Fa Ɔwɛn-Aban No Bɔ Asɛmpa no Dawuru
1 Ɔwɛn-Aban no yɛ soronko ankasa efisɛ ekura asɛmpa. Nea ɛne eyi bɔ abira no, nsɛm a enye a ɛma nkurɔfo botow na ɛwɔ wiase no nhoma ahorow no mu pii mu. Ɔkwan bɛn so na yebetumi ada no adi akyerɛ afoforo sɛ Ɔwɛn-Aban no yɛ soronko, na ekura nkrasɛm a ɛma denhyɛ ankasa?
2 Yebetumi atwe adwene asi “Ɔwɛn-Aban No Atirimpɔw” a ɛwɔ nsɛmma nhoma no kratafa 2 no so. Da no adi sɛ n’atirimpɔw ne sɛ ɛbɛkamfo Yehowa sɛ Amansan Hene, ɛbɛhwɛ nsɛm a esisi wɔ wiase a ɛma Bible nkɔmhyɛ nya mmamu, ɛde awerɛkyekye nkrasɛm bɛma wɔn a wɔhyɛ wɔn so, na ahyɛ gyidi wɔ Onyankopɔn nsiesiei ma nkwagye no mu den.
3 So nsɛm a yɛka fa Ɔwɛn-Aban no ho no da adwene a ɛte sɛɛ adi wɔ ɔkwan a ɛma wogye di so? Ɛnsɛ sɛ nea yɛka no yɛ anigyesɛm bi kɛkɛ a ɛkanyan bere tiaa mu anigye; ɛsɛ sɛ ɛyɛ nea aba wom, na ɛkanyan ahotoso a ɛma wonya ɔpɛ sɛ wobesua pii.
4 Ahosiesie ho Hia: Ehia sɛ yɛde boasetɔ kenkan nsɛmma nhoma no mu biara, na yegyina yɛn asasesin no so hwehwɛ emu nsɛm ahorow no mu. Kyerɛw nsɛm a ɛwɔ asɛm no mu a yebebue akenkan no ma yɛn ntease yɛ kɛse. Eyi betumi ama anisɔ a yɛwɔ ma nokware no mu ayɛ den, na akanyan yɛn ma yɛaka ho asɛm akyerɛ afoforo. Sɛ nokware no nni yɛn komam a, nkuranhyɛ kakraa bi na yebenya de akasa.
5 Anigye a obi da no adi no na ɛkyerɛ nea yɛde bɛma no. Nanso esiane sɛ Ɔwɛn-Aban no kura nsɛmti ahorow pii nti, ebia yebetumi de biako anaa abien mu nsɛm akyerɛ ofiewura no de akanyan n’anigye wɔ ne kra ho.
6 Sɛ wokenkan Ɔwɛn-Aban a aba foforo no mu nsɛm a, bɔ mmɔden sɛ wobɛkae nkɔmmɔ ahorow a wo ne afiewuranom abɔ atwam a nsɛmti yi kanyan anigye wom no. Bɔ mmɔden sɛ wode saa nsɛmma nhoma no bɛsan akɔ hɔ ma moatoa nkɔmmɔbɔ no so.
7 Yennim bere tenten a yɛde bɛbɔ asɛmpa no dawuru ne faako a yɛbɛyɛ saa akodu. Nanso, yebetumi agye adi sɛ Ɔwɛn-Aban no bedi dwuma titiriw wɔ nea yɛbɛyɛ no mu. Sɛ yɛde nsiesiei yi redi dwuma a, ɛsɛ sɛ yesuasua asomafo no wɔ nsiyɛ a wɔde “kyerɛkyerɛe, na wɔkaa [Yehowa] asɛmpa no” mu.—Aso. 15:35.