Hyɛ Afoforo Nkuran Ma Wɔnkenkan Na Wonsua Onyankopɔn Asɛm
1 Wɔ nhoma a wɔakyerɛw nyinaa mu no, Bible no nkutoo na ɛde akwankyerɛ a enni huammɔ ma adesamma wɔ sɛnea wobetumi agyina asetra mu nsɛnnennen ano no ho. (Yer. 10:23) Nea ɛka ɛno ho no, ɛma daakye ho nokware anidaso nso. Ɛyɛ Onyankopɔn akyɛde a ɔde ama onipa. Ɛwom sɛ Bible no na wɔtɔ no kɛse bere nyinaa de, nanso nhwehwɛmu kyerɛ sɛ wɔn a wɔwɔ bi no mu kakraa bi na wogye bere de kenkan. So yebetumi aboa nnipa pii ma wɔanya Onyankopɔn Asɛm a wɔakyerɛw no mu mfaso?
2 Ɛmfa ho sɛ ɛhe na nkurɔfo te wɔ asase so no, wohyia nsɛnnennen koro no ara. Nsemmisa ahorow a ɛkyere adwene hia mmuae, na Bible no nkutoo na ɛde mmuae a ɛteɛ no ma. Dɛn nti na yɛwɔ ha? Dɛn nti na nkurɔfo nyinyin na wowuwu? Ɛhe na yɛrekɔ? Dɛn nti na amumɔyɛ rekɔ anim? Dɛn nti na Onyankopɔn ma nsɛmmɔnedi ho kwan? Nneɛma bo a ɛkɔ soro, adan a wonnya ne ɔkɔm, ne nea ɛkeka ho no ano aduru bɛn na ɛwɔ hɔ? Ɛsɛ sɛ yɛkenkan na yesua Bible no ansa na yɛanya eyinom ne nsemmisa afoforo ho mmuae a akomatɔyam wom.
SƐNEA YƐBƐHYƐ AFOFORO NKURAN
3 Nea ɛbɛyɛ na yɛahyɛ afoforo nkuran ma wɔakenkan na wɔasua Onyankopɔn Asɛm no, ɛho hia sɛ yɛma wonya ahotoso sɛ Bible no fi Onyankopɔn home mu. (2 Tim. 3:16) Ebia yebetumi ayɛ eyi denam nsɛm a ɛwɔ asɛmti “Bible” a ɛwɔ Reasoning nhoma no mu no afã bi a yɛbɛpaw de adi dwuma no so. Nkratafa 60 kosi 64 de adanse a edi mũ ahorow pii ma sɛ Bible no yɛ Onyankopɔn Asɛm a efi honhom mu.
4 Pii fii ase kenkan Bible no na afei wogyaee. Dɛn ntia? Ebia efisɛ wɔn abaw mu bui sɛ wɔnte nea wɔkenkan no ase. Ebia yebetumi aboa wɔn a wɔte saa no denam New World Translation of the Holy Scriptures no a yɛbɛhyɛ wɔn nkuran ma wɔakenkan no so. Wɔatintim saa nnɛyi kasa mu nkyerɛase a ɛyɛ mmerɛw sɛ wɔbɛkenkan yi bɛyɛ mfuamfua 50,000,000 wɔ kasa akron mu a ɛma ɛyɛ afeha 20 yi mu nkyerɛase atitiriw a wɔde di dwuma nnɛ no mu biako.
5 Bere biara a yebenya wɔn a wɔkyerɛ Bible akenkan ho anigye no, ɛsɛ sɛ yɛka sɛ yɛne wɔn besua ade. Ɛsɛ sɛ yɛkyerɛ wɔn a wɔwɔ New World Translation no bi no ho anigye titiriw. Sɛnea wosii so dua wɔ November Yɛn Ahenni Som no mu no, yɛpɛ sɛ yɛyɛ Bible adesua a enya nkɔso. (Mat. 28:19, 20) Eyi kyerɛ sɛ yɛbɛbɔ mmɔden adu osuani no komam sɛnea ɛbɛyɛ a nea osua no benya n’abrabɔ so nkɛntɛnso na abua ne Bible mu nsemmisa ahorow.
BIBLE NO NE “KINGDOM COME” NHOMA NO A YƐDE BƐMA
6 December mu no, yɛde New World Translation of the Holy Scriptures ne nhoma “Let Your Kingdom Come” no na ɛbɛma wɔ yɛn asɛnka mu. Ɛdenam saa nhoma abien yi a yɛde bɛma anigye so so no, ebia yebetumi ahyɛ nnipa pii nkuran ma wɔakenkan na wɔasua Onyankopɔn Asɛm no. Sɛ́ mprempren Nkɔmmɔbɔ Asɛmti no nnianim no, ebia wobɛpɛ sɛ wofa nnianim asɛm a ɛto so abien a ɛwɔ “Bible/God” ase wɔ Reasoning nhoma no kratafa 10 no de di dwuma. Anaasɛ ebia nnianim asɛm a edi kan wɔ “Family/Children” ase wɔ kratafa 11 no a wobɛfa no bɛyɛ nea ɛfata ma wo ne w’asasesin no. Saa nnianim nsɛm abien yi a wode besiesie wo ho no besiesie wo ma woaboa nnipa pii December mu.
7 Bere a yɛbɛn nneɛma nhyehyɛe yi awiei kɛse no. akyinnye biara nni ho sɛ ankorankoro pii a wɔwɔ nsemmisa ahorow bɛhwehwɛ mmuae a gye sɛ Bible no mu nkutoo na wobenya afi. Ɛmmra sɛ yɛde nsi de nea wohia no bɛma wɔn. Momma yɛnkɔ so nhyɛ afoforo nkuran mma wɔnkenkan na wonsua Onyankopɔn Asɛm no. New World Translation ne “Kingdom Come” nhoma no a yɛde rema December mu no bue ɔkwan fɛfɛ ma yɛn sɛ yɛbɛyɛ eyi.