Sɛnea Wode Bere Tiaa Bɛyɛ Nneɛma Pii

‘Bere no kɔɔ he?’ Mpɛn ahe na woabisa wo ho saa asɛm yi? Sɛ wote sɛ nnipa ahorow bi a, ɛnde akyinnye biara nni ho sɛ woabisa no mpɛn pii sen sɛnea wubetumi akae.

Nea edidi so yi yɛ nyansahyɛ ahorow a ɔbea bi de ma, nanso esiane sɛ mmea ne mmarima nyinaa bere a wonya wɔ dapɛn no mu no yɛ pɛ nti, asemmisa a ɛne sɛ ‘Ɔkwan bɛn so na metumi de bere a mewɔ ayɛ nneɛma pii?’ no yɛ nea mmarima ne mmea nyinaa hwehwɛ ho mmuae.

Hu Nea Edi Kan a Ɛho Hia

Esiane sɛ asetra mu adeyɛ biara gye bere nti, nneɛma bi wɔ hɔ a ɔkwan biara so no ɛho hia sen afoforo. Sɛ nhwɛ so no, wɔ awɔw bere mu anɔpa no, anka biribiara nni hɔ a ɛsɛ sɛ ɔbea yɛ sen sɛ ɔbɛkɔ so ada ne mpa a ɛso yɛ hyew no so. Nanso dɔn bɔ sɛ bere aso sɛ osiesie anɔpa aduan na ɔhwɛ ma ne kunu kɔ adwuma na mmofra no kɔ sukuu.

Ansa na biribiara bɛkɔ so yiye wɔ wo fie no, ɛsɛ sɛ wuhu nea edi kan a ɛho hia. Bere a wɔde totɔ nnuan wɔ hɔ na bere a wɔde noa wɔ hɔ; bere a wɔde prapra fie wɔ hɔ na bere a wɔde horo nneɛma wɔ hɔ; bere a wɔde gye ahome wɔ hɔ na bere a wɔde sua ade wɔ hɔ; bere a ɛsɛ sɛ wohwɛ mmofra no ne dwumadi ahorow so wɔ hɔ​—na nhyehyɛe pon no toa so ara.

So wufi fie kɔ adwuma? Sɛ saa a, esiane sɛ nneɛma afoforo wɔ hɔ a woyɛ ka ho nti, bere bɛyɛ nea ɛsom bo pii ma wo. Wurentumi nsɛe no kwa, na wuntumi nyɛ mmɔtohɔ nso. Ɛno nti na mmea pii ahu sɛ bere ho nhyehyɛe a wɔbɛyɛ no ho hia yiye na ama wɔatumi ayɛ wɔn adwuma no.

Josephine, ɔbea bi a ne mma yɛ baasia a wɔadi fi mfe 2 kosi 15 no ka sɛ, “sɛ manyɛ bere ho nhyehyɛe da biara da a, mintumi nnu me da biara botae ahorow no ho.” Sandra a ɔwɔ mma baasa na ɔyɛ adwuma wɔ kurom nnɔnhwerew 25 dapɛn biara no gye tom sɛ: “Sɛ minni bere ho nhyehyɛe a, anka mɛbɔ dam.”

Afei, akyinnye biara nni ho sɛ nea ɛho hia wo kan a wubehu no gyina sɛnea bere som bo ma wo no so. Ɛte saa ma Lola. Ɛnyɛ sɛ ɔwɔ okunu a ɛsɛ sɛ ɔhwɛ no nko na mmom ɔde nnɔnhwerew 90 kosi 100 yɛ Bible nkyerɛkyerɛ adwuma nso. Ɔka sɛ: “Bere ho hia me yiye. Mete nka sɛ ɛyɛ papa sɛ woremma nnipa afoforo nsɛe bere. Sɛ wɔn a ebia wonni biribiara a wɔyɛ no hu sɛnea bere som bo ma me yiye no a, wɔnnsɛe me bere.”

Hyehyɛ Nnwuma no

Dɛn nti na ɛte sɛ nea mmea bi nwie wɔn adwuma da no? Anaasɛ dɛn nti na bere nyinaa ebinom ka sɛ wonnya bere no? So ebetumi aba sɛ esiane sɛ wɔnhyehyɛ wɔn adwuma no nti? Wɔ awo ntoatoaso ahorow a atwam mu no, ná mmea de da mũ nyinaa na ɛhoro nneɛma na wɔde da a edi hɔ no atow so, na na wɔkɔ gua na wɔnoa aduan daa. Nanso ɛnnɛ, wɔ aman pii mu no, sɛ ɔbea hyehyɛ n’adwuma yiye a, obetumi apra, ahoro nneɛma ahata, na wanoa aduan bere koro mu. Nnɛyi abɔrehude ahorow ama mmea pii tumi yɛ adwuma wɔ kurom na wɔkɔ so di abusua no ahiade ahorow ho dwuma.

Nanso bere a wɔde di dwuma wɔ kurom no ɛ? Nea ɛka emu fã kɛse a wɔde yɛ adwuma ankasa ho ne sɛ wɔde di adwuma mu akɔneaba, wɔde twɛn oduruyɛfo ne ɛse hwɛfo ne nea wɔde kɔ mmeae ahorow. So wobetumi de bere yi mu fã kɛse ayɛ biribi? Sɛ nhwɛso no, so wunim ade a wɔde paane pam anaasɛ wɔde nwene? So wubetumi adi akyɛde ahorow mu bi ho dwuma bere a woretwɛn wɔ mmeae yi no? Mmea pii kenkan nhoma, wɔkyerɛw nneɛma a wɔbɛtotɔ anaasɛ nkrataa. Nokwarem no, bere foforo a wobɛhwɛ TV no, dɛn nti na wompam ade anaasɛ wonyɛ biribi mma abusua no? Wɔn ani begye eyi ho pii asen nea wɔtɔn no, na wubenya biribi pɔtee de akyerɛ sɛ wonsɛe bere!

Nanso, eyi ho asɛm foforo wɔ hɔ. Ɛsɛ sɛ obi kwati katee a ɔbɛyɛ dodo wɔ mmɔden a ɔbɛbɔ sɛ ɔde simma biara bɛyɛ biribi no. Wubetumi ayɛ akoa ama bere, na ɛno remma w’ani nnye. Mmere bi wɔ hɔ a obi pɛ sɛ ɔtra ase komm na odwen nea wayɛ ho. Mmere a ɛte saa no betumi ayɛ nea ɛsom bo yiye!

Wobetumi de nnyinasosɛm yi adi dwuma wɔ sika a wɔbɛhwɛ so yiye no ho. Ɛsɛ sɛ wɔkari pɛ. Ebia wubekyinkyin kurom nyinaa de apɛ ade a ne bo nyɛ den atɔ, nanso na woresa ngo a egu w’afiri mu no. Ɛwom, sɛ wo ho akyere wo a, nneɛma a ne bo nyɛ den a wobɛtɔ no ho hia. Enti ebia aguadibea biako a wobɛtotɔ wo nneɛma wɔ hɔ no bɛboa wo. Wunim mmeae a nneɛma (a ne bo nyɛ den) wɔ na wunim bere a wɔtɔn no (aboɔmmerɛw) .

Berɛ a Eye Sen Biara a Wobɛpaw

Ɔbea biara wɔ n’ankasa bere. Ebinom tumi yɛ adwuma yiye anɔpa; afoforo ntumi nyɛ gye sɛ awia. Sɛ anɔpa na wutumi yɛ adwuma a, ɔkwan biara so no, fa wo nneɛma a ɛyɛ den no nyinaa hyɛ saa bere no. Fa w’ahoɔden di dwuma bere a wutumi yɛ ade pii no. Sɛ woyɛ adwuma wɔ kurom a, dɛn nti na wonka ho asɛm nkyerɛ w’adwuma wura? Ɛbɛyɛ mfaso ama wo ne no nyinaa sɛ ɔde w’adwuma bɛhyɛ saa bere no. Nanso sɛ w’ani haw anɔpa a, fa w’adwuma a ɛho hia wo no hyɛ bere a wutumi yɛ ade yiye no.

Anɔpa na Mary tumi yɛ adwuma. Obu bere a ɔde yɛ ne som adwuma no sɛ ɛda no fã a ɛho hia sen biara. Enti ɔyɛ awia adwuma a ɔde bere fã yɛ. Eyi ma otumi de nnɔnhwerew a ɛsen biara no yɛ Bible nkyerɛkyerɛ adwuma no. So wubetumi de wo bere nhyehyɛe ayɛ biribi a ɛte saa?

Fa Adwenemtew Di Dwuma

Sɛ wobetumi adi bere nhyehyɛe so a, ɛnsɛ sɛ wɔde nneɛma pii ba mu. Mmɔden a wobɛbɔ sɛ wobɛyɛ Ɛna, Ɔyere anaasɛ Odwumayeni a ɔsen obiara no betumi de huammɔdi ne abasamtu aba. Sɛ wunni akwahosan pa a eyi betumi ayɛ nokware. Yɛ adwuma a w’ahoɔden betumi.

Dolly a ɔyɛ ɔyarefo no kyerɛkyerɛ mu sɛ: “Me bere gyina me kunu adwuma so titiriw. Ɔyɛ ɔsomfo kwantuni. Esiane sɛ yɛntena faako nti, sɛ ɔyɛ n’adwuma wie a na me yɛ mede. Me yare no mma menyɛ nea mepɛ sɛ meyɛ nyinaa. Nanso sɛ me ho yɛ me den a, me som adwuma no na ɛba kan. Menyɛ nneɛma afoforo a ɛwɔ fie hɔ saa da no.”

Yɛ Fakãã

Sɛnea ɔbea yɛ n’ade wɔ ahokyere bere mu na wɔde hu ne su. Sɛ ɔtɔ ne bo ase wɔ ahohia mu a, obetumi ayɛ nneɛma pii asen sɛ ɔbɛyɛ basaa.

Sandra huu sɛnea wodi ahokyere so nkonim. Ɔka sɛ: “Sɛ asɛnhia bi sɔre na mihu sɛ me ho akyere me a, metɔ me bo ase. Minim sɛ ɛte sɛ nea ntease nni mu, nanso ɛboa. Sɛ midi me ho so wie a, afei mehwɛ nea ɛho hia a ɛsɛ sɛ meyɛ kan. Sɛ mantɔ me bo ase a, minhu nea ɛfata a ɛsɛ sɛ meyɛ kan. Sɛ mihu eyi wie a, meyɛ m’ade ntɛmntɛm de di asenhia no ho dwuma na mitumi yɛ. Sɛ nhwɛso no, bere bi ahɔho a wɔreba ma yɛadidi bae nnɔnhwerew pii ansa na bere reso. Sɛ anka me ho bɛpere me mmom no, mekɔɔ so noaa aduan no na migyee wɔn ani sɛnea metumi. Wɔn nyinaa traa ase gyee wɔn ani.”

Hwehwɛ Mmoa

Obi kae bere bi sɛ ɔpanyin pa ne nea ɔwɔ aboafo pa bere nyinaa. So woma afoforo boa wo wɔ adwuma mu? Sɛ mfɛfo adwumayɛfo hu sɛ wɔkyerɛ wɔn mmoa ho anisɔ a, wotu wɔn ho ma pii. Eyi te saa wɔ fie. Nea ɛyɛ awerɛhow ne sɛ, mmea binom wɔ hɔ a wɔyɛ ofie adwumayɛfo ne aduannoafo a wɔyɛ katee araa ma enti obiara ntumi mmoa wɔn. Su yi nti na ɔyerenom ne ɛnãnom binom wɔ adwuma pii bere nyinaa bere a ɛkame ayɛ sɛ abusua no mufo a wɔwɔ hɔ nnya biribiara nyɛ no.

Na wo ɛ? Sɛ wuhia mmoa a, so wofrɛ? So wosrɛ mmoa anaasɛ wugye? Sɛ worekasa akyerɛ wo mma anaasɛ wo kunu a​—“Mesrɛ wo” ye sen “Me pɛ sɛ.”

Ɔbea bi a ɔkamfo ne kunu wɔ mmoa a ɔde ma no ho no ka sɛ: “Oye wɔ saa a ɔyɛ no ho ankasa. Sɛ meyare a, ɔma me kɔda na ɔnoa aduan; ɔne mmofra no nyinaa bom yɛ nnwuma no. M’ani gye ho ankasa!”

Su a ɛfata a ɛsɛ sɛ abusua nya bɛn ara ni! Nanso onipa titiriw a ɔwɔ tebea yi mu no ne ɛnã no. Obetumi atete mmofra no ma wɔahu sɛnea bere som bo no na wɔanya adwumayɛ ho adwempa. Mmofra a wɔte saa bɛpɛ sɛ wɔboa efisɛ wonya anigye fi abusua no botae koro a wodi ho dwuma bi no mu.

Akyinnye biara nni ho sɛ, wɔ nea afoforo bɛka anaasɛ wɔbɛyɛ nyinaa akyi no, nnipa binom bɛsɛe bere. Yɛrentumi nsakra wɔn; yebetumi ayɛ pii asen nea yenim. Yebetumi asi gyinae sɛ yɛde adwenemtew bedi bere ho dwuma, yɛayɛ nhyehyɛe pa, yɛahu nea ɛho hia a ɛsɛ sɛ yɛyɛ kan na yɛahwehwɛ mmoa bere a ɛho hia.

[Kratafa 15 mfoni]

Sɛ biribiara bɛkɔ so yiye wɔ wo fie a, ɛnde hu nneɛma a edi kan a ɛho hia