Bra “Onyankopɔn Asɛm Mu Gyidi” Ɔmantam Nhyiam!

NNIPA ɔpepem pii bɛba mmeae ɔhaha pii a yɛbɛyɛ nhyiam wɔ wiase nyinaa no. Wɔayɛ nhyiam yi pii ho nhyehyɛe wɔ Afrika Atɔe fam wɔ December 1997 ne January 1998 mu. Ɛda adi sɛ nnansa nhyiam yi—Fida kosi Kwasida—no bi bɛkɔ so wɔ kurow bi a ɛbɛn baabi a wote no.

Wubenya Bible nkyerɛkyerɛ pii a mfaso wɔ so. Wɔ mmeae pii no, wobefi dwumadi no ase 9:30 anɔpa biara. Wɔde simma 25 bebisa nkurɔfo a Onyankopɔn Asɛm mu gyidi anya wɔn asetra so tumi kɛse no nsɛm Fida anɔpa. Wɔde nhyiam asɛmti ho ɔkasa a ɛne “Nantew Gyidi mu, Ɛnyɛ Ohu Mu” na ebewie ɔfã a edi kan no.

Ɔkasa a edi kan Fida awia no bɛka mmofra afã a ɛho hia wɔ Kristofo asafo no mu ho asɛm. Ɔkasa a wɔakyekyem a ɛwɔ afã abiɛsa a edi so no bɛka sɛnea Bible gyinapɛn ahorow fa Kristofo abrabɔ ho wɔ kasa, nneyɛe, ne ahosiesie mu ho asɛm. Ɔkasa horow a edi hɔ a ɛne “Hwɛ Yiye Wɔ Gye a Wonnye Nni Ho” ne “Onyankopɔn Asɛm Wɔ Nkwa” no twe adwene si afotu pa a ɛwɔ Hebrifo atiri 3 ne 4 no so. Wɔde ɔkasa a ɛne “Nhoma a Eye Ma Nnipa Nyinaa” na ebewie Fida awia dwumadi no.

Memeneda anɔpa kasa a edi kan ne “Gyidi a Nnwuma Nni mu Awu.” Ɔkasa foforo a ɛho hia a wɔbɛma saa anɔpa no ne “Momma Mo Ase Ntim na Munsi Pi Wɔ Nokware no Mu” na ɛka sɛnea yebetumi anya honhom fam onyin ho asɛm. Wɔde nhyiam no mu dwumadi a wɔyɛ no daa a ɛne “Onyankopɔn Asɛm mu Gyidi Kowie Asubɔ Mu” na ebewie ɔfa no, na ɛno akyi no, wɔbɛyɛ nhyehyɛe akɔbɔ asuafo foforo asu.

Memeneda awia kasa a edi kan a ɛne “Ko Denneennen Ma Gyidi No” bɛka Bible nhoma a ɛne Yuda mu afotu ho asɛm. Ɔkasa a wɔakyekyem a ebegye dɔnhwerew biako a n’asɛmti ne “Ma Yɛnkɔ Yehowa Fi” no bɛka Kristofo nhyiam horow so mfaso ho asɛm. Ɔkasa a ɛne “Wɔsɔ Sɛnea Mo Gyidi Te Hwɛ Ankasa—Mprempren” na ebewie da no dwumadi no.

Wɔbɛma ɔkasa a wɔakyekyem a ɛwɔ afã abiɛsa a ɛfa Bible nhoma a ɛne Yoel ho, na ɛka sɛnea ɛfa yɛn mmere yi ho wɔ Kwasida anɔpa dwumadi no mu. Afei Bible drama a n’asɛmti ne ‘Ma W’ani Nhwɛ Tẽẽ’ bedi hɔ. Nhyiam no ase ade titiriw ne baguam ɔkasa a n’asɛmti ne “Gyidi ne Wo Daakye” a wɔbɛma no awia no.

Akyinnye biara nni ho sɛ ba a wobɛba no bɛhyɛ wo den honhom mu. Yɛde anigye bɛma wo akwaaba aba nhyiam no fã biara ase. Fi nnɛ yɛ nhyehyɛe sɛ wobɛba bi. Sɛnea ɛbɛyɛ a wubehu baabi a ɛbɛn wo pɛɛ no, kɔ Yehowa Adansefo Ahenni Asa a ɛwɔ baabi a wote no, anaasɛ kyerɛw wɔn a wotintim nsɛmma nhoma yi no.