Asɛmmisa Afã
◼ Dɛn nti na mfaso wɔ so sɛ atiefo bebue kyerɛw nsɛm no bere a ɔkasafo no akyerɛ sɛ wɔnyɛ saa no?
Asɛm a wɔresusuw ho, ne sɛ ebia ɔkasa no hwehwɛ sɛ wosusuw Onyankopɔn Asɛm no fã bi nkyekyem ho mmiako mmiako no na ɛbɛkyerɛ mpɛn dodow a ɛsɛ sɛ ɔkasafo no ma atiefo bue kyerɛw nsɛm no.
Ɛho hia sɛ yehu sɛ atirimpɔw biako nti a yebue kyerɛwsɛm bi ne sɛ ɛbɛma yɛahu sɛ nea wɔreka no wɔ Bible mu. (Aso. 17:11) Atirimpɔw foforo nso ne sɛ yebenya Kyerɛwnsɛm mu adanse a edi mu paa a ɛfoa nea wɔreka no so sɛnea ɛbɛyɛ a ɛbɛhyɛ yɛn nyinaa gyidi den. Nea Bible ka ankasa a yehu bere a wɔrekenkan kyerɛwsɛm titiriw bi no bɛma yɛate asɛm no ase yiye. Sɛ yɛde kyerɛw nsɛm a yɛbɛkenkan no to nkyɛn a, kyerɛwtohɔ a yɛbɛyɛ na yɛadi nea wɔreka no akyi ho hia.
Ɛwom sɛ krataa a wɔhwɛ so ma ɔkasa a Asafo ti no de ama no twe adwene si kyerɛw nsɛm pii so de, nanso wɔde eyinom ama na aboa ɔkasafo no bere a ɔresiesie ne kasa no. Ebetumi ama wahu nsɛm no fibea na aboa no ma wama Kyerɛwnsɛm mu nnyinasosɛm titiriw atra n’adwenem na wate nsɛm a ɔbɛka no ase yiye. Ɔkasafo no hu kyerɛw nsɛm a ɛbɛboa no ma wahyehyɛ ɔkasa no, na ɔto nsa frɛ atiefo no ma wodi n’akyi bere a ɔkenkan kyerɛw nsɛm a ɛtete saa no kyerɛkyerɛ mu no. Ɔkasafo no betumi aka kyerɛw nsɛm foforo a ɛfoa asɛm no so ho asɛm akyerɛkyerɛ mu nanso, ɛha yi no, ɛho nhia sɛ ɔkwan biara so no ɛsɛ sɛ atiefo no bue.
Sɛ ɛsɛ sɛ ɔkasafo no kenkan kyerɛw nsɛm bi a, ɛsɛ sɛ ɔkenkan fi Bible no mu tẽẽ na ɛnyɛ nea watintim afi kɔmputa so. Sɛ ɔkasafo no to nsa frɛ atiefo no sɛ wonni n’akyi wɔ akenkan no mu a, ɛsɛ sɛ ɔka Bible nhoma no, eti, ne nkyekyem ko no ma wɔte no yiye. Ɔnam gyina a ogyina bisa asɛm anaasɛ ka a ɔka biribi tiawa de kyerɛ nea enti a wɔkenkan kyerɛwsɛm no so ma atiefo nya bere de bue kyerɛwsɛm no. Kyerɛwsɛm a ɔrebɛkenkan a ɔbɛsan abɔ din no nso bɛma atiefo no ahu baabi a ɛwɔ. Nanso, ɛnyɛ papa sɛ ɔbɛkyerɛ kratafa ko a ɛwɔ esiane sɛ ɛsono eyinom biara wɔ Bible ko a atiefo de redi dwuma no mu nti. Kyerɛwnsɛm no a atiefo bebue bere a ɔkasafo no akyerɛ sɛ wɔnyɛ saa no bɛboa wɔn ma wɔahu tumi a Onyankopɔn Asɛm no wɔ bere a yɛkyerɛkyerɛ mu wɔ ɔkasa bi mu no.—Heb. 4:12.