Wobɛkɔ Bi?

Afe a etwaam no, nnipa bɛboro 8,700,000 na wɔkɔɔ Yehowa Adansefo “Ayeyifo a Wɔwɔ Anigye” Ɔmantam Nhyiam no wɔ wiase nyinaa. Wobɛkɔ “Onyankopɔn Asomdwoe Ho Asomafo” Ɔmantam Nhyiam Horow no biako ase? Yɛde anigye to nsa frɛ wo.

Wɔ mmeae a wɔbɛyɛ nhyiam no mu dodow no ara no, wɔde nnwom befi dwumadi no ase Fida anɔpa 9:30. Wɔbɛma ɔkasa a ɛhyɛ nkuran, “Dɛn na Onyankopɔn Hwehwɛ Fi Yɛn Hɔ?” wɔ nhyiam no fã a edi kan no mu. Wɔde nsɛm a yebetumi de adi dwuma de aboa nnipa ɔpepem foforo pii ma wɔayɛ nea Onyankopɔn hwehwɛ bɛka eyi ho.

Ɔkasa a wɔbɛma no awia, “Afoforo a Yɛbɛboa Wɔn Ma Wɔasua Onyankopɔn Ahwehwɛde Ahorow” besiesie nhyiamfo no ma wɔanya asuafoyɛ adwuma mu kyɛfa wɔ ɔkwan a etu mpɔn so. Ɛno akyi no, ɔkasa a wɔakyekyem a ɛwɔ afã abien a wɔato din, “Hwɛ Yiye Wɔ Anigyede mu Mfiri a Ahintaw Ho” bɛbɔ kɔkɔ wɔ adaemone mfiri a ɛsɛ sɛ yɛkwati ho. Wɔde ɔkasa a ɛho hia, “Kura Nokware a Onyankopɔn Asɛm Yɛ Mu Pintinn” bewie Fida dwumadi no.

Wɔde ɔkasa a wɔakyekyem a ɛwɔ afã abiɛsa a wɔato din, “Asomafo a Wɔde Asomdwoe Ho Asɛmpa Ba” besi hia a asuafoyɛ adwuma ho hia so dua wɔ Memeneda anɔpa dwumadi no mu. Dwumadi no fã a edi akyiri bɛfa ahosohyira ne asubɔ ho, na wɔn a wɔyɛ foforo asubɔ bedi ɛno akyi.

Memeneda awia ɔkasa, “Susuw Yehowa Adwene Wɔ Nsɛm Ho Ho” bebua nsɛmmisa pii a ɛho nsɛm asɔre nnansa yi. Wubetie ɔkasa a wɔakyekyem a ɛwɔ afã abien a ɛka koma a wɔato din, “Asomdwoe Nyankopɔn no Dwen Wo Ho.” Afei yebenya biribi soronko wɔ ɔkasa a ɛde ɔfã no dwumadi bɛba awiei, “Ma Onyankopɔn Asomdwoe Ntra W’abusua Mu,” no mu.

Ɔkasa a wɔakyekyem a ɛwɔ afã abiɛsa a wɔato din, “Nokware Asomafo a Wobehu Wɔn” a wɔbɛma Kwasida anɔpa no nam Bible mu adiyifo nhwɛso horow a ɛbɛtwe adwene asi so no so besi nhyiam no asɛmti no so dua. Wɔde drama a wɔhyɛ tete ntade a ɛbɛda Ɔtemmufo Gideon kyerɛwtohɔ a ɛwɔ Bible mu no mu asuade a mfaso wɔ so adi na ebewie anɔpa dwumadi no.—Atemmufo 6:11–8:28.

Wɔbɛma baguam ɔkasa a n’asɛmti ne “Nokware Asomdwoe Anya Aba!—Efi He?” wɔ nhyiam no fã a edi akyiri no mu wɔ Kwasida awia. Awiei koraa no, wɔde ɔkasa a ɛka koma “Yɛn Anim a Yɛbɛkɔ sɛ Onyankopɔn Asomdwoe Ho Asomafo” bewie nhyiam no.

Esiane sɛ wɔbɛyɛ nhyiam ahorow 52 wɔ Afrika Atɔe fam aman a ɛne Benin, Burkina Faso, Cote d’Ivoire, Ghana, Niger, Togo, ne afoforo pii wɔ Nigeria nti, ɛda adi sɛ wɔbɛyɛ bi a ɛbɛn wo pɛɛ. Hu Yehowa Adansefo a wɔwɔ wo mpɔtam hɔ na wɔnkyerɛ wo bere ne beae a wɔbɛyɛ nhyiam a ɛbɛn wo pɛɛ no. June 8 Nyan! nso de mmeae a wɔbɛyɛ nhyiam wɔ saa aman yi mu no address mae.