Mmebusɛm 16:3—“Fa Nea Woyɛ Nyinaa Hyɛ AWURADE Nsam”

“Fa nea woyɛ nyinaa hyɛ Yehowa nsa, na wo nhyehyɛe bewie yiye.”—Mmebusɛm 16:3, Wiase Foforo Nkyerɛase.

“Fa nea woyɛ nyinaa hyɛ AWURADE nsam, na wo nhyehyɛe besi yiye.”—Mmebusɛm 16:3, Akuapem Twi Nkwa Asɛm.

Nea Mmebusɛm 16:3 Kyerɛ

Saa bɛ a ɛwɔ Bible mu yi, ɛma nkurɔfo a wɔsom nokware Nyankopɔn no awerɛhyem sɛ, sɛ wɔhwehwɛ no, na wɔde n’akwankyerɛ yɛ adwuma a, wɔn nhyehyɛe bewie yiye.

“Fa nea woyɛ nyinaa hyɛ Yehowa nsa.” Ansa na Yehowaa asomfo besisi gyinae no, wɔdi kan de ahobrɛase hwehwɛ n’akwankyerɛ. (Yakobo 1:5) Adɛn ntia? Ade baako ne sɛ, nnipa de, nneɛma a esisi wɔ yɛn abrabɔ mu no, mpɛn pii no, nea yetumi yɛ wɔ ho no sua, anaa yentumi nyɛ ho hwee koraa. (Ɔsɛnkafo 9:11; Yakobo 4:13-15) Afei nso, nea yɛpɛ sɛ yɛyɛ no, ebia na yenni ho nyansa a yɛde bɛyɛ. Wei nti, nnipa pii yɛ wɔn ade nyansa mu; wɔpɛ sɛ wɔyɛ biribi a, wɔde hyɛ Onyankopɔn nsa. Nea wɔyɛ ne sɛ, wɔbɔ Onyankopɔn mpae hwehwɛ n’akwankyerɛ, na wɔde n’asɛm a ɛwɔ Bible mu no yɛ adwuma.—Mmebusɛm 3:5, 6; 2 Timoteo 3:16, 17.

Asɛm a Bible ka a ɛne sɛ, “Fa nea woyɛ nyinaa hyɛ AWURADEb nsam” no, ne nkyerɛase tẽẽ ne sɛ, “dan wo nnwuma gu AWURADE so.” Nhoma bi a yɛde yɛ nhwehwɛmu kyerɛkyerɛ saa asɛm yi mu sɛ, ɛte sɛ “ɔbarima bi a ɔsõ adesoa a ɛredɛn no, na ɔredan ama ɔbarima foforo a ɔwɔ ahoɔden sen no a obetumi asoa.” Wɔn a wɔbrɛ wɔn ho ase de wɔn ho to Onyankopɔn so no, wɔbetumi anya awerɛhyem sɛ ɔbɛwowaw wɔn, na waboa wɔn.—Dwom 37:5; 55:22.

“Nea woyɛ nyinaa” a Bible aka wɔ Mmebusɛm 16:3 no, ɛnkyerɛ sɛ adwene biara a nnipa bɛfa anaa nhyehyɛe biara a wɔbɛyɛ no, Onyankopɔn pene so anaa ohyira so. Sɛ nnipa benya Yehowa nhyira a, nhyehyɛe biara a yɛbɛyɛ no, gye sɛ yɛma ɛne Yehowa apɛde ne sɛnea ɔpɛ sɛ yɛbɔ yɛn bra no hyia. (Dwom 127:1; 1 Yohane 5:14) Sɛ yɛyɛ asoɔden a, Onyankopɔn renhyira yɛn. Nokwasɛm ne sɛ, “nnebɔneyɛfo agyinatu de, ɔma ɛyɛ ɔkwa.” (Dwom 146:9) Nanso, nnipa a wɔbrɛ wɔn ho ase ma Onyankopɔn, na wɔbɔ wɔn bra sɛnea wakyerɛ wɔ Bible mu no, ɔma esi wɔn yiye.—Dwom 37:23.

“Na wo nhyehyɛe bewie yiye.” Bible ahorow bi kyerɛ saa asɛm yi ase sɛ, “wo nhyehyɛe ase betim.” Hebri Kyerɛwnsɛm anaa nea nkurɔfo taa frɛ no Apam Dedaw no mu no, Hebri asɛmfua a wɔkyerɛɛ ase wɔ Twi mu sɛ, “ase betim” no, nea ɛkyerɛ ne fapem a wɔreto, na wɔtaa de ka sɛnea nneɛma a Onyankopɔn abɔ tim hɔ pintinn ho asɛm. (Mmebusɛm 3:19; Yeremia 10:12) Nkurɔfo a wɔyɛ nea ɛteɛ wɔ Onyankopɔn ani so no, ɔno nso bɛma wɔn nhyehyɛe ase atim pintinn, na ɔbɛboa wɔn ama wɔn abrabɔ adi mũ na wɔanya anigye wɔ wɔn asetena mu.—Dwom 20:4; Mmebusɛm 12:3.

Mmebusɛm 16:3 Ho Nsɛm

Ɔhene Solomon na ɔkyerɛw saa bɛ yi, na ɔno ara nso na ɔkyerɛw mmɛ a ɛwɔ Mmebusɛm nhoma mu no dodow no ara. Esiane nyansa a Onyankopɔn de maa no nti, otumi buu mmɛ mpempem pii.—1 Ahene 4:29, 32; 10:23, 24.

Bere a Solomon rekyerɛw Mmebusɛm ti 16 no, mfiase no, ɔkamfoo Onyankopɔn nyansa, na ɔkyerɛe sɛ Onyankopɔn kyi wɔn a wɔyɛ ahantan. (Mmebusɛm 16:1-5) Solomon toaa so kaa nsɛm bi a ɛma yehu ahiasɛm bi a ɛtaa pue wɔ Mmebusɛm nhoma no mu. Ɛne sɛ: Sɛ nnipa benya nyansa na asi yɛn yiye a, gye sɛ yɛbrɛ yɛn ho ase na yɛma Onyankopɔn kyerɛ yɛn sɛnea yebetutu yɛn anammɔn. (Mmebusɛm 16:3, 6-8, 18-23) Wubehu nokwasɛm titiriw yi wɔ Bible mu mpɛn pii.—Dwom 1:1-3; Yesaia 26:3; Yeremia 17:7, 8; 1 Yohane 3:22.

Hwɛ video tiawa yi, na wubehu Mmebusɛm nhoma no ani so.