So W’aduan Ye?

“Ɔyare Bi a Wɔfrɛ no E. Coli Nti, German Atumfoɔ Ato Sukuu Bi Mu.”​—REUTERS NEWS SERVICE, GERMANY.

“Nhabamma a Wɔaka Afra a Wodii wɔ Nkurow Anum Mu no Na Ɛkɔfaa Salmonella Ɔyare no Bae.”​—USA TODAY.

“Nantwinam a efi anantwi 6 a Wɔmaa Wɔn Sare a Awuduru Wom no Akopue Amantam 9 So.”​—THE MAINICHI DAILY NEWS, JAPAN.

NSƐM a ɛwɔ atifi hɔ no puei atesɛm nkrataa mu wɔ nnawɔtwe abien ntam afe a etwaam no mu. Nhwehwɛmufo bu akontaa sɛ afe biara, nnipa a wɔte aman a wodi yiye mu ɔha mu nkyem 30 nya nyarewa fi aduan a wodi mu.

Amanneɛbɔ a ɛte saa no ka wo dɛn? Agya bi a ɔwɔ Hong Kong a wɔfrɛ no Hoi, ka sɛ: “Ɛhaw me yiye, na ɛhyɛ me abufuw mpo. Mewɔ mma baanu. Na ɔkwan a wɔfa so yɛ wɔn aduan ne baabi a wɔyɛ aduan no ho asɛm hia me.”

Wɔ aman a wodi hia mu no, nyarewa a wonya fi aduan ne nsu mu no kunkum nnipa ɔpepem pii—titiriw mmofra—afe biara. Bola, a ɔte Nigeria ka sɛ: “Sɛ wokɔ gua so a, nwansena, osu a ɛtɔ, mframa, ne tutuw nyinaa bɔ gu aduan a wɔtɔn no so. Sɛ mete anaa mekenkan ɔyare a wonya fi nnuan mu ho asɛm a, ɛma ehu ka me. Mepɛ sɛ mebɔ m’abusua ho ban.”

So wubetumi abɔ w’abusua ho ban afi aduan a enye ho? Canada Asoɛe a Ɛhwehwɛ Aduan a Wodi Mu ka sɛ: “Sɛ aduan bi a enye pue yɛn gua so a, obiara bɛte ho asɛm. Na ɛfata nso. Nanso nneɛma a yɛyɛ—ne nea yɛnyɛ—wɔ yɛn ankasa gyaade no betumi asɛe aduan a yedi na ama yɛayare.”

Dɛn na wubetumi ayɛ de abɔ w’abusua ho ban afi nyarewa a wonya fi aduan mu no ho? Yebesusuw akwan anan a ebetumi ama woahwɛ w’aduan yiye ho.

[Adaka wɔ kratafa 3]

HENANOM TITIRIW NA WƆWƆ ASIANE MU?

Nnipa bi wɔ hɔ a ɛnyɛ den koraa sɛ wobenya nyarewa afi aduan mu. Wɔn mu bi ne:

● Mmofra a wonnya nnii mfe anum

● Apemfo

● Nnipa a wɔadi boro mfe 70

● Nnipa a wɔn nkwaadɔm ntumi nko ntia nyarewa

Sɛ wo anaa obi a ɔne wo didi ka nnipa a yɛabobɔ wɔn din yi ho a, ɛsɛ sɛ wode ahwɛyiye siesie aduan a mudi no.

[Asɛm Fibea]

Efi: New South Wales Food Authority, Australia.