Mika 6:8—‘Fa Ahobrɛase Ne Wo Nyankopɔn Nnantew’

“O onipa, waka nea eye akyerɛ wo. Na dɛn na Yehowa rehwehwɛ afi wo hɔ? Ɛno ara ne sɛ wubedi asɛntrenee, na woama nokwaredi ada wo koma so, na woabrɛ wo ho ase ne wo Nyankopɔn anantew!”—Mika 6:8, Wiase Foforo Nkyerɛase.

“Wɔaka nea eye akyerɛ wo, onipa, ne nea AWURADE hwehwɛ wo hɔ, ɛnyɛ biribiara sɛ adetreneeyɛ ne adɔepɛ ne ahobrɛase a wode ne wo Nyankopɔn nantew.”—Mika 6:8, Akuapem Twi Bible a The Bible Society of Ghana Yɛe.

Nea Mika 6:8 Kyerɛ

Odiyifo Mika kyerɛkyerɛɛ mu sɛ, ɛmmoro nnipa so sɛ wɔbɛyɛ nea Yehowaa Nyankopɔn pɛ. (1 Yohane 5:3) Asɛm a ɛwɔ Mika 6:8 no ma yehu nneɛma mmiɛnsa bi a Onyankopɔn hwehwɛ fi yɛn hɔ. Mmienu a edi kan no ma yehu sɛnea ɛsɛ sɛ nipa ne ne yɔnko nipa tena, ɛnna nea ɛtɔ so mmiɛnsa no nso kyerɛ sɛnea yebetumi ne Onyankopɔn afa adamfo.

‘Di asɛntrenee.’ Onyankopɔn pɛ sɛ n’asomfo bu atɛntrenee na wɔdi nokware. Nea wei kyerɛ ne sɛ, Onyankopɔn akyerɛ yɛn nea ɛyɛ papa ne nea ɛyɛ bɔne, enti nea yedwen ho ne nea yɛyɛ nyinaa, ɔpɛ sɛ ɛne saa akwankyerɛ no hyia. (Deuteronomium 32:4) Ɛho nhwɛso ne sɛ, wɔn a wɔde Onyankopɔn akwankyerɛ bɔ wɔn bra no, wɔyɛ nea wɔbetumi nyinaa sɛ wɔne obiara bɛtena yiye. Wɔnsa nnipa mu, wodi nokware ma nnipa nyinaa, na sɛ obi fi he oo, ɔte sɛn oo, wɔne no di no yiye.—Leviticus 19:15; Yesaia 1:17; Hebrifo 13:18.

‘Ma nokwaredi nna wo koma so.’ Saa asɛm no, wɔtumi kyerɛ ase nso sɛ “wobɛdɔ ɔdɔ a enni huammɔ.” (Mika 6:8, ase hɔ asɛm) Tete Hebri mu no, asɛmfua a wɔkyerɛɛ ase “nokwaredi” no kyerɛ sɛ obi bɛbata ne yɔnko ho a onni no huammɔ. Nanso etumi san kyerɛ ayamye ne mmɔborɔhunu a obi yi no adi kyerɛ ne yɔnko nipa, na sɛ ɔreyɛ biribi ama no a, oyi ne yam yɛ ma ɛboro so mpo. Onyankopɔn se, sɛ obi pɛ sɛ ɔsɔ n’ani a, ɛnsɛ sɛ ɔda ayamye ne mmɔborɔhunu adi kyerɛ nkurɔfo kɛkɛ, na mmom ɛsɛ sɛ ɔma n’ani gye saa suban mmienu yi ho anaa ɔma ɛda ne koma so. Ɛno kyerɛ sɛ, ɛsɛ sɛ Onyankopɔn asomfo ani gye ho sɛ wɔbɛboa nkurɔfo, titiriw wɔn a wɔakɔ ahohia mu no. Sɛ yɛyɛ nkurɔfo adɔe a, ɛma yɛn ani gye.—Asomafo Nnwuma 20:35.

‘Brɛ wo ho ase ne wo Nyankopɔn nnantew.’ Bible mu no, asɛmfua ‘nantew’ betumi akyerɛ sɛ́ obi “reyɛ n’ade wɔ kwan pɔtee bi so.” Enti sɛ yɛka sɛ obi ne Onyankopɔn renantew a, ɛkyerɛ sɛ ɔreyɛ nea Onyankopɔn pɛ na ɔde n’akwankyerɛ rebɔ ne bra. Yɛreka wɔn a wɔne Onyankopɔn nantewee a, yɛrentumi nka nnyaw Noa. Esiane sɛ na “Noa yɛ ɔtreneeni a ne ho nni asɛm wɔ ne beresofo mu” nti, Bible ka sɛ ɔne “nokware Nyankopɔn no nantewee.” (Genesis 6:9) Ɛnnɛ nso, sɛ yɛde nkyerɛkyerɛ a ɛwɔ Onyankopɔn Asɛm Bible mu no bɔ yɛn bra a, ɛkyerɛ sɛ ‘yɛne Onyankopɔn renantew.’ Nanso yebetumi ayɛ saa a, gye sɛ yɛbrɛ yɛn ho ase gye tom sɛ bɔne wɔ yɛn ho, na yehia Onyankopɔn wɔ biribiara mu.—Yohane 17:3; Asomafo Nnwuma 17:28; Adiyisɛm 4:11.

Mika 6:8 Ho Nsɛm

Ná Mika yɛ odiyifo wɔ Israel efi afe 777 kosi afe 717 A.Y.B. Saa bere no, na abosonsom, nsisi, ne nhyɛso abu so wɔ ɔman no mu. (Mika 1:7; 3:1-3, 9-11; 6:10-12) Akwankyerɛ a Onyankopɔn nam Mose so de maa Israelfo a wɔfrɛ no Mose Mmara no, wɔn mu dodow no ara amfa anyɛ hwee. Nanso na wɔn mu pii da so ara gye di sɛ, sɛ wɔbɔ afɔre ne nea ɛkeka ho a, ɛno ara bɛma Onyankopɔn ani agye wɔn ho.—Mmebusɛm 21:3; Hosea 6:6; Mika 6:6, 7.

Mika kaa saa asɛm yi no, akyiri yi Yesu nso kaa sɛ wɔn a wɔwɔ ɔdɔ ne mmɔborɔhunu, na wɔbu atɛntrenee no, wɔn na n’Agya pɛ wɔn asɛm, na ɛnyɛ wɔn a wɔyɛ nhwehwɛanim de kyerɛ sɛ wɔsom Onyankopɔn no. (Mateo 9:13; 22:37-39; 23:23) Asɛm a Yesu kae no boa yɛn ma yehu nea Onyankopɔn pɛ sɛ n’asomfo yɛ wɔ ɛnnɛ mmere yi mu.

Hwɛ video tiatia yi, na wubehu Mika nhoma no ani so.