Boa W’asafo Nhoma Adesua Sohwɛfo No
1 Yɛn mu biara nya mfaso pii fi Asafo Nhoma Adesua mu. Ɔsram a etwaam no, yesusuw sɛnea Asafo Nhoma Adesua sohwɛfo no di n’asɛyɛde ho dwuma ho. Nanso dɛn na yebetumi ayɛ de aboa no, na yɛnam so aboa yɛn ho ne afoforo?
2 Kɔ Dapɛn Biara: Esiane sɛ nhoma adesua akuw no yɛ nketenkete nti, kɔ a wobɛkɔ no ho hia. Fa yɛ wo botae sɛ wobɛkɔ dapɛn biara. Wubetumi aboa nso denam du a wubedu hɔ ntɛm so, efisɛ eyi ma ɔhwɛfo no fi nhyiam no ase wɔ bere ano.—1 Kor. 14:40.
3 Mmuae a Ɛhyɛ Den: Ɔkwan foforo a wubetumi afa so aboa ne sɛ wubesiesie wo ho yiye na woama mmuae a ɛhyɛ den. Mpɛn pii no, mmuae a ɛfa asɛm biako ho no ye sen biara, na eyi nso hyɛ afoforo nkuran ma wɔma mmuae. Kwati sɛ wobɛka biribiara a ɛwɔ nkyekyɛm no mu no. Sɛ asɛm bi a ɛwɔ nkyekyɛm no mu ka wo koma a, da wo nsusuwii adi denam mmuaema so ma nkɔmmɔbɔ no nyɛ anigye.—1 Pet. 4:10.
4 Sɛ wunya hokwan sɛ wobɛkenkan nkyekyɛm no aboa kuw no a, fa nsi di saa asɛyɛde no ho dwuma. Akenkan a etu mpɔn ma adesua no yɛ anigye.—1 Tim. 4:13.
5 Kuw Adansedi: Wɔyɛ asɛnka nhyiam wɔ mmeae pii a wɔyɛ nhoma adesua no, na wo ho a wode bɛhyɛ saa nhyehyɛe yi mu no boa ɔhwɛfo no bere a odi anim wɔ asɛmpaka adwuma no mu no. Bu nhyehyɛe ahorow yi sɛ hokwan a ɛbɛma woabɛn wo nuanom ahyɛ wɔn nkuran.
6 Asɛnka Akontaabu: W’asɛnka akontaabu a wode bɛma ntɛm ɔsram biara no yɛ ɔkwan foforo a wonam so boa ɔhwɛfo no. Wubetumi de w’akontaabu no ama no tẽẽ anaasɛ wode bɛto adaka a wɔayi asi hɔ ama asɛnka akontaabu no mu wɔ Ahenni Asa so. Ɔkyerɛwfo no betumi de adaka no adi dwuma de aboaboa asɛnka akontaabu a nhoma adesua so ahwɛfo no gyigye no ano.
7 Mmoa a wobɛyɛ W’asafo Nhoma Adesua sohwɛfo no bɛyɛ biribi a ani mpa so. Nea ɛsen ne nyinaa no, wubetumi anya awerɛhyem sɛ Yehowa ‘bɛka honhom a woda no adi no ho.’—Fil. 4:23.