Yɛ Nyiyim Wɔ Anigyede a Wopaw Ho

Tumi bɛn na anigyede nya wɔ mmofra so? Ɔkyerɛkyerɛfo ne oduruyɛfo Alvin Poussaint a ɔde bɛyɛ mfe 30 ayɛ mmofra ho adwuma gye di sɛ sini a ɔbarima ne ɔbea nna ne basabasayɛ wom a mmofra hwɛ no ma wohu sɛ mfomso biara nni abrabɔ a ɛtete saa ho. Ɔsan twee adwene sii asiane foforo so: “Mahu mmofra a wofi sini a ɛte sɛɛ ase ba a ehu aka wɔn—anaa wɔn ani so ayɛ hyew kɛse. Mahu afoforo a wɔmpɛ sɛ wɔbɛbɛn nnipa anaa wonum wɔn kokurobeti na wɔdwensɔ kɛtɛ so.” Sɛnea oduruyɛfo yi kyerɛ no, animdefo ayɛ nsɛm foforo a ebetumi ama obi anya su a ɛtete saa ho kyerɛwtohɔ—emu kakraa bi ne mmofra a wɔhwe wɔn anaa wɔto wɔn mmonnaa ne wɔn a wɔte baabi a wɔreko wɔ hɔ. Ɔkyerɛkyerɛɛ mu sɛ: “Yɛn mu biara nhyɛ da mma abofra bi nkɔ tebea a ɛte sɛɛ mu, nanso yensiw wɔn kwan sɛ wɔnnhwɛ sini a ɛfa nneɛma a ɛyɛ hu sɛ yɛbɛhwɛ wɔ asetra ankasa mu ho.”

Kristofo wɔ ntease pa nti a ɛsɛ sɛ wɔyɛ nyiyim na wɔhwɛ hu sɛ anigyede a wɔpaw no mmu Bible nnyinasosɛm so. Sɛ nhwɛso no, Dwom 11:5 ka sɛ: “[Yehowa, NW] sɔ ɔtreneeni hwɛ, na ɔbɔnefo ne nea ɔpɛ amim de, ne kra tan no.” Na Kristoni ɔsomafo Paulo kyerɛwee sɛ: “Munkum mo akwaa a ɛwɔ asase so no: aguamammɔ, afideyɛ, akɔnnɔ nhyɛso, akɔnnɔ bɔne ne anibere . . . Munyi abufuw, bobɔne, bɔnepɛ, abususɛm ne aniwusɛm nyinaa mfi mo anom ngu.”—Kolosefo 3:5, 8.

Enti, ɛsɛ sɛ awofo hwɛ yiye na anigyede a wɔpaw ma wɔn mma—ne wɔn ho—anhyɛ “honam akɔnnɔ” ho nkuran. (Galatifo 5:19-21) Ɛsɛ sɛ wɔyɛ nyiyim, na wosusuw ye a anigyede no ye ne ne dodow ho.—Efesofo 5:15-17.