Efesofo 3:20—“[Onyankopɔn] Tumi Yɛ Ma Ɛtra Ade Nyinaa Ma Ɛboro So Kyɛn Nea Yɛsrɛ Anaasɛ Yesusuw”

“Nea ne tumi a ɛyɛ adwuma wɔ yɛn mu no nti, otumi yɛ ade ma ɛboro nea yɛsrɛ anaa yesusuw koraa no, ɔno na anuonyam . . . nka no.”—Efesofo 3:20, 21, Wiase Foforo Nkyerɛase.

“Na nea otumi yɛ ma ɛtra ade nyinaa ma ɛboro so kyɛn nea yɛsrɛ anaasɛ yesusuw, sɛnea tumi a ɛyɛ yɛn mu adwuma no te no, ɔno na anuonyam nka no.”—Efesofo 3:20, 21, Akuapem Twi Bible a The Bible Society of Ghana Yɛe.

Nea Efesofo 3:20 Kyerɛ

Asɛm a ɔsomafo Paul kae no ma yehu sɛ na ɔwɔ ahotoso paa sɛ Onyankopɔn tumi bua n’asomfo mpaebɔ, na ɔyɛ wɔn abisade ma wɔn wɔ akwan a wɔnna nnwenee ho da mpo so. Ɔkyerɛɛ mu sɛ, sɛnea Onyankopɔn bua mpaebɔ no, etumi boro nea n’asomfo ani da so, anaa nea wɔhwɛ kwan koraa.

“Nea ne tumi a ɛyɛ adwuma wɔ yɛn mu no nti, otumi yɛ ade.” Sɛ yɛhwɛ Efesofo 3:21 a, ɛma yehu sɛ ‘nea otumi yɛ ade’ no, ɔno ne Yehowa Nyankopɔn.a Paul kyerɛwee wɔ hɔ sɛ: “Ɔno na anuonyam mfa asafo no ne Kristo Yesu so nka no.” Bio nso, Onyankopɔn betumi ama yɛn tumi a yehia anaa obetumi ahyɛ yɛn den ama yɛayɛ n’apɛde.—Filipifo 4:13.

Sɛ yɛhwɛ Efesofo 3:20 a, ɔsomafo Paul kaa sɛ, sɛnea Yehowa tumi boa n’asomfo no, ɛyɛ soronko koraa. Nhoma bi a yɛde yɛ nhwehwɛmu kyerɛɛ asɛm “nea . . . otumi yɛ ade” no mu sɛ: “Ɛnyɛ nea kyerɛwsɛm yi reka ne sɛ onii no betumi ayɛ biribi kɛkɛ, na mmom ɛkyerɛ sɛ onii no wɔ tumi a ɔde bɛyɛ nso.” Yehowa nte sɛ nnipa. Onipa de, sɛ ɔwɔ adwempa sɛ dɛn mpo a, ɛnyɛ bere nyinaa na otumi yɛ nea ehia sɛ ɔyɛ ma ne nnamfo. Nanso Yehowa de, otumi bua n’asomfo mpaebɔ bere nyinaa, na otumi yɛ nea wɔhia biara ma wɔn. Ɔno nko ara na n’ahoɔden ne ne tumi nni ano.—Yesaia 40:26.

“[Onyankopɔn] tumi . . . yɛ ade ma ɛboro nea yɛsrɛ anaa yesusuw koraa no.” Yehowa tumi yɛ nneɛma pii ma n’asomfo. Otumi “yɛ ade ma ɛboro” nea n’asomfo hwɛ kwan koraa. Mmoa a n’asomfo hia no, obetumi de ama wɔn ama abu wɔn so.

Ɔsomafo Paul toaa so kaa sɛ, Onyankopɔn tumi “yɛ ade ma ɛboro nea yɛsrɛ anaa yesusuw koraa.” Saa asɛm yi ma yehu biribi foforo a kyerɛwsɛm yi reka ho asɛm. Bere a ɔsomafo no kaa sɛ, Onyankopɔn “yɛ ade ma ɛboro nea yɛsrɛ anaa yesusuw koraa” no, na ɔpɛ sɛ Kristofo nyinaa hu sɛ obetumi aboa wɔn wɔ akwan bi a wɔn ani nna koraa so. Bible bi kyerɛ Efesofo 3:20 no fã a edi kan no ase sɛ: “Afei nea otumi yɛ ade a yebisa anaa yɛhwɛ kwan no mmɔho mmɔho.” (New International Version) Ɛtɔ da a, Kristofo betumi anya adwene sɛ ɔhaw a wɔrefa mu no sõ dodo anaa ɛdɔɔso koraa sɛ wɔbenya ano aduru. Ebi mpo a, ɛyɛ a wɔnhu nea wɔmmɔ ho mpae. Nanso, sɛnea Yehowa te nneɛma ase no nni ano, na biribiara nsõ no yɛ. Wɔ bere a ɛsɛ mu no, Yehowa betumi ayi ɔhaw biara afi hɔ; akwan a ɔbɛfa so ayɛ saa no, ɛbɛyɛ nea yɛnna nsoo ho dae da. (Hiob 42:2; Yeremia 32:17) Enkosi saa bere no, Yehowa hyɛ n’asomfo den ma wɔtumi gyina ɔhaw a wɔrefa mu no ano, na ɛtɔ da mpo a, ɛma wɔde anigye yɛ saa!—Yakobo 1:2, 3.

Efesofo 3:20 Ho Nsɛm

Efesofo nhoma no, ɛyɛ krataa a ɔsomafo Paul kyerɛw kɔmaa Kristofo a na wɔwɔ Efeso kurow no mu wɔ Asia Kumaa, a ɛnnɛ ɛyɛ Turkey man no fã. Paul bɔɔ mpae maa wɔn, na ɔkyerɛw ne mpae no mu nsɛm wɔ ne krataa no mu. (Efesofo 3:14-21) Ɔbɔɔ mpae sɛ, anuanom a ɛwɔ Efeso no ne Kristofo nyinaa mmɔ mmɔden nsuasua sɛnea Yesu dwen nneɛma ho ne sɛnea ɔyɛ n’ade. Sɛ wɔyɛ saa a, wɔbɛba abehu Kristo dɔ. Bere a Paul rewie mpae a ɔbɔe no, oyii Onyankopɔn ayɛ, ɛnna ɔkaa asɛm a ɛwɔ Efesofo 3:20, 21 no.

Hwɛ video tiawa yi, na wubehu Efesofo nhoma no ani so.