Ɔhaw wɔ Dawid Fie

DAWID fii ase dii hene Yerusalem no akyi no, Yehowa maa ne dɔm dii wɔn atamfo so nkonim pii. Na Yehowa ahyɛ bɔ sɛ ɔde Kanaan asase no bɛma Israelfo. Na afei, ɛdenam Yehowa mmoa so no, asase a wɔde hyɛɛ wɔn bɔ no nyinaa abɛyɛ wɔn dea.

Dawid yɛ ɔhempa. Ɔdɔ Yehowa. Enti nneɛma a edi kan a ɔyɛe bere a ne nsa kaa Yerusalem no ne sɛ ɔde Yehowa apam adaka no bɛba hɔ. Na na ɔpɛ sɛ osi asɔredan a ɔde besi mu.

Bere a Dawid nyinii no ɔyɛɛ mfomso kɛse bi. Ná Dawid nim sɛ ɛyɛ mfomso sɛ ɔbɛfa ade a ɛyɛ obi dea. Nanso da koro anwummere, bere a ɔwɔ ahemfie dan no atifi no, ofi hɔ huu ɔbea bi a ne ho yɛ fɛ yiye. Wɔfrɛ no Batseba, na na ne kunu yɛ n’asraafo no biako a wɔfrɛ no Uria.

Dawid de n’adwene sii Batseba so araa ma wɔkɔfaa no baa n’ahemfie hɔ. Na ne kunu wɔ akono. Dawid ne no dae, na akyiri yi ohui sɛ ɔbea no anyinsɛn. Ɛhaw Dawid kɛse, na ɔde nkra kɔmaa ne sahene Yoab sɛ ɔmfa Uria nkogyina baabi a ɔko no mu yɛ den a wobekum no. Bere a Uria wui no, Dawid waree Batseba.

Yehowa bo fuw Dawid kɛse. Enti ɔsomaa n’akoa Natan sɛ ɔnkɔka ne bɔne no ho asɛm nkyerɛ no. Wutumi hu Natan wɔ hɔ sɛ ɔne Dawid rekasa. Dawid werɛ howee kɛse wɔ nea ɔyɛe no ho, enti Yehowa ankum no. Nanso Yehowa kae sɛ: ‘Esiane sɛ woayɛ nneɛma bɔne yi nti, wubehyia ɔhaw pii wɔ wo fie.’ Na hwɛ ɔhaw ara a Dawid hyiae!

Nea edi kan no, Batseba ba no wui. Afei Dawid ba panyin Amnon hyɛɛ ne nuabea Tamar ne no dae. Dawid ba Absalom bo fuwii kɛse na okum Amnon. Akyiri yi, nnipa pii kodii Absalom akyi, na ɔyɛɛ ne ho hene. Awiei no, Dawid dii Absalom so nkonim, na wokum no. Yiw, ɔhaw pii baa Dawid so.

Eyinom nyinaa mu no, Batseba woo Salomo. Bere a Dawid bɔɔ akwakora na ɔyare no, ne ba Adonia bɔɔ mmɔden sɛ ɔbɛyɛ ne ho hene. Nanso Dawid maa ɔsɔfo Sadok de ngo guu Salomo atifi de kyerɛe sɛ Salomo na ɔbɛyɛ ɔhene. Ɛno akyi bere tiaa bi no Dawid wui a na wadi mfe 70. Odii hene mfe 40, na afeiSalomo bedii Israel so hene.