Sɛ Wode Bible Kyerɛkyerɛ Nhoma no Reyɛ Adesua a, Suasua Ɔkyerɛkyerɛfo Kɛse No
1. Ɔkwan bɛn so na Yesu kyerɛkyerɛe?
1 Bere nyinaa na Ɔkyerɛkyerɛfo Kɛse, Yesu, kyerɛkyerɛ nsɛm mu ma emu da hɔ. Nea ɛbɛyɛ na n’atiefo adwen nsɛm ho no, ɛtɔ bere bi a na odi kan bisa wɔn adwene wɔ ho. (Mat. 17:24-27) Ná ɔtwe adwene si Onyankopɔn Asɛm so. (Mat. 26:31; Mar. 7:6) Ɔhwɛɛ yiye sɛ ɔremfa asɛm no mpuapua n’asuafo no, efisɛ na onim sɛ wɔbɛkɔ so asua ade. (Yoh. 16:12) Ade foforo a na ehia Yesu nso ne sɛ obehu sɛ ebia n’asuafo no gye nea ɔkyerɛkyerɛ wɔn no di na wɔte ase anaa. (Mat. 13:51) Wɔayɛ Bible Kyerɛkyerɛ nhoma no na aboa yɛn ma yɛakyerɛkyerɛ wɔ ɔkwan a ɛte saa ara so.
2. Akwan bɛn na yebetumi afa so de nsɛmmisa a ɛwɔ asɛmti biara mfiase no adi dwuma?
2 Nsɛmmisa a Ɛwɔ Ti Biara Mfiase: Sɛ wo ne obi refi ti bi ase a, ɛbɛyɛ papa sɛ wotwe adwene si nsɛmmisa a ɛwɔ asɛmti no ase no so. Wubetumi abisa nsɛm no wɔ ɔkwan bi so a ɛbɛkanyan osuani no anigye. Anaasɛ wubetumi ama osuani no akyerɛ n’adwene tiawa wɔ nsɛmmisa no ho. Ɛho nhia sɛ mususuw osuani no adwenkyerɛ ho kɔ akyiri anaasɛ woteɛteɛ asɛm a ɛnteɛ biara a ɔbɛka. Wubetumi aka sɛ wayɛ ade, na moafi ase asusuw ti no ho. N’adwene a ɔbɛkyerɛ wɔ nsɛmmisa a ɛwɔ asɛmti no ase no ho no bɛma woahu baabi a ɛho hia sɛ wo ne no susuw ho kɔ akyiri.
3. Dɛn na yɛbɛyɛ na ama adesua no ayɛ mmerɛw?
3 Kyerɛwnsɛm: Ɛsɛ sɛ wode adesua no gyina Kyerɛwnsɛm no so. (Heb. 4:12) Nanso ɛho nhia sɛ wokenkan kyerɛwsɛm biara a wɔatwe adwene asi so no. Si kyerɛw nsɛm a yɛn gyidi gyina so no so dua. Ebia ɛho nhia sɛ wokenkan kyerɛw nsɛm a ɛma yehu nsɛm a ɛfa nea wɔreka ho asɛm no ho. Bible Kyerɛkyerɛ nhoma no kyerɛkyerɛ nokware no mu wɔ ɔkwan a ɛnyɛ den so. Ma adesua no nyɛ mmerɛw. Fa w’adwene si nsɛntitiriw no so, nkasa pii na mfa nsɛm bi a ɛmfa adesua no ho nhyehyem.
4. Dɛn na ɛbɛma yɛahu sɛ ebia ɛsɛ sɛ yegye bere de susuw nkekaho no mu asɛm bi ho bere a yɛreyɛ adesua no?
4 Nkekaho: Nkekaho no yɛ nsɛmti 14 a ɛka ti ahorow a ɛwɔ nhoma no mu no ho. Bere a woreyɛ adesua no, sɛ wopɛ a mubetumi asusuw nsɛmti yi ho. Sɛ osuani no te ti a moresua no ase na ogye tom a, nsɛmti a ɛwɔ nkekaho no mu bi wɔ hɔ a, wubetumi ahyɛ no nkuran ma n’ankasa akenkan. Sɛ nhwɛso no, sɛ osuani no gye di dedaw sɛ Yesu ne Mesia no a, ebia ɛho renhia sɛ wo ne no susuw asɛmti “Yesu Kristo—Mesia a Wɔhyɛɛ Ne Ho Bɔ No” ho bere a moresua ti 4 a ese “Hena Ne Yesu Kristo?” no. Wɔ mmere afoforo mu no, ebia ɛho behia sɛ wugye bere na mususuw nkekaho no bi mu asɛm nyinaa anaa ne fã bi ho bere a moreyɛ adesua no.
5. Sɛ yɛpaw sɛ yebesusuw asɛm bi ho wɔ nkekaho no mu a, yɛbɛyɛ no dɛn?
5 Sɛ wopaw sɛ mubesusuw nkekaho no bi mu asɛm ho a, wubetumi adi kan asiesie nsɛmmisa ansa na wo ne osuani no asusuw nkyekyɛm ahorow no ho te sɛ nea wo ne no besusuw ti no ankasa ho no ara pɛ. Anaasɛ sɛ wohwɛ osuani no tebea, na ɛho hia a, wubetumi agye bere kakra bere a moresua ade no ne no asusuw nkekaho no ho. Ɛno bɛma woahu sɛ ɔte asɛm a n’ankasa kenkanee no ase anaa.
6. Yɛbɛyɛ dɛn de adaka a yɛde yɛ ntimu a ɛwɔ ti biara awiei no adi dwuma?
6 Adaka a Yɛde Yɛ Ntimu: Nsɛmmisa a ɛwɔ ti biara mfiase no ho mmuae taa wɔ adaka a ɛwɔ ti biara awiei no mu. Wubetumi de nsɛm yi atĩ ti no mu nsɛntitiriw mu. Adawurubɔfo binom ahu sɛ sɛ wɔne osuani no kenkan asɛm no mu biara ne ebia kyerɛw nsɛm a ɛka ho no a, ɛboa. Afei wɔma osuani no kyerɛ sɛnea kyerɛw nsɛm no foa asɛm no so no. Eyi ma ɔkyerɛkyerɛfo no hu sɛ ebia osuani no te nsɛntitiriw a ɛwɔ adesua no mu ne sɛnea Bible no foa so no ase yiye, na ogye tom anaa. Ɛma osuani no sua sɛnea ɔde Bible bɛkyerɛkyerɛ nokware no mu akyerɛ afoforo nso.
7. Yɛbɛyɛ dɛn atumi de Bible Kyerɛkyerɛ nhoma no adi dwuma de adi ahyɛde a wɔde ama yɛn no so?
7 Ɔkwan a etu mpɔn paa a yebetumi afa so adi ahyɛde a ɛka sɛ yɛnkyerɛkyerɛ nkurɔfo na yɛnyɛ asuafo no so ne sɛ yebesuasua akwan a Yesu faa so kyerɛkyerɛe no. (Mat. 28:19, 20) Bible Kyerɛkyerɛ nhoma no betumi aboa yɛn ma yɛayɛ saa. Fa di dwuma yiye fa kyerɛkyerɛ afoforo nokware no ma emu nna hɔ, ma ɛnyɛ mmerɛw, ne anigye.