Adɛn Nti Na Nkurɔfo Nni Obu Mma Wɔn Ho?

NEA ENTI A EHIA SƐ YENYA OBU MA YƐN HO

Sɛ obi wɔ obu ma ne ho a, otumi de akokoduru gyina ɔhaw ano, na n’abam mmu ntɛm.

Nhwehwɛmu ama abɛda adi sɛ, wɔn a wɔbu wɔn ho sɛ wɔnsɛ hwee no, ɛyɛ a adwinnwen taa hyɛ wɔn so, wɔtaa botow, na wɔn adidi yɛ basaa. Afei nso, ebinom taa nom nsa ne nnubɔne.
Sɛ obi wɔ obu ma ne ho a, ɛyɛ a ɔmfa ne ho ntoto nkurɔfo ho. Wei ma ɛyɛ mmerɛw ma no sɛ ɔne afoforo bɛbɔ na wɔabɛyɛ ne nnamfo paa. Wɔn a wɔbu wɔn ho sɛ wɔnsɛ hwee no de, nea obiara bɛyɛ biara nyɛ wɔn fɛ, na etumi sɛe wɔne nkurɔfo ntam.
Wɔn a wɔwɔ obu ma wɔn ho no, sɛ wɔhyia ɔhaw a, wɔtumi gyina wɔn nan so, na nea wɔde asi wɔn ani so sɛ wɔbɛyɛ biara nso, wɔmma biribiara nsiw wɔn kwan sɛ wɔbɛyɛ. Nanso wɔn a wɔbu wɔn ho sɛ wɔnsɛ hwee no, sɛ ɔhaw ketewaa bi to wɔn a, na akɔyɛ sɛ wɔn wiase nyinaa aba awiei. Wei tumi ma wɔn abam bu ntɛm.

NEA WUBETUMI AYƐ

Fa nnamfo a wɔbɛhyɛ wo nkuran. Sɛ worefa nnamfo a, wɔn a wɔbu ade, wɔn a wɔpɛ sɛ esi wo yiye, ne wɔn a wɔbɛhyɛ wo nkuran ama woayɛ adepa no na ɛsɛ sɛ wofa wɔn nnamfo.

“Ɔyɔnko berɛbo de, ɔkyerɛ ne dɔ bere nyinaa, na ɔyɛ onua a wɔwoo no maa amanehunu bere.”—Mmebusɛm 17:17.

Boa afoforo. Sɛ wo yam ye na wokyɛ nkurɔfo ade, na woantwa wɔn a wɔntumi nkyɛ wo bi no mpo annya a, wubenya anigye amapa. Sɛ ɛba saa na woannya nkamfo mpo a, ɛrensɛe w’anigye.

“Ɔma mu wɔ anigye pii sen ogye.”—Asomafo Nnwuma 20:35.

Boa wo ba ma onnya obu mma ne ho. Ɔkwan baako a wubetumi afa so ayɛ saa ne sɛ, sɛ wo ba no hyia ɔhaw bi na sɛ ɔno ara betumi adi ho dwuma yiye a, gyae ma no. Wei bɛboa wo ba no na sɛ ɔhaw bi to no a, wahu sɛnea obetumi agyina ano. Ntetee a ɛte saa a wode bɛma wo ba no bɛma wanya obu ama ne ho, na ɛbɛboa no bere a wanyin mpo.

“Kyerɛkyerɛ abofra ɔkwan a ɔmfa so, na sɛ onyin mpo a, ɔremman mfi ho.”—Mmebusɛm 22:6.

Yehowa Danseni bi ne ɔbea bi reyɛ Bible adesua wɔ baabi a nkurɔfo tena didi.

NEA YƐREYƐ

Yehowa Adansefo nhyiam ahorow ne Bible adesua a yɛne nkurɔfo yɛ no aboa wɔn ama wɔn abrabɔ ayɛ kama na ama wɔanya obu ama wɔn ho.

NHYIAM A YƐYƐ NO NNAWƆTWE BIARA

Sɛ yɛkɔ yɛn nhyiam no a, yetie Bible mu ɔkasa ahorow, na nsɛm a yetie no pii wɔ hɔ a, sɛ obi nnye ne ho nni mpo a, ɛboa no ma onya ahotoso. Obiara tumi ba yɛn nhyiam no bi, na woba nso a wuntua hwee. Sɛ woba yɛn nhyiam no bi nso a, nneɛma wubesua no bi ne . . .

nea enti a wubetumi agye adi sɛ wo ho hia Onyankopɔn
nea woyɛ a ɛbɛma w’ani agye wɔ asetenam
nea woyɛ a wubenya nnamfo pa na wo ne wɔn abɔ akyɛ

Afei nso, wubenya nnamfo pa a ‘obiara ho hia ne yɔnko.’—1 Korintofo 12:25, 26.

Sɛnea yɛyɛ yɛn nhyiam no, sɛ wopɛ sɛ wuhu ho nsɛm pii a, hwehwɛ video tiawa a yɛato din Ɛdeɛn na Yɛyɛ wɔ Ahennie Asa So? Ɛwɔ jw.org.

YƐNE NKURƆFO BƆ BIBLE MU NKƆMMƆ

Sɛ yɛne nkurɔfo bɔ Bible mu nkɔmmɔ a yennye hwee. Nhoma a yɛde bɔ saa nkɔmmɔ no, yɛato din Wubetumi Anya Anigye Daa! Kyerɛwnsɛm a ɛkyerɛkyerɛ nsɛm mu, nsɛmmisa ne nsɛm a ɛma wudwen nneɛma ho kɔ akyiri, video ahorow a ɛka koma, ne mfoni a ɛyɛ fɛ pii wɔ nhoma no mu. Bible mu nkɔmmɔ a yɛne nkurɔfo bɔ no boa wɔn ma wɔnya obu ma wɔn ho na ɛma wɔn abrabɔ yɛ kama.

Sɛ wopɛ sɛ wuhu mfaso a ɛwɔ so sɛ wone Yehowa Adansefo besua Bible a, hwehwɛ video tiawa a yɛato din Adɛn Nti Na Ɛsɛ Sɛ Wusua Bible? Ɛwɔ jw.org.