Mmofra Bisa Sɛ. . .

So Asaw Nyɛ Anigyede Ara Kwa A Mfomso Biara Nni Ho?

YEBETUMI abu asaw sɛ ɛyɛ akyɛde a efi yɛn Bɔfo no hɔ a ɛyɛ ɔkwan foforo a yɛnam so da yɛn anigye adi. N’asomfo a wɔtraa ase tete mmere mu too nnwom na wɔn ani ‘gyee asaw mu.’ (Yeremia 31:12, 13) Asaw betumi ayɛ ade a ɛyɛ anigye a wɔde gye wɔn ahome nso. Wɔ Yesu bɛ a ɛfa ɔba hohwini no ho mu no, “asanku ne asaw” ka ahurusi a wodii wɔ ɔba no san a ɔsan bae ho mu no ho.”​—Luka 15:25.

Mmofra binom bisa sɛ, ‘Na asaw a ano yɛ den nso ɛ.’ Ɛwɔ n’afã. Sɛ nhwɛso no, Bible no kyerɛ sɛ ɔhene Dawid nyaa anigye kɛse a ɛte saa, bere a wɔde apam adaka kronkron no san baa Yerusalem akyi no, ma enti “ɔde n’ahoɔden nyinaa . . sawee.” (2 Samuel 6: 14) Na ebetumi aba sɛ Dawid resaw ahoɔden so na na ano yɛ hyew nanso na ɛnyɛ nea ɛtra so. So yebetumi aka sɛ asaw a ano yɛ hyew nyinaa fata anaasɛ mfomso nni ho? Dabi, ahwɛyiye ho hia. Tumi a nnwom wɔ no betumi ama woayɛ ade atra so.

Kwati Ade a Wobɛyɛ Atra So

Ɛwom sɛ bɔ a mobɛbom agye mo ani ye de, nanso ahosodi a ɛfata ho hia wɔ apontow ahorow a ɛtete sɛɛ ase. Ɔsomafo Paulo ka kyerɛɛ afeha a edi kan Kristofo no sɛ: “Momma yɛnnantew fɛfɛɛfɛ, sɛnea ɛfata awia, ɛnyɛ agobɔne [“apontow ahorow a gyegyeegye wɔ ase,” The Bible in Living English] ne asabow mu, ɛnyɛ aguamammɔ ne ahohwi mu, ɛnyɛ ɔko ne nitan mu.” (Romafo 13:13) Akyinnye biara nni eyi ho, efisɛ na wɔde asabow, asabɔne ne gyegyeegyeyɛ na ɛhyɛ abosonsomfo fã ahorow wɔ tete mmere no mu.

Mfehaha a edi kan no mu no, Socrates kaa agobɔne biako a ɛte sɛɛ ho asɛm sɛ “mmea de asaw ne mpaebɔ gyegyeegye a wɔde frɛɛ onyame no yɛɛ basaba. . . . Mmarima nso yɛɛ nneɛma a ɛtete saa denam agobɔne a wɔde yɛɛ dede wɔ mmorɔn so, bɔɔ nsambɔ nnawuru ne mpintin no so.” Enti na ɛsɛ sɛ Kristofo a wodii kan no hwɛ yiye na wɔn apontow biara anna honhom a ɛte saa adi.

Paulo kɔkɔbɔ a ese wɔnkwati “apontow ahorow a gyegyeegye wɔ ase” no da so ara yɛ nea ɛfata. Mpɛn pii no, wɔ apontow ahorow a ɛte sɛɛ ase nnɛ no, tumi a nnwom wɔ (a nnubɔne ne nsa a ano yɛ den ka ho) ka nkurɔfo ma wɔyɛ ade tra so. Wɔsaw tra so​—ɛkanyan nkate. Enti ɛsɛ sɛ mmofra a wɔwɔ hɔ nnɛ hwɛ yiye na wɔanhwere ahosodi wɔ apontow ahorow ase na ‘nnwom no amma wɔanyera.’ Bible no afotu ne sɛ: “Mo ani nna hɔ, monwɛn.”​—1 Petro 5:8.

Yiw, ɛtɔ bere bi a asaw mu ahokeka a ebetumi ayɛ nea nidi wom​—anaasɛ anyɛ yiye koraa no, ɛda ahobrɛase adi​—nso betumi ayɛ nea ɛkanyan nkate. Ahwɛyiye no hia bere nyinaa bere a asaw no ma wɔdannan nipadua no wɔ ɔkwan a ebetumi akanyan ɔbarima ne ɔbea nna ho akɔnnɔ wɔ w’ankasa ne afoforo mu, na ama moayɛ ade a ɛnkyerɛ Kristofo ahobrɛase no.

Sɛ nhwɛso no, John pɛ asaw. Nanso afei ogye tom sɛ asaw ahorow bi a na anka ɔsaw no yɛ nea ɛkanyan ɔbarima ne ɔbea nna ho akɔnnɔ. John kae sɛ: “Mekae sɛ asaw ahorow bi a mede me ho hyɛɛ mu anaasɛ mihuu afoforo sɛ wɔresaw no kanyan ɔbarima ne ɔbea nna ho akɔnnɔ wɔ me mu.” Nyansa mu no, sɛ́ obi a afei de odi Kristofo nnyinasosɛm so no, ɔtwe ne ho fi saa asaw horow no ho.

Dwom ko a wosaw ano no nso ho hia. Nokwarem no, ebia w’ani gye dwom a ne nnyigyei ano yɛ den ho. Nanso so ɛsɛ sɛ wobɔ no denneennen ansa na woanya mu anigye? Na so nyansa wom sɛ wobɛbɔ dwom a ɛte saa a wuntwa so? Ɛda adi sɛ, nnwom a ne nnyigyei ano yɛ den a wɔbɔ toatoa so no ama apontow ahorow binom adan “agobɔne.”

Bere a Dwom No Yɛ Nyaa

Ɔkwan a wɔfa so saw dwom a ɛyɛ nyaa a ano nyɛ den ano no nso betumi ayɛ nea asiane wom. Bill ne Ann huu eyi wɔ wɔn adamfo bi ayeforohyia apontow ase. Ann kyerɛkyerɛ mu sɛ: “Nã, wɔtaa brɛ kanea no ase na wɔbɔ nnwom a ano nyɛ den a ɛkɔ nyaa na ɛkanyan nkate. Ná wɔresaw baanu baanu a wɔn a wonnii mfe aduonu ka ho a wɔbɛbɛn wɔn ho wɔn ho pɛɛ wɔ faako a wɔresaw no.” Bill de ka ho sɛ: “Wɔn mu binom de wɔn ho twitwiw wɔn ho wɔn ho a wontu wɔn anan mpo.”

Sɛnea wunim yiye no, ebia ka a ɔbarima ho bɛka ɔbea kakraa bi anaasɛ ka a ɔbea ho bɛka ɔbarima kakraa bi no betumi akanyan nkate a emu yɛ den. Ende, ɛda adi sɛ, obi a wobɛfam no de asaw dwom a ɛkanyan nkate ano no yɛ nea nyansa nnim. Nokwarem no, so saa a wobɛyɛ no bɛyɛ nea mfomso biara nni ho anaasɛ ɛfata bere a wɔmmɔ dwom biara no? So ɛbɛyɛ nea ɛfata ma awarefo sɛ wɔbɛyɛ wɔn ade wɔ ɔkwan a ɛte sɛɛ so mpo wɔ baguam anaa? Enti sɛ wusi gyinae sɛ wobɛsaw nnwom a ɛyɛ nyaa ano a hwɛ yiye wɔ asiane ahorow a ebetumi aba no ho. Ebinom abɔ aguamman esiane asaw a ɛnkyerɛ ahobrɛase su a ɛkanyan wɔn nkate nti.

Nea Ɛwɔ Nnyigyei No Akyi

Kae nso sɛ: Pii wɔ nnwom mu sen nnyigyei ara kwa. Mpɛn pii nnwom no nnyigyei kanyan nkate​—sɛ ɛnyɛ nea ɛkanyan ɔbea ne ɔbarima nna ho akɔnnɔ​—a na emu nsɛm no nye. Mpɛn pii no nea ɛka nnwom no mu nsɛm a ɛyɛ kasa-fĩ ho ne ne nnyigyei a ɛyɛ dɛ na ɛtwetwe adwene no. Nanso so wubetumi asaw nnwom a ɛtete saa ano na woakɔ so asusuw nneɛma a eye, na ɛfata ho?

So woate dwom bi a na wompɛ, nanso akyiri yi wubu sɛ wode wo menewa mu reto anaasɛ emu nsɛm pue wɔ w’ano? Yɛn adwene kyere nsɛm bi a ɛtɔ bere bi a yɛn werɛ fi. Fa nnyigyei a ɛyɛ dɛ na ano yɛ den na ɛyɛ nea wotĩ mu bɔ (sɛnea ɛte wɔ nnɛyi nnwom binom mu no) ka nsɛm a ɛsɛe ɔbra pa ho, na wubehu nea enti a nnwom a ɛtete saa ano a wɔbɛsaw no yɛ nea asiane wom no. Nsɛm no betumi abɛyɛ dwom a aka adwene​—ne koma no mu.

So Wobɛsaw?

Yɛn Bɔfo a ɔwɔ ɔdɔ no pɛ sɛ yɛn ani gye, na nneɛma a wɔyɛ de gye wɔn ahome aboa ama nkurɔfo anya anigye fii bere tenten. Bible no ka sɛ: “Na mmarimaawa ne mmeawa bɛyɛ kurow no mmɔnten so amaama, na wɔagoru emu mmɔnten so.” Afei nso, ɛka sɛ, “asaw wɔ ne bere.” (Sakaria 8:5; Ɔsɛnkafo 3:4) Nanso sɛnea yɛahu no, ɛnyɛ asaw nyinaa na ɛyɛ anigyede ara kwa a mfomso biara nni ho. Wɔasaw wɔ tete no ne nnɛ wɔ ɔkwan bi so a ɛma ɛbɛyɛ nea ɛkanyan ɔbarima ne ɔbea nna ho akɔnnɔ na ama nkurɔfo abɔ aguamman. Enti asemmisa a ɛne sɛ, So mɛsaw? no yɛ nea ɛfata.

Ebia ebinom bɛpaw sɛ wɔrensaw, bere a wɔahu asiane a ɛwɔ mu esiane wiase no nkɛntɛnso bɔne ne ebia sɛnea wosusuw sɛ wɔbɛyɛ nneɛma atra so wɔ asaw a ɛnyɛ nea mfomso pii nni ho mu nti no. Enti sɛnea ebinom twe wɔn ho fi nsa a ano yɛ den ho na ɛnyɛ sɛ nsa no nnye na mmom esiane sɛ asanom betumi apira wɔn nti no, saara nso na ebia nneɛma a ɛtete saa nti ebinom de nyansa bɛtwe wɔn ho afi asaw ho. Nanso ebia wubehu sɛ wobetumi ne nnipa a wɔn adwene mu da hɔ asaw nnwom a wɔapaw a ɛfata a ɛbɛboa ma w’ani agye a nneɛma bɔne remfi mu mma ano. Sɛ woyɛ abofra a, wobɛpɛ sɛ wutie wo Kristofo awofo na woayɛ nea wɔpɛ.​—Efesofo 6:1-3.

Mmere a atwam no mu no, na mmofra taa sua asaw fi wɔn awofo ne mpanyimfo afoforo hɔ. Ná wɔtaa de asaw ahorow a ɛtete saa no kyerɛ awo ntoatoaso a edi hɔ no! Yɛn Bɔfo no kae bere bi kyerɛɛ Israelfo no sɛ: “Ɛno na mmabaa ani begye asaw mu, na mmerante ne nkwakora abom anya anigye.” (Yeremia 31:13) Ɛda adi sɛ wɔbom saw, te sɛ ‘asaw a wɔsaw de twa wɔn ho.’ (Atemmufo 21:21; Dwom 150:4) Mmofra ne mpanyimfo betumi akɔ so ara abom asaw!

Asaw a wɔbom saw da so ara yɛ nea wɔtaa yɛ wɔ aman horow pii mu. Wɔ United States no wɔwɔ asaw a nnipa baanan bom saw. Eyi betumi ayɛ ɔkwan a wɔfa so gye wɔn ani a obiara nya mu kyɛfa. Mexicofo ani gye “La Raspa” ho. Na Helafo ani da so ara gye asaw a wɔde twa wɔn ho hyia no ho. Sɛ motow pon a asaw wɔ ase a, dɛn nti na monto nsa mfrɛ mo awofo ne mpanyimfo afoforo binom? Ebia wobetumi akyerɛ mo ɔkwan biako anaa abien a wɔfa so saw, na mo ani begye sɛ mone wɔn saw.

Mpanyimfo betumi akyerɛ mo tete asaw no bi. Bere a awofo ne afoforo a wɔwɔ obu ma wɔn wɔ hɔ no, asaw no renyɛ agobɔne de. Enti paw apontow a ɛkɔ so wɔ fie a mmusua horow nyinaa wɔ ase mu. Pow nnwom a ɛsɛe ɔbra pa nyinaa a emu nsɛm nnye no. Hu faako a ɛsɛ sɛ wugye w’ani kodu sɛnea ɛbɛyɛ a ennye wo bere pii. Ɛdenam nyansahyɛ ahorow yi a wubetie so no, w’ani betumi agye asaw a wosaw wɔ ɔkwan a ɛkyerɛ sɛ ɛyɛ anigyede a mfomso biara nni ho ampa no ho.

[Asɛm a wɔafa aka wɔ kratafa 27]

Asaw a wɔsaw bɛn ha pɛɛ bere a wɔrebɔ dwom a ɛyɛ nyaa na ɛkanyan nkate no betumi akanyan akɔnnɔ bɔne

[Kratafa 28 mfoni]

Wɔ Kristofo apontow ahorow ase no, mmofra ne mpanyimfo nyinaa betumi anya asaw a wɔsaw bom mu anigye