Asɛmti Ho Dwumadi

AKASAFO a wɔn ho akokwaw nim mfaso a ɛwɔ asɛmti a wonya so. Sɛ wɔresiesie ɔkasa a, asɛmti no boa wɔn ma wɔtwe adwene si nsɛm kakraa bi so na wosusuw ho kɔ akyiri. Nea efi mu ba ne sɛ, sɛ anka wɔbɛbobɔ nsɛm pii so no, wɔhyehyɛ wɔn asɛm no wɔ ɔkwan bi so a, wɔn atiefo benya so mfaso kɛse. Sɛ nsɛntitiriw no mu biara ne asɛmti no hyia na ɛboa ma wɔkyerɛkyerɛ mu a, ɛboa atiefo no nso ma wɔkae saa nsɛm no kyerɛ hia a ehia no so mfaso.

Ɛwom sɛ yebetumi aka sɛ w’asɛmti no ne asɛmpɔw a woka ho asɛm no de, nanso sɛ wonwene w’asɛmti no fa adwene pɔtẽẽ bi ho a, wubehu sɛ wo kasa no betu mpɔn. Ahenni no, Bible no, ne owusɔre ho nsɛm dɔɔso. Wubetumi anya nsɛmti ahorow pii wɔ nsɛmpɔw yi ho. Nhwɛso ahorow bi ni: “Ahenni no Yɛ Nniso Ankasa,” “Onyankopɔn Ahenni Bɛma Asase Ayɛ Paradise,” “Bible no Fi Onyankopɔn Home Mu,” “Bible no Yɛ Akwankyerɛ Nhoma a Mfaso Wɔ So Ma Yɛn Nnɛ,” “Owusɔre no Ma Wɔn a Wodi Awerɛhow Nya Anidaso,” ne “Owusɔre Anidaso no Boa Yɛn Ma Yegyina Pintinn Bere a Yehyia Ɔtaa.” Ɛsono sɛnea ɛsɛ sɛ wɔkyerɛkyerɛ nsɛmti yi nyinaa mu.

Nea ɛne Bible mu asɛmti titiriw hyia no, asɛnka a Yesu Kristo bɛyɛe wɔ n’asase so som adwuma mu no sii asɛmti: “Ɔsoro ahenni no abɛn” so dua. (Mat. 4:17) Ɔkwan bɛn so na wɔkaa saa asɛmti no ho asɛm? Wɔkaa saa Ahenni no ho asɛm bɛboro 110 wɔ Nsɛmpa anan no mu. Nanso ɛnyɛ asɛm “ahenni” no ara kwa na Yesu tĩĩ mu mpɛn pii. Yesu nam nea ɔkyerɛkyerɛe ne anwonwade a ɔyɛe so maa mu daa hɔ pefee sɛ ɔno a ɔne wɔn wɔ hɔ no ne, Onyankopɔn Ba, Mesia, nea Yehowa de Ahenni no bɛma no no. Afei nso Yesu maa ɛdaa adi sɛ ɛdenam no so no, wobebue hokwan ma afoforo ne no adi ade wɔ saa Ahenni no mu. Ɔkaa su ahorow a ɛsɛ sɛ wɔn a wobenya saa hokwan no da no adi ho asɛm. Ɛdenam ne nkyerɛkyerɛ ne ahoɔdenne a ɔyɛe so no, ɔmaa nea Onyankopɔn Ahenni bɛyɛ wɔ nnipa asetram no daa adi pefee, na ɔkae sɛ Onyankopɔn honhom a ɔnam so tuu ahonhommɔne no yɛ adanse a ɛkyerɛ sɛ ‘Onyankopɔn ahenni aba’ n’atiefo no so. (Luka 11:20) Ɛyɛ saa Ahenni no na Yesu hyɛɛ n’akyidifo sɛ wonni ho adanse no.—Mat. 10:7; 24:14.

Asɛmti a Ɛfata a Wode Bedi Dwuma. Wɔnka sɛ ka asɛmti no ho asɛm pɛpɛɛpɛ sɛnea Bible no yɛ no, nanso asɛmti a ɛfata a wubenya no ho hia saa ara.

Sɛ wogyaw asɛmti no ma wo sɛ paw a, di kan susuw wo kasa no botae ho. Afei bere a wopaw nsɛntitiriw a wobɛka ho asɛm no, hwɛ hu sɛ eyinom kyerɛkyerɛ asɛmti a woapaw no mu ankasa.

Sɛ wɔde asɛmti no ma a, susuw nea ɛkyerɛ ne ɔkwan a wobɛfa so ama ɔkasa no ho. Ebia ebegye mmɔdenbɔ kakra na ama woate ɛbo a asɛmti a ɛte saa som ne nea ɛpɛ sɛ ɛkyerɛ no ase. Sɛ wo na wobɛpaw nsɛm a wode bɛkyerɛkyerɛ asɛmti a wɔde ama no mu a, fa ahwɛyiye paw nsɛm sɛnea ɛbɛyɛ a asɛmti no renyera. Ɔkwan foforo so no, sɛ wɔde nsɛm no ma a, ɛho bɛda so ara ahia sɛ wususuw sɛnea wode bedi dwuma ma ɛne asɛmti no ahyia ho. Afei nso ehia sɛ wususuw nea enti a asɛm no ho hia w’atiefo no ne atirimpɔw a ɛsɛ sɛ wode ma ɔkasa no ho. Eyi bɛboa wo ma woahu nea ɛsɛ sɛ wusi so dua wɔ wo kasa no mu.

Sɛnea Wosi Asɛmti So Dua. Nea ɛbɛyɛ na woasi asɛmti no so dua yiye no, ɛsɛ sɛ woto fapem bere a worepaw nsɛm na worehyehyɛ wo kasa no. Sɛ wode nsɛm a ɛkyerɛkyerɛ w’asɛm no mu nkutoo di dwuma na sɛ wudi akwankyerɛ ahorow a wɔde siesie ɔkasa a etu mpɔn akyi a, ɛbɛma woasi w’asɛmti no so dua a wommrɛ ho.

Ntĩmu betumi aboa ma woahyɛ asɛmti no mu den. Wɔ sankudwom mu no, sanku nnyigyei a wotĩ mu bɔ no mpɛn pii no na ɛma wohu nnwom no nyinaa. Sanku nnyigyei no nyɛ biako bere nyinaa. Ɛtɔ mmere bi a, wɔsakra mu ma nnyigyei biako anaa abien pue, nanso ɔkwan bi so no, nea ɔhyehyɛ dwom no de ahokokwaw nwene ne nsɛm no hyehyɛ nnyigyei no mu kosi sɛ ɛbɛfa nnwom no nyinaa. Saa na ɛsɛ sɛ ɔkasa asɛmti yɛ. Nsɛntitiriw a wubeyi afi asɛmti no mu atĩ mu no te sɛ sanku nnyigyei a ɛtaa pue wɔ nnwom mu. Nsɛm a ekura ntease biako yi anaa asɛmti no a wobɛka no ɔkwan foforo so no dannan mu. Ɔkwan a ɛte saa a wobɛfa so adi w’asɛmti ho dwuma no bɛma aka w’atiefo no tirim.

Ɛnyɛ ɔkasa a wɔma wɔ asɛnka agua so nkutoo na nnyinasosɛm ahorow yi fa ho, na mmom ɛfa nkɔmmɔ a wɔbɔ wɔ asɛnka adwuma mu nso ho. Sɛ asɛmti bi mu da hɔ yiye a, ɛma nkɔmmɔ tiawa a wɔbɔ ka adwenem yiye. Sɛ wosi asɛmti bi so dua a, ɛma ɛyɛ mmerɛw sɛ wɔbɛkae akwankyerɛ a wɔde ama wɔ Bible adesua ase no. Mmɔden a wobɛbɔ de apaw nsɛmti a ɛfata na woakyerɛkyerɛ mu no bɛboa pii ma woatu mpɔn sɛ Onyankopɔn Asɛm ho kyerɛkyerɛfo ne ɔkasafo.