Ne Gyidi Hyɛ Afoforo Nkuran

BERE a wɔwoo Silvia wɔ December 1992 mu no, na ɛte sɛ nea abeawa no te apɔw paa. Bere a Silvia dii mfe abien no, wohui sɛ wanya yare bi a wɔko a ɛnkɔ a ɛma ɛyɛ den sɛ ɔbɛhome yiye na ɛma ɛyɛ den sɛ ne nsono bɛyɛ aduan a odi ho adwuma yiye. Nea ɛbɛyɛ na Silvia asuso ne yare no ano no, ɔmemene nnuru mmiako mmiako 36 da biara, ɔtwe aduru bi kɔ ne mu na womiamia no twetwe no. Esiane sɛ n’ahurututu tumi fa mframa a ɔhome no mu ɔha mu 25 pɛ nti, ɛsɛ sɛ ɔde toa bi a mframa pa wom hyɛ ne ho, sɛ ɔrepue mpo a, ɛsɛ sɛ ɔde hyɛ ne ho kɔ.

Silvia maame Teresa ka sɛ: “Sɛnea Silvia tumi gyina yare yi ano no yɛ nwonwa paa. Esiane Kyerɛwnsɛm mu nimdeɛ a ɔwɔ nti, ne gyidi yɛ den. Ne gyidi yi boa no ma ogyina n’awerɛhow ne n’ahoyeraw ano. Ɔkae wiase foforo a Yehowa ahyɛ ho bɔ sɛ ɔbɛsa ayarefo nyinaa yare no bere biara.” (Adiyisɛm 21:4) Ɛtɔ mmere bi na Silvia abusua no abam bu a, sɛnea osi serew no hyɛ wɔn nkuran. Ɔka kyerɛ n’awofo ne ne nuabarima sɛ: “Wiase foforo no mu asetra bɛma yɛn were afi amane a yɛrehu no mprempren yi no nyinaa.”

Silvia ka Onyankopɔn Asɛm mu asɛmpa kyerɛ afoforo daa, na nkurɔfo a ɔne wɔn kasa no hu sɛ ɔwɔ anigye. Kristofo asafo a ɔwom wɔ Canary Islands no mufo nso ani gye ne mmuae a ɔma ne ne ho ɔde hyɛ asafo no dwumadi mu no ho paa. Sɛ wɔpɔn asafo nhyiam biara a, Silvia nkɔ fie ntɛm, na ɔne ne nuanom Kristofo mmarima ne mmea bɔ nkɔmmɔ. Sɛnea ɔpɛ nnipa ne sɛnea n’anim tew no ama asafo no mufo nyinaa pɛ n’asɛm.

Silvia papa Antonio ka sɛ: “Yɛasua biribi a ɛho hia paa afi Silvia hɔ. Sɛ yɛwɔ ɔhaw mpo a, nkwa yɛ akyɛde a efi Onyankopɔn hɔ na ɛsɛ sɛ yɛma yɛn ani sɔ.” Onyankopɔn asomfo nyinaa, mmofra ne mpanyin a Silvia ka ho de anigye rehwɛ bere a “ɔmamfo no mu bi nnkɛse dɛ, Meyar” no kwan.—Yesaia 33:24, Fante Bible.

[Mfonini wɔ kratafa 31]

Silvia maame de toa a Silvia mframa pa wom sɛn ne ho bere a Silvia kenkan Bible kyerɛ obi