Asemmisa Afa

● Bere bɛn na ɛsɛ sɛ obi a ɔyɛ ɔboafo hwɛ Asafo Nhoma Adesua so?

Ɔboafo no betumi ahwɛ adesua no so bere a adesua sohwɛfo a wɔapaw no no nni hɔ. Ɛrenyɛ nea ɛfata sɛ ɔbɛhwɛ nhoma adesua no so nnakoro nnakoro bi sɛ nea ɔde resua yɛ. Adesua sohwɛfo a wɔde ahyɛ ne nsa no na ɛyɛ n’asɛyɛde sɛ ɔkyerɛkyerɛ kuw no na, sɛ ɔwɔ hɔ a, ɛsɛ sɛ ɔyɛ saa gye sɛ tebea horow bi a wɔyɛ ho hwee a ɛnyɛ yiye. (Rom. 12:7) Mpɛn pii mpanyimfo na wɔpaw wɔn sɛ nhoma adesua so ahwɛfo efisɛ ɔkyerɛkyerɛ yɛ asɛyɛde a emu yɛ duru. (Yak. 3:1) Ɛnyɛ sɛ wobebisa asɛm no na wɔafrɛ nkurɔfo ma wɔama mmuae ara kwa. Nhumu ne osuahu a honhom mu mpanyimfo wɔ no ho betumi aba wɔn a wɔwɔ kuw no mu mfaso yiye na aboa wɔn ma wɔanya ntease atumi akyerɛkyerɛ nsɛm mu na wɔde nokware a wɔresua no adi dwuma wɔ wɔn asetra mu. Ɛwom, wobetumi de saa asɛyɛde yi ahyɛ asafo mu asomfo a wɔn ho akokwaw yiye nsa, sɛ mpanyimfo a wɔfata nni hɔ a.

Obi a ɔyɛ ɔboafo betumi asua akwan a etu mpɔn a wɔfa so kyerɛkyerɛ denam sɛnea nhoma adesua sohwɛfo a wɔapaw no no yɛ no a ɔbɛhwɛ no yiye no so. Obetumi anya ɔkyerɛkyerɛ ho nimdeɛ denam ahosiesie pa ne Teokrase Ɔsom Sukuu kasa horow a ɔbɛma, afã a obenya wɔ Ɔsom Nhyiam mu ne denam ofie Bible adesua a ɔne ankorankoro ne mmusua bɛyɛ no so. Denam saa yɛ so no, ɔbɛyɛ obi a ɛne ho bɛba anuanom mfaso bere a wɔafrɛ no sɛ onsi adesua sohwɛfo a wɔapaw no no ananmu no. Afei nso, aboafo no betumi aboa kɛse wɔ kuw no mufo a wɔboa wɔn ano na wodi wɔn anim wɔ asɛnka adwuma mu no mu bere a adesua sohwɛfo no antumi anyɛ saa no.