Wɔahyehyɛ Yɛn Ma ‘Yɛayɛ Ade Nyinaa Fɛfɛɛfɛ Wɔanowɔano’
1 Sɛ ɔmantam nhyiam bi bɛkɔ yiye a, nneɛma pii ho behia. Nhyiam so ahwɛfo no yɛ beae pa a yebehyiam ne dabere ho nhyehyɛe. Ankorankoro ne mmusua yɛ wɔn akwantu ne dabere ho nhyehyɛe. Asafo ahorow hwɛ ma emufo a wɔatu wɔn ho ama no kɔyɛ adwuma wɔ dwumadibea ahorow a ehia ama nhyiam no akɔ so no. Botae no ne sɛ yɛbɛyɛ “ade nyinaa fɛfɛɛfɛ wɔ ano wɔ ano.”—1 Kor. 14:40.
2 Bere a woyɛ nhyehyɛe ma ɛne nhyiam so ahwɛfo nhyehyɛe ahyia no, ma ɛntra w’adwenem sɛ wɔde asram—ɛtɔ mmere bi a, mfe mpo—na ɛyɛ ahoboa. Anuanom ɔhaha pii gye bere pii na wɔde atoto nneɛma. Nea ɛka eyi ho ne mmeae a wobegye atua ho ka, nnwinnade a wɔbɛboaboa ano, ne adwumayɛfo a wɔbɛhwehwɛ. Ahoboa a wodi kan yɛ yi ma yɛn nyinaa nya honhom fam nhyira. Dɛn na yebetumi ayɛ de aboa?
3 Gye Dabere Ho Nhyehyɛe Tom: Ɛho hia sɛ yɛn nyinaa begye nhyiam ho nhyehyɛe ahorow no atom. Eyi te saa titiriw bere a yɛyɛ yɛn dabere ho nhyehyɛe no. Nokwarem no, wohia adan ɔhaha pii ma nhyiam biara. Yɛn nuanom dodow no ara ho nso so enti adan a ne bo nyɛ den na wobetumi atua ho ka. Yɛayɛ nhyehyɛe a edi mu na ama yɛanya adan a ne bo wɔ fam koraa. Ɛsɛ sɛ yefi ɔdɔ mu susuw afoforo ahiade ho na ‘ɛnsɛ sɛ yɛhwɛ yɛn nko ade, na mmom yɛnhwɛ yɛn mfɛfo de bi.’—Fil. 2:4.
4 Nhyiam akwankyerɛ a ɛfa dabere ho a yebedi akyi no bɛboa yɛn nyinaa. Saa akwankyerɛ ahorow yi a yebebu yɛn ani agu so no de ɔhaw a ɛho nhia bɛba. Ɔkwan bɛn so? Sɛ yedi nyansahyɛ ahorow yi akyi a, ahɔhodan ne sukuu ahorow no di kan hu adan dodow a wɔde ama ne ahɔho dodow a wobenya. Eyi boa wɔn wɔ wɔn nhyehyɛe mu na ebetumi ama wɔakɔ so ate bo no so mfe a edidi hɔ no mu. Sɛ yɛn mu pii twa ɔdan a wogye ma yɛn no mu anaasɛ yɛyɛ nhyehyɛe foforo a, eyi de ahokyere brɛ ahɔhodan ne sukuu mu mpanyimfo no ne yɛn nuanom mmarima ne mmea a ebia anka wɔpɛ dan wɔ mmeae koro no ara no. Mpanyimfo no nnyaw adan pii mma yɛn daakye, esiane sɛ wosusuw sɛ yɛrenni yɛn bɔhyɛ so nti. Hwɛ ye a eye sɛ yebedi yɛn nsɛm so, na yɛama yɛn ‘Yiw ayɛ Yiw’!—Mat. 5:37.
5 Susuw Ade Pa a Efii Mu Bae Yi Ho: Wɔ ɔmantam nhyiam bi akyi wɔ United States no, atrae sohwɛfo bi kae sɛ: “Mahu sɛ Yehowa Adansefo di nokware yiye wɔ nea wɔyɛ nyinaa mu. Dapɛn a etwaam no, minyaa wɔn mu 40 wɔ m’atrae ha, na wɔamma ɔhaw biara ansɔre. Mmom no, wɔn nkutoo ne nnipa a sɛ wɔwɔ onipa foforo bi ka wɔn ho wɔ ntamadan no mu a, wɔka kyerɛ wo. Sɛnea minim no, wɔne nnipa a wodi mũ sen biara a wubetumi ayɛ wɔn hɔho.” Sɛ wɔn a wɔde adan ma yɛn nyinaa nya osuahu a edu mũ saa a, hwɛ anigye a anka ɛbɛyɛ! Hwɛ adanse a anka ebedi!
6 Ahɔhodan bi a ɛwɔ nkorabata pii no ɔmantam panyin bi kae bere bi sɛ: “Mintumi nkae sɛ manya kuw kɛse bi a wɔyɛɛ wɔn gyidi ho nhwɛso pa kɛse sɛ Yehowa Adansefo da. Yɛwɔ anidaso sɛ mobɛsan aba.” Saa asɛm yi da no adi sɛ ɛnyɛ yɛn nko na yenya suban pa so mfaso, na mmom afoforo pii a wɔwɔ wiase a wɔhwɛ yɛn no nso.
7 Akwan Titiriw a Yebetumi Afa So Ayɛ Setie: Nneɛma nketenkete bi wɔ hɔ a yebetumi ayɛ de akyerɛ setie ama nhyiam nhyehyɛe a ɛfa ɔdan a yebegye ho no mu. (1) Nnye adan pii mmoro nea wunim sɛ wubehia. (2) Fa sika dodow a ɛsɛ sɛ wutua wɔ ɔdan no ho no mena. (3) Fa anɔpaduan ho nhyehyɛe a ebia wɔbɛyɛ ama mo sɛ ahɔho no di dwuma nyansam. (4) Kae sɛ ɔkwan a ɛfata so no, ahɔhodan wuranom ne ahɔhogyefo foforo hwɛ kwan sɛ yebedi wɔn mmara so.
8 Sɛ́ Yehowa Nyankopɔn asomfo no, yɛwɔ hokwan sɛ yɛbɛda ne su adi wɔ nea yɛyɛ nyinaa mu. Nea ɛka eyi ho ne nhyehyɛe a yɛbɛyɛ ama nhyiam ahorow a Onyankopɔn din ho wom ne kɔ a yɛbɛkɔ. Kae sɛ, ɔnyɛ “sakasakayɛ [Nyankopɔn], na mmom asomdwoe [Nyankopɔn].” (1 Kor. 14:33) Enti, momma yɛnhwɛ nhu sɛ wɔn a wɔhwɛ yɛn nyinaa behu Yehowa su yi denam nea wohu wɔ yɛn mu—yɛn nneyɛe—no so bere a yɛyɛ nhyehyɛe ma “Onyankopɔn Asɛm Akyerɛkyerɛfo” Ɔmantam Nhyiam no na yɛkɔ no. Ɛmmra sɛ nnipa komapafo a wɔhwɛ yɛn nyinaa behu sɛ wɔahyehyɛ Yehowa asafo a wɔahyiam no ‘ma wɔayɛ ade nyinaa fɛfɛɛfɛ wɔanowɔano.’—Dw. 68:26.