Wuhu Sɛ Mmoa Ho Hia?
1 Wɔka Yehowa ho asɛm sɛ ɔyɛ Ɔboafo ne Guankɔbea. Yenim sɛ yebetumi akɔ n’anim wɔ ahohia mu, na ɔbɛboa yɛn. (Dw. 18:2; 46:1) Yebetumi asua saa mmɔborohunu yi bere a yehu sɛ afoforo hia mmoa na yɛboa wɔn no.
2 Dɛn na ɛkanyan obi ma ofi ne pɛ mu boa onipa foforo? Nnipa dodow no ara gye eyi tom sɛ ɛyɛ adeyɛ a ɛkyerɛ ɔdɔ ne tema. Nokwarem no, Onyankopɔn Asɛm hyɛ ho nkuran. (Rom. 15:1) Paulo hyɛɛ yɛn nkuran sɛ ‘mma obiara nnhwɛ ne nko ade, na mmom ɔnhwɛ ne mfɛfo de bi.’—Fil. 2:4.
3 Eyi yɛ ade a yɛn nyinaa betumi anya ne yɛ mu anigye. (Aso. 20:35) Paulo de aberante Timoteo yɛɛ nhwɛso sɛ ɔyɛ obi a na ne nuanom ‘ho asɛm hia no.’ (Fil. 2:20) Eye sɛ yɛwɔ mmofra a wɔwɔ su a ɛte saa ara pii wɔ asafo ahorow no mu nnɛ. Nanso, sɛ́ yɛyɛ mmofra anaa mpanyin no, nneɛma pii wɔ hɔ a yebetumi ayɛ, sɛ yehu sɛ mmoa ho hia a.
4 Woate nka pɛn sɛ ebinom wɔ ahiade ahorow a wobetumi adi ho dwuma yiye? Ebia na onua anaa onuawa bi kɔdaa ayaresabea, na nnipa kakraa bi na wɔkɔsraa no; anaasɛ obi yare daa hɔ, nanso na onni obi a ɔbɛsomasoma no anaa ɔbɛboa no wɔ ofie nnwuma mu. Yesu bu Yehowa asomfo sɛ abusua mufo a wofi nokwaredi mu dwen wɔn ho wɔn ho. (Marko 3:33-35) Ɔkyerɛe wɔ nguanten ne mpapo ho bɛ no mu sɛ wɔn a wogyinaa Ɔhene no nsa nifa so a wonyaa n’anim dom no nam mmoa a wɔde maa Ɔhene no nuanom so na ɛyɛɛ saa.—Mat. 25:40.
5 Mɛyɛ Dɛn Atumi Aboa? Dɛn na yebetumi ayɛ de mmoa ama bere a yehu pefee sɛ ɛho hia no? Yebetumi adi kan ayɛ mmoa wɔ ɔkwan bi so? Ebia na nkwakoraa ne mmerewa bi wɔ hɔ a wohia nkuranhyɛ, nanso wonni ayɔnkofo a wɔbɛn wɔn a wɔbɛboa wɔn. Ebia mmofra bi wɔ hɔ a wohia mmoa. Ebia abusua bi a wɔakyerɛ anigye foforo a wɔwɔ mma pii bɛba Ahenni Asa so bere a ɔdawurubɔfo a ɔne wɔn sua ade no nni hɔ. Ebia wɔn ani begye ho sɛ obi befi ne pɛ mu aso mmofra no mu bi ama wɔn.
6 Bere a yɛkɔ so nyin wɔ ɔdɔ a yɛwɔ ma nokware no ne Yehowa ahyehyɛde no mu no, yenyin wɔ anisɔ ne dwen a yebedwen afoforo a wɔwɔ asafo no mu ho nso mu. Paulo hyɛɛ yɛn nkuran sɛ yɛntrɛw yɛn mmoa mu wɔ eyi mu. (2 Kor. 6:11-13) Yesu sii so dua sɛ ɔdɔ a yebeyi no adi akyerɛ yɛn ho yɛn ho no ne ɔkwan titiriw a yɛnam so kyerɛ sɛ yɛyɛ n’akyidifo ampa.—Yoh. 13:35.
7 Enti sɛ yehu sɛ mmoa ho hia a, ɛsɛ sɛ nokware dɔ a yɛwɔ ma yɛn nuanom ne asafo no ka yɛn ma yefi yɛn pɛ mu fa ɔkwan biara a yebetumi so boa. (Gal. 6:9, 10) Afoforo ho a yedwen no saa no ka yɛn bom wɔ ɔdɔ ne biakoyɛ mu. (1 Kor. 10:24) Yɛnam saa kwan yi so yɛ yɛn fam de de boa ma wodi asafo no mu ahiade bi ho dwuma.