Bible Kyerɛkyerɛ no Afã Horow

Sɛ Bible suani hu nea Bible kyerɛkyerɛ na ɔde yɛ adwuma a, ɛbɛma ne ho akokwa na waso aba. (Dw. 1:1-3) Yɛbɛyɛ dɛn de Bible Kyerɛkyerɛ nwoma no aboa osuani no ama wanya nkɔso? Ɛsɛ sɛ yɛhu nwoma no afã horow na yɛde yɛ adwuma yie.

Nsɛmmisa a Ɛwɔ Ɛti no Mfiase: Ɛti biara wɔ nsɛmmisa a ɛho mmuaeɛ wɔ adesua no mu. Wobɛtumi abobɔ nsɛmmisa no so ama osuani no ahu nneɛma a mobɛsusu ho. Anaasɛ wobɛtumi ama wakyerɛ n’adwene wɔ nsɛmmisa no ho. Sɛ ɔka asɛm bi na ɛntene mpo a, ɛnhia sɛ woka biribi de tene no; ɛno bɛma woahu sɛnea wobɛkyerɛkyerɛ nsɛm mu wɔ adesua no mu.—Mmeb. 16:23; 18:13.

Nkekaho: Sɛ wohu sɛ osuani no ate adesua no ase a, wobɛtumi ahyɛ no nkuran sɛ ɔno ara nkɔkenkan nkekaho no. Ɛda a mobɛsan asua adeɛ no, wobɛtumi ahwɛ sɛ ɔtee aseɛ anaa. Nanso sɛ wohu sɛ ɔnte nneɛma bi ase yie a, ɛnneɛ gye bere ne no nsusu nkekaho no anaa ne fã bi ho. Mobɛtumi akenkan na woabisa no nsɛm. Ɛbɛyɛ papa sɛ wodi kan hu nsɛmmisa a wode bɛyɛ adwuma.

Adaka a Yɛde Yɛ Ntĩmu: Nsɛmmisa a ɛwɔ ti biara mfiase no, ɛho mmuaeɛ wɔ ntĩmu adaka no mu. Ɛbɛma woahu sɛ osuani no te adesua no ase na ɔbɛtumi akyerɛkyerɛ nsɛntitiriw no mu anaa. Kenkan nsɛm a ɛwɔ adaka no mu ne kyerɛwnsɛm no nyinaa. Afei ma osuani no mfa kyerɛwnsɛm no nkyerɛ nea enti a ɔgye di sɛ nsɛm a ɛwɔ adaka no mu yɛ nokware.—Aso. 17:2, 3.