So Ɛyɛ Ampa sɛ Awufo Bɛsan Atena Ase Bio?

NEA BIBLE AKA

‘Bere bi bɛba a awufo bɛsɔre.’—Asomafo Nnwuma 24:15, Wiase Foforo Nkyerɛase.

ƆKWAN BƐN SO NA ƐBƐBOA WO?

Wubenya awerɛkyekye bere a wo dɔfo bi awu.​—2 Korintofo 1:3, 4.

Worensuro owu.​—Hebrifo 2:15.

Wubenya anidaso ankasa sɛ wubehyia w’adɔfo a wɔawuwu no bio.​—Yohane 5:28, 29.

ENTI NEA BIBLE AKA YI YƐ AMPA?

Nneɛma abiɛsa yi nti yebetumi aka sɛ ɛyɛ ampa:

• Onyankopɔn ne nkwamafo. Bible ka sɛ Yehowa Nyankopɔn yɛ “nkwa nsuti.” (Dwom 36:9; Asomafo Nnwuma 17:24, 25) Akyinnye biara nni ho sɛ, Nea ɔmaa abɔde a wɔte ase nyinaa nkwa no betumi ama obi a wawu asan aba nkwa mu bio.

• Onyankopɔn nyan awufo wɔ tete mmere mu. Bible ka nnipa baawɔtwe​—mmofra, mpanyin, mmarima ne mmea​—a wonyan wɔn baa nkwa mu wɔ asase so ho asɛm. Wɔn mu binom wuu bere tiaa bi, na obiako mpo dii nnannan wɔ ɔdamoa mu!​—Yohane 11:39-44.

• Onyankopɔn pɛ paa sɛ onyan awufo bio. Yehowa kyi owu; obu owu sɛ ɔtamfo. (1 Korintofo 15:26) Ɔpɛ sɛ odi ɔtamfo yi so nkonim; na ɔbɛfa owusɔre no so ayi owu afi hɔ. Ɔpɛ sɛ ɔde wɔn a wɔwɔ ne nkae mu no ba nkwa mu na wɔsan bɛtena asase so bio.​—Hiob 14:14, 15.