuma 13:15, 32) Ɛnyɛ Homeda nko ara na na Paul ka asɛmpa no, mmom, na ɔka asɛmpa no “da biara.”—Asomafo Nnwuma 17:17.

Asɛm a ɛnyɛ nokware: Kristofo nso wɔ Homeda. Ɛyɛ Kwasida.

Asɛm a ɛyɛ nokware: Ahyɛde biara nni Bible mu a ɛka kyerɛ Kristofo sɛ, nnawɔtwe no da a edi kan a ɛyɛ Kwasida no, wɔmfa nnye wɔn ahome, na wɔmfa nsom Onyankopɔn. Tete Kristofo no de, na wɔbu Kwasida sɛ ɛda foforo biara, enti na wɔyɛ adwuma Kwasida. Nhoma bi a ɛka Bible ho asɛm ka sɛ: “[Roma ɔhempɔn bosonsonni] Constantine hyɛɛ mmara sɛ, ɛnsɛ sɛ ɔmanfo no yɛ nnwuma pɔtee bi Kwasida. Efi hɔ no na nkurɔfo fii ase nyaa adwene sɛ Kwasida yɛ homeda. Saa bere no, na ɛyɛ Yesu wu akyi bɛyɛ mfe 300.”­—The International Standard Bible Encyclopedia.a

Bible mu nsɛm bi a ɛma ɛyɛ sɛ gyama Kwasida yɛ da titiriw bi no nso ɛ? Bible ka sɛ, ɔsomafo Paul ne ne nuanom Kristofo didii wɔ “da a edi kan wɔ nnawɔtwe no mu” a ɛyɛ Kwasida. Nea enti a Paul yɛɛ saa ne sɛ, na ade kye a obefi wɔn nkyɛn akɔ, enti, na ɔne wɔn redi nkra. Ná ɛnyɛ sɛ Kwasida yɛ da titiriw nti na ɔyɛɛ saa. (Asomafo Nnwuma 20:7) Bere bi nso, ɔsomafo no ka kyerɛɛ nsafo ahorow bi sɛ, “nnawɔtwe biara mu da a edi kan” a ɛyɛ Kwasida no, obiara nyi sika bi nsie na wɔmfa nkɔboa anuanom. Nanso wei de, na ɛyɛ nyansahyɛ a ɔsomafo no de rema ankoroankoro. Saa sika no, na wɔmfa nkɔ baabi a wɔhyiam no, mmom, na wɔde sie wɔ wɔn fie.—1 Korintofo 16:1, 2.