Nyan! a Wɔde Di Dwuma Ɔkwampa So

BERE a Vanessa, a ɔyɛ Yehowa Ɔdansefo wɔ United States, dii mfe 16 no, na ɛsɛ sɛ ɔkyerɛw amanneɛbɔ bi ma sukuu no fa asɛmti a ɛne anomtow ho. Ɔka sɛ: “Meyɛɛ nhwehwɛmu bi, nanso nsɛm kakraa bi na mitumi nyae. Mekaa ho asɛm kyerɛɛ m’awofo na wɔkyerɛe sɛ menyɛ asɛmti no ho nhwehwɛmu wɔ yɛn nhoma ahorow no mu.”

Bere a Vanessa yɛɛ Yehowa Adansefo nhoma ahorow mu nhwehwɛmu no, onyaa nsɛm a ɛfata a ɔde bɛkyerɛw n’amanneɛbɔ no. Ɔka sɛ: “Nanso na eyi yɛ dwumadi no fã bi kɛkɛ. Ná ɛsɛ sɛ migyina ɔkyerɛkyerɛfo no ne adesuafo 20 anim kenkan amanneɛbɔ no kyerɛ wɔn!” Na Vanessa bedi adwumaden yi ho dwuma dɛn?

Te sɛ Yehowa Adansefo a wɔwɔ wiase afã ahorow nyinaa no, Vanessa nya sɛnea wɔkasa wɔ baguam ho ntetee wɔ Teokrase Ɔsom Sukuu a wɔyɛ wɔ Ahenni Asa biara so no mu. Vanessa ka sɛ: “Ɛdenam saa sukuu yi so no, wosiesie yɛn yiye ma yɛkɔ asɛnka kɔkasa kyerɛ afoforo. Wɔma yɛn afotu nso wɔ nea ehia sɛ yedi ho dwuma no ho sɛnea ɛbɛyɛ a nkurɔfo bɛte yɛn ase yiye.” Dɛn na efii adwumaden a Vanessa yɛe wɔ ne sukuu amanneɛbɔ ho no mu bae? Ɔka sɛ: “Minyaa abodin a ɛsen biara.”

Vanessa yɛ mmofra pii a wɔde Bible ho nhoma ahorow ne honhom fam ntetee foforo di dwuma ɔkwan pa so no mu biako. Ɛsɛ sɛ yɛkamfo mmofra a wɔte saa no, efisɛ wɔredi afotu a ɛwɔ Ɔsɛnkafo 12:1 a ɛka sɛ: “Kae wo bɔfo wo mmerantebere mu” no akyi.