Sankɔhwɛ a Edi Mu Gye Nkyerɛkyerɛ a Etu Mpɔn
1 Sankɔhwɛ yɛ yɛn asɛnka adwuma no fã titiriw a ɛyɛ anigye. Dɛn nti na ɛsɛ sɛ yɛde nsi san kɔ anigyefo nkyɛn? Yɛda Yehowa din adi na yɛnam asuafoyɛ adwuma yi so di no ni, na yɛboa wɔn a wosuro Nyankopɔn no ma wohu nkwa kwan no. (2 Kor. 2:17–3:3) Ɛsɛ sɛ hu a yehu sɛ Yehowa din a yɛbɛtew ho ne afoforo nkwa ho asɛm wom no ka yɛn ma yesiesie yɛn ho ansa na yɛasan akɔ wɔn nkyɛn.
2 Ɔkyerɛkyerɛfo pa bɛboa osuani no ma wagyina fapem a watow dedaw no so. Sɛnea sukuu kyerɛkyerɛfo gyina nimdeɛ a sukuuni nya bere ne bere mu so no, saara na ɛsɛ sɛ yɛde nsɛm foforo a ɛfa asɛm koro no ara ho kɔyɛ sankɔhwɛ bere nyinaa. Eyi ma ɔkɔ so susuw nsɛm ho na ne nsusuwii nya nkɔanim.
3 Sɛ wosan kɔ hɔ bere a wode “brochure,” “So Onyankopɔn Dwen Yɛn Ho Ampa?” mae akyi no a, ebia wubehu sɛ nea edi so yi bɛboa:
◼ “Wɔ me nsrahwɛ a edi kan no mu no, na yɛresusuw ‘nna a edi akyiri’ a wɔabɔ din wɔ Bible mu no ne nea ɛkyerɛ ma yɛn no ho. Ebia sɛnea ɛyɛe a yehu sɛ yɛte nna a edi akyiri mu no bɛyɛ wo nwonwa. (2 Tim. 3:1) Ná Yesu asuafo no ho pere wɔn sɛ wobenya saa asemmisa no ho mmuae. [Kenkan Mateo 24:3.] Wɔ Yesu mmuae mu no, ɔkaa tebea a yehu sɛ atwa yɛn ho ahyia nnɛ no ho asɛm. Nea ɛka eyinom ho ne ahokyere ne basabasayɛ a yenhuu bi da.” Twe adwene si sɛnkyerɛnne a wɔaka ho asɛm wɔ afã 3 ne 4 wɔ kratafa 19 no ho nneɛma so. Sɛ ɔkyerɛ ho anigye a, twe adwene si sɛnkyerɛnne a ɛwɔ afã 5 kosi 8 wɔ kratafa 20 no ho nneɛma foforo so. Kyerɛ no sɛ wobɛsan aba abebua nsɛm a wɔabisa wɔ brochure no anim no.
4 Sɛ worekɔyɛ sankɔhwɛ wɔ anigye a wɔkyerɛe wɔ “brochure,” “Dɛn Ne Asetra Atirimpɔw—Wobɛyɛ Dɛn Ahu?” no ho mu a, wobɛka sɛ:
◼ “M’ani abere sɛ yɛbɛsan aba yɛn nkɔmmɔbɔ a ɛfa yɛn asetra mu atirimpɔw ho no so. Misusuw sɛ yɛn nyinaa gye tom sɛ Onyankopɔn pɛe sɛ yɛtra asase yi so wɔ anigye ne asomdwoe mu sen sɛ anka yɛbɛtra basabasayɛ a yehu no nnɛ no mu. Wususuw sɛ ɔbɛma ne bɔhyɛ abam?” Ma ommua. Kenkan Yesaia 55:11, na afei munsusuw asɛm a ɛwɔ afã 25 kosi 27 wɔ kratafa 30 no ho. Kyerɛ no sɛ Bible a obi besua ne ɔkwan pa a ɛsen biara a ɔbɛfa so ahu asetra mu atirimpɔw a ɛsom bo.
5 Sɛ worekɔyɛ sankɔhwɛ wɔ anigye a wɔakyerɛ dedaw wɔ “brochure,” “Nya Asetra mu Anigye Wɔ Asase so Daa!” no ho mu a, wubetumi de akyerɛ bio na woaka sɛ:
◼ “Yɛkaa wiase fɛfɛ a wɔatwa ho mfonini wɔ brochure yi akyi no ho asɛm. Mepɛ sɛ mekyerɛ nea enti a Yesu Kristo mu gyidi ho hia paa ma nnipa a wɔpɛ sɛ wɔtra hɔ no.” Twe adwene kɔ mfonini a ɛto so 41 no so, na kenkan Yesaia 9:6. Twe adwene kɔ mfonini a ɛto so 62 no so, na kenkan Yohane 3:16, na si hia a osetie ho hia so dua. Kyerɛkyerɛ mu sɛ Yehowa Adansefo reboa nkurɔfo ma wɔasua sɛnea wɔbɛkyerɛ gyidi denam Bible no a wobesua na wɔabɔ mmɔden sɛ wɔde emu afotu bɛtra ase no so.
6 Wɔ sankɔhwɛ biara akyi no, susuw nsrahwɛ no ho, a wo botae ne sɛ wopɛ sɛ wo mpɔntu nya nkɔanim. Bisa wo ho sɛ: Ná mewɔ biribi pɔtee wɔ m’adwene mu a mɛka? Metwee adwene kɔɔ Bible no so? Migyinaa fapem a metoe wɔ da a edi kan a mekɔɔ hɔ no so kaa m’asɛm? Mekaa me nsɛm no sɛnea ɛbɛkɔ akowie Bible adesua mu? Mmuae a ɛfata no ma wunya awerɛhyem sɛ worebɔ mmɔden ayɛ Onyankopɔn Asɛm no ho ɔkyerɛkyerɛfo pa.