Hebrifo 4:12—“Onyankopɔn Asɛm Yɛ Nkwa, Na Ahoɔden Wɔ Mu”

“Na Onyankopɔn asɛm wɔ nkwa, na tumi wɔ mu, na ano yɛ nnam sen sekan anofanu biara, na etumi wura mu kɔpaapae ɔkra ne honhom, ne dompe ne emu hon mu mpo, na etumi hu komam adwene ne emu nsusuwii.”—Hebrifo 4:12, Wiase Foforo Nkyerɛase.

“Onyankopɔn asɛm yɛ nkwa, na ahoɔden wɔ mu. Ɛyɛ nnam sen afoa anofanu. Ehwirew mu kosi sɛ ɛpaapae honhom ne ɔkra, apɔw so ne hon mu. Ɛyɛ koma nsusuwii ne adwene temmufo.”—Hebrifo 4:12, Akuapem Twi Nkwa Asɛm.

Nea Hebrifo 4:12 Kyerɛ

Onyankopɔn asɛm a wakyerɛw wɔ Bible mu ama nnipa no, etumi ma nea yɛredwen ho wɔ yɛn komam ne nsusuwii a ɛwɔ yɛn komam da adi. Asɛm a ɛwɔ Bible mu no tumi sesa nnipa suban nso ma wɔn abrabɔ kɔ yiye.

“Onyankopɔn asɛm wɔ nkwa.” Kyerɛwsɛm yi mu no, “Onyankopɔn asɛm” kyerɛ Onyankopɔn bɔhyɛ anaa nea wabɔ ne tirim sɛ ɔbɛyɛ a waka ama nnipa akyerɛw wɔ Bible mu.a Nea Onyankopɔn abɔ ne tirim sɛ ɔbɛyɛ no, emu baako a ɛho hia ne sɛ, ɔbɛma nnipa a wɔtie n’asɛm atena asaase so daa wɔ asomdwoe mapa ne baakoyɛ mu.—Genesis 1:28; Dwom 37:29; Adiyisɛm 21:3, 4.

Sɛ Bible ka sɛ Onyankopɔn asɛm, anaa n’atirimpɔw a waka ho asɛm akyerɛ yɛn no “wɔ nkwa” a, ɛkyerɛ sɛn? Nea ɛkyerɛ baako ne sɛ, sɛ obi gye Onyankopɔn asɛm tom a, asɛm no yɛ ne koma mu adwuma ma onya anidaso, na ɛma ohu nea enti a ɔte ase. (Deuteronomium 30:14; 32:47) Ɔkwan foforo a Onyankopɔn asɛm anaa ne bɔhyɛ “wɔ nkwa” ne sɛ, Onyankopɔn teasefo no gu so reyɛ ne bɔhyɛ nyinaa ho adwuma sɛnea ɛbɛyɛ a ne nyinaa bɛba mu pɛpɛɛpɛ. (Yohane 5:17) Onyankopɔn nte sɛ nnipa, enti sɛ ɔhyɛ bɔ a, ne werɛ mfi, anaa ɛrenkɔba sɛ akyiri yi obehu sɛ ɛboro no so ma enti ɔrentumi nyɛ. (Numeri 23:19) N’asɛm ‘rensan mma ne nkyɛn kwa.’—Yesaia 55:10, 11.

“Onyankopɔn asɛm . . . tumi wɔ mu.” Asɛm, “tumi wɔ mu” no, yebetumi asan akyerɛ ase “ahoɔden wom,” “ahokeka wom,” anaa “etumi yɛ biribiara a wɔhwɛ kwan sɛ [saa asɛm no bɛyɛ].” Enti biribiara a Yehowab Nyankopɔn aka anaa wahyɛ ho bɔ no, sɛnea ɛte biara ɛbɛba mu. (Dwom 135:6; Yesaia 46:10) Nokwasɛm ne sɛ, Onyankopɔn tumi di ne bɔhyɛ so wɔ akwan a ɛboro yɛn adwene ne yɛn ntease so koraa so.—Efesofo 3:20.c

Ɔkwan foforo nso a ‘tumi wɔ Onyankopɔn asɛm mu’ ne sɛ, wɔn a wɔfa no ahiasɛm no, ɛboa wɔn ma wɔsesa wɔn abrabɔ ne wɔn suban ma ɛyɛ papa sen kan no. Onyankopɔn nkyerɛkyerɛ wura saa nkurɔfo no mu, na ɛsesa sɛnea wɔdwen nneɛma ho, ne sɛnea wɔbɔ wɔn bra, na ɛno na wɔgyina so de botae sisi wɔn ani so. (Romafo 12:2; Efesofo 4:24) Saa kwan no so na ‘Onyankopɔn asɛm no yɛ adwuma wɔ’ wɔn a wɔgye di sɛ asɛm no fi Onyankopɔn hɔ ampa no mu.—1 Tesalonikafo 2:13.

“Onyankopɔn asɛm . . . ano yɛ nnam sen sekan anofanu biara.” Sɛnea Onyankopɔn asɛm tumi wura nnipa mu kɔ akyiri nti, Bible ka sɛ ano yɛ nnam sen sekan biara a nnipa ayɛ. Onyankopɔn asɛm tumi du nnipa komam, kyerɛ sɛ, etumi wura nnipa mu tɔnn, na ɛyɛ nnipa mu adwuma wɔ akwan bi so a nnipa nkyerɛkyerɛ biara rentumi nyɛ saa. Asɛm a edi hɔ a Hebrifo 4:12 ka no ma yehu wei.

“Onyankopɔn asɛm . . . etumi wura mu kɔpaapae ɔkra ne honhom, ne dompe ne emu hon mu mpo.” Sɛ Bible ka “ɔkra” a, etumi kyerɛ sɛnea obi te wɔ nnipa ani so. Ɛka “honhom” nso a, etumi kyerɛ sɛnea obi te wɔ ne mu ankasa. (Galatifo 6:18) Sɛnea “Onyankopɔn asɛm” tumi ka ɔkwan a yɛfa so dwen nneɛma ho ne sɛnea yɛte nka wɔ yɛn mu tɔnn nti, Bible ka sɛ ewura “hon” mu. Yehowa nkyerɛkyerɛ betumi aboa yɛn ama yɛahu sɛnea yɛte wɔ yɛn mu ankasa, na ɛma yehu nneɛma bi wɔ yɛn ho a onipa biara rentumi nhu. Afei ɛboa yɛn ma yɛyɛ nsakrae pa. Wei ma yɛne yɛn Bɔfo no nyinaa ani gye.

“Onyankopɔn asɛm . . . etumi hu komam adwene ne emu nsusuwii.” Sɛ obi te Onyankopɔn asɛm a, nea ɔyɛ wɔ ho no betumi ama ne “komam adwene” ankasa ada adi, na ne “nsusuwii” anaa “nea enti a ɔyɛ nneɛma” no nso ada adi. Yɛmfa no sɛ, bere a obi tee Onyankopɔn asɛm no, otiee no aso pa mu, na ɔsesaa n’abrabɔ. Ɛno bɛkyerɛ sɛ ɔwɔ koma pa, na ɔbrɛ ne ho ase. Ɛbɛkyerɛ sɛ ɔpɛ sɛ ɔsɔ ne Bɔfo no ani. Nanso yɛmfa no sɛ, bere a onipa no tee Onyankopɔn asɛm no, ɔde nsɛm yiyii ne ho ano. Ɛno bɛkyerɛ sɛ ebia ɔwɔ subammɔne te sɛ ahantan anaa pɛsɛmenkominya. Ebia na ɔreyɛ biribi a Onyankopɔn ani nnye ho, ɛnna ɔrepɛ biribi de abu ne ho bem.—Yeremia 17:9; Romafo 1:24-27.

Nhwehwɛmu nhoma bi ka sɛ, Onyankopɔn asɛm “tumi wurawura yɛn mu kɔ akyiri tɔnn.” Yɛn ho biribiara nni hɔ a Onyankopɔn nnim anaa n’asɛm rentumi mma ɛnna adi. Hebrifo 4:13 ka sɛ: “Nneɛma nyinaa ho da hɔ, na ɛso abue pefee wɔ nea ɛsɛ sɛ yebu akontaa kyerɛ no no anim.”

Hebrifo 4:12 Ho Nsɛm

Hebrifo nhoma a ɛwɔ Bible mu no, ɔsomafo Paul na ɔkyerɛwee. Ɔkyerɛw no bɛyɛ afe 61. Onyankopɔn na ɔma wɔkyerɛw kɔmaa Yudafo a na wɔabɛyɛ Kristofo wɔ Yerusalem ne Yudea no.

Hebrifo ti 3 ne ti 4 mu no, Paul twee adwene sii nea ɛtoo tete Israelfo no so, na ɔkaa sɛ, ɛyɛ kɔkɔbɔ ma Kristofo. (Hebrifo 3:8-12; 4:11) Yehowa hyɛɛ bɔ sɛ, obeyi Israelfo no afi nkoasom mu na ɔde wɔn akɔ asaase bi so ama ‘wɔakɔtena ase dwoodwoo.’ (Deuteronomium 12:9, 10) Nanso, Israelfo a wɔfii Egypt no, mpɛn pii na wɔyɛɛ nneɛma a ɛkyerɛ sɛ wɔnni Onyankopɔn bɔhyɛ mu gyidi, na ɛreyɛ ara ni, na wɔrebu ne mmara so. Ɛno nti, wɔantumi ‘ankɔ Onyankopɔn home mu,’ kyerɛ sɛ, wɔantumi ne Onyankopɔn antena asomdwoe mu. Mmom, wɔwuwui wɔ sare no so. Ɛwom sɛ saa Israelfo no asefo kɔɔ Bɔhyɛ Asaase no so de, nanso wɔn nso fii ase yɛɛ Yehowa so asoɔden. Ewiee ase no, Israel man no huu amane paa.—Nehemia 9:29, 30; Dwom 95:9-11; Luka 13:34, 35.

Paul kyerɛɛ mu sɛ, nneɛma bɔne a Israelfo a wɔanni Yehowa nokware no yɛe no, ɛsɛ sɛ Kristofo sua biribi fi mu. Sɛ yɛansuasua Israelfo no asoɔden, na sɛ yetie Onyankopɔn asɛm, na yenya ne bɔhyɛ ahorow mu gyidi paa a, yebetumi akɔ Onyankopɔn home mu.—Hebrifo 4:1-3, 11.

Hwɛ video tiawa yi, na wubehu Hebrifo nhoma no ani so.