Ma W’anigye Wɔ Asɛnka Mu Nyɛ Kɛse
1 Asɛmpa no a yɛka mu anigye—so worenya bi wɔ w’asɛnka mu? Sɛ yɛanhwɛ yiye a, wiase bɔne a yɛte mu no betumi ama ehu aka yɛn wɔ asɛnka ho, na ama yɛahwere yɛn anigye. Asasesin a wontie yɛn wom no mu adwumayɛ nso betumi abu yɛn abam. Nneɛma bɛn na yebetumi ayɛ na ama yɛn anigye wɔ asɛnka mu ayɛ kɛse?
2 Nya Adwempa: Adwempa a yɛbɛkɔ so anya no boa ankasa. Ɔkwan biako a yɛbɛfa so ayɛ saa ne sɛ yebedwennwen hokwan soronko a yɛwɔ sɛ “Onyankopɔn adwumayɛboafo” no ho. (1 Kor. 3:9) Yesu nso ka yɛn ho wɔ adwuma yi yɛ mu. (Mat. 28:20) Ɔde abɔfo dɔm boa yɛn. (Mat. 13:41, 49) Ne saa nti, yebetumi anya awerɛhyem sɛ Onyankopɔn kyerɛ nea yɛyɛ no kwan. (Adi. 14:6, 7) Enti ɛmfa ho sɛnea ebia nnipa bɛyɛ wɔn ade wɔ yɛn adwuma no ho no, nea wɔyɛ wɔ ho wɔ soro no yɛ ade a ɛma yenya anigye kɛse!
3 Siesie Wo Ho Yiye: Ahosiesie pa nso ma yɛn anigye yɛ kɛse. Ɛnsɛ sɛ wo ho a wubesiesie ama asɛnka no yɛ adwuma kɛse. Egye simma kakraa bi pɛ na woasusuw nsɛmma nhoma a aba foforo anaasɛ nhoma a yɛde rema wɔ ɔsram no mu no mu asɛm bi a wɔka kyerɛ ho. Paw asɛm bi a wɔka kyerɛ fi Yɛn Ahenni Som no mu asɛm a ese “Nea Yɛbɛka Afa Nsɛmma Nhoma Ho” no mu. Hwɛ krataa a ɛhyɛ January 2002 Yɛn Ahenni Som mu no mu asɛm a ɛne “Asɛm a Wɔka Wɔ Asɛnka Mu a Wɔahyɛ Ho Nyansa” no mu anaasɛ hwehwɛ nnianim asɛm a etu mpɔn wɔ Reasoning nhoma no mu. Sɛ anoyi a afiewuranom taa de ma no yɛ akwanside ma wo a, siesie mmuae a ɛbɛkyerɛ sɛ wote nea wɔka no ase na twe adwene si asɛm bi a ɛkanyan anigye so. Reasoning nhoma no boa yiye wɔ eyi mu. Eyinom a yɛde bedi dwuma no bɛma yɛanya ahotoso a yehia na yɛde anigye aka asɛm no.
4 Bɔ Mpae a Emu Yɛ Den: Mpaebɔ ho hia na yɛanya daa anigye. Esiane sɛ yɛreyɛ Yehowa adwuma nti, ehia sɛ yɛsrɛ no sɛ ɔmfa ne honhom a n’aba biako ne anigye no mma yɛn. (Gal. 5:22) Yehowa bɛma yɛn ahoɔden ma yɛakɔ so aka asɛm no. (Fil. 4:13) Yɛn som adwuma no ho mpae a yɛbɛbɔ no betumi aboa yɛn ma yɛanya adwene pa bere a yenya osuahu a ɛhaw adwene no. (Aso. 13:52; 1 Pet. 4:13, 14) Sɛ ehu ka yɛn a, mpaebɔ betumi aboa ma yɛde akokoduru ne anigye agyina ano.—Aso. 4:31.
5 Hwehwɛ Hokwan Ahorow: Nokwarem no, yɛn som adwuma no yɛ anigye kɛse bere a yetumi nya nnipa di wɔn adanse no. Wo nhyehyɛe a woayɛ de kɔ afie afie a wobɛsakra mu wɔ bere ne bere mu, sɛ ebia anwummere no betumi ama woanya nnipa pii. Wuhyia nnipa bere biara a wonam kwan so, wudi gua, wote bɔs mu, anaasɛ wutu mpase no. Dɛn nti na wunsiesie asɛm tiawa bi a wode befi nkɔmmɔbɔ ase na wonkɔ wɔn a ɛda adi sɛ wɔwɔ adamfofa su no nkyɛn? Anaasɛ ebia wokɔ adwuma anaasɛ sukuu a wo ne afoforo bɔ nkɔmmɔ wɔ hɔ da biara. Wonam Kyerɛwnsɛm mu asɛm bi a ɛkanyan anigye a wubebisa no so betumi anya kwan adi adanse. Yehu nyansahyɛ a eye wɔ krataa a ɛhyɛ January 2002 Yɛn Ahenni Som mu no kratafa a edi kan. Eyi mu biara a obi bɛyɛ no betumi aboa pii ma n’anigye wɔ asɛnka mu no ayɛ kɛse.
6 Esiane sɛ anigye boa ma yɛmpa abaw nti, hwɛ hia a ehia sɛ yebekura mu. Sɛ yɛyɛ saa a, yebenya akatua kɛse bere a adwuma a yɛrenyɛ bio da yi ba awiei no. Saa anidaso no ankasa betumi ama yɛn anigye wɔ asɛnka mu no ayɛ kɛse.—Mat. 25:21.