“Onyankopɔn Asetra Kwan” 1998-1999 Ɔmantam Nhyiam no Abɛn!

WƆAYƐ ɔmantam nhyiam ɔhaha pii ho nhyehyɛe fi May 1998 kosi January 1999 mu wɔ wiase nyinaa. Ɛda adi sɛ wɔbɛyɛ nnansa nhyiam ahorow yi bi wɔ kurow bi a ɛbɛn baabi a wote no. Wɔ mmeae pii no, wobefi dwumadi no ase—Fida kosi Kwasida—9:30 anɔpa biara.

Fida anɔpa dwumadi no bɛka amanneɛbɔ a ɛfa nkɔso a Ahenni asɛnka adwuma no renya wɔ wiase mmeae ahorow no ho nsɛntitiriw. Na nhyiam asɛmti ho ɔkasa a ɛne “Kristo Agyede No—Onyankopɔn Nkwagye Kwan” no besi nhyiam no asɛmti so dua.

Awiabere no, ɔkasa a wɔakyekyem “Awofo—Momfa Onyankopɔn Akwan Nnua Mo Mma Mu” no de ɔkwan a wɔbɛfa so akanyan mmofra ma wɔadɔ Yehowa na wɔasom no no ho nyansahyɛ ahorow bɛma. Wɔde ɔkasa “So Owu Akyi Asetra Wɔ Hɔ?” na ebewie awiabere dwumadi no.

Wɔ Memeneda anɔpa dwumadi no ase no, wɔbɛma Yehowa Adansefo asuafoyɛ adwuma no ho ɔkasa a ɛtoatoa so abiɛsa, “Nnipa a Yɛbɛboa Wɔn Ma Wɔafa Nkwa Kwan no So,” “Nkurɔfo a Yɛbɛto Wɔn no Ho Nsɛnnennen,” ne “Nea Kristo Ahyɛ Nyinaa a Yɛbɛkyerɛkyerɛ Asuafo No.” Wɔbɛyɛ nhyehyɛe ma wɔabɔ asuafo foforo asu wɔ anɔpa dwumadi no awiei.

Memeneda awia kasa a edi kan, “Daa Nkwa Anidaso a Yɛde Bɛsom” no hyɛ mpaebɔ mu a yebefi asusuw nea enti a yɛsom Onyankopɔn ho no ho nkuran. Ɔkasa horow “‘Nnipa Mu Akyɛde’ a Wɔkyerɛkyerɛ Onyankopɔn Kwan no Ho Anisɔ a Yɛbɛkyerɛ” ne “Nipasu—Yi Dedaw no na Hyɛ Foforo No,” de Efesofo ti 4 no nkyekyem biara mu nkyerɛkyerɛmu a emu da hɔ bɛma. Afei, wɔde Kyerɛwnsɛm mu afotu a etu mpɔn bɛma wɔ ɔkasa a ɛne sɛ, “Twe Wo Ho Fi Wiase Nkekae Ho” ne ɔkasa a wɔakyekyem abiɛsa “Mmofra—Momfa Onyankopɔn Kwan So,” no mu. Wɔde ɔkasa a ɛne sɛ, “Ɔbɔadeɛ No—Ne Nipasu ne N’akwan” na ebewie awia dwumadi no.

Wɔbɛma ɔkasa a wɔakyekyem abiɛsa a ebesusuw Bible nhoma Hesekiel no atiri a etwa to no ne sɛnea emu nkɔmhyɛ nya mmamu no ho wɔ Kwasida anɔpa dwumadi no mu. Nea wɔde bewie anɔpa dwumadi no ne drama a wɔhyɛ tete ntade wom a egyina Hebrifo mmofra baasa no nokwaredi so. Nhyiam no fã titiriw ne baguam ɔkasa a n’asɛmti ne “Ɔkwan Biako Pɛ a Wɔfa So Kɔ Daa Nkwa Mu” a wɔbɛma no awia no.

Akyinnye biara nni ho sɛ ba a wobɛba nnansa no nyinaa no bɛhyɛ wo den honhom mu. Yɛde anigye hwɛ wo kwan sɛ wobɛba nhyiam no nyinaa bi, a nokwarem no, wɔrennye wo hwee wɔ emu biara ase. Sɛnea ɛbɛyɛ a wubehu baabi a ɛbɛn wo pɛɛ no, kɔ Yehowa Adansefo Ahenni Asa a ɛwɔ baabi a wote hɔ no, anaasɛ kyerɛw wɔn a wotintim nsɛmma nhoma yi.