Ɛsom Bo Koraa Sen Sika

EFI NYAN! KYERƐWFO A ƆWƆ CANADA HƆ

The Monitor atesɛm krataa a ɛwɔ Bridgetown, Nova Scotia no samufo kyerɛw sɛ: “[Maame] no maa ne babea akyɛde a ɛsom bo koraa sen sika biara.” Ná ɛyɛ akyɛde bɛn? Ɛyɛ ne “nokwaredi ho nhwɛso a ɛyɛ nwonwa no.”

Anna ne ne babea Tanya kɔɔ buroniwaawu sotɔɔ bi mu kɔtɔɔ bag fitaa bi a wɔde Tanya Bible bɛhyem. Bere a wɔkɔɔ fie no, Tanya ho dwirii no bere a obuee bag no mu na ohuu Canada dɔla 1,000 wom no. Ntɛm ara, maame no ne ne babea no kɔɔ sotɔɔ no mu de sika no kɔmaa ɔbea a ɔtɔn bag no maa wɔn no. Ɛdaa adi sɛ, na bag a ɛnyɛɛ dada pii a wɔanhwehwɛ mu yiye ansa na wɔretɔn no yɛ ne maame a na adwenem yare bi akum no nnansa yi ara no dea. Ɔbea no fi anisɔ kɛse mu kae sɛ: “Ama manya gyidi wɔ nnipa mu bio . . . Ɛyɛ nkuranhyɛ sɛ yehu sɛ nnipa a wɔyɛ nokwaredifo da so wɔ hɔ.”

Kurom hɔ atesɛm krataa bi a ɛbɔɔ asɛm yi ho amanneɛ kyerɛw asɛm a Anna kae no wɔ anim sɛ: “Sɛ Yehowa Adansefo no, biribi foforo biara nni hɔ a na yebetumi ayɛ kyɛn eyi. Yɛwɔ [ahonim] a yɛde Bible atete no. Yɛpɛ sɛ yɛkyerɛ Tanya nea ɛteɛ nso.” Wɔ Tanya fam no, bag fitaa foforo no bɛyɛ nokwaredi ho asuade titiriw ama no bere nyinaa.