‘Wɔbɛka Asɛmpa Yi’!
1. Yɛyɛ dɛn hu sɛ biribiara rentumi nsiw asɛnka adwuma no kwan?
1 Biribiara rentumi nsiw Yehowa kwan wɔ nea ɔpɛ sɛ ɔyɛ ho. (Yes. 14:24) Ɛwom sɛ na ɛte sɛ nea Ɔtemmufo Gideon ne ne mmarima 300 no rentumi nni Midian asraafo 135,000 no so nkonim de, nanso Yehowa ka kyerɛɛ no sɛ: “Wubegye Israelfo afi Midianfo nsam. Ɛnyɛ me na meresoma wo?” (Atem. 6:14) Adwuma bɛn na Yehowa taa akyi nnɛ? Yesu kae sɛ: “Wɔbɛka ahenni ho asɛmpa yi wɔ asase so nyinaa.” (Mat. 24:14) Obiara rentumi nsiw adwuma yi kwan!
2. Dɛn nti na yebetumi ahwɛ kwan sɛ Yehowa bɛboa yɛn sɛ ankorankoro wɔ ɔsom adwuma no mu?
2 Yehowa Boa Yɛn sɛ Ankorankoro: Yɛwɔ awerɛhyem sɛ Yehowa bɛboa n’Adansefo ma wɔadi adanse sɛ kuw, nanso so yebetumi ahwɛ kwan sɛ ɔbɛboa yɛn sɛ ankorankoro? Bere bi a na ɔsomafo Paulo hia mmoa no, Yehowa nam ne Ba Yesu so boaa no. (2 Tim. 4:17) Sɛ́ ankorankoro no, yɛn nso yebetumi anya ahotoso saa ara sɛ Yehowa behyira mmɔden a yɛrebɔ sɛ yɛbɛyɛ n’apɛde no so.—1 Yoh. 5:14.
3. Tebea horow bɛn mu na Yehowa boa yɛn?
3 So asetena mu dadwen ma w’ahoɔden so tew ma enti wuntumi nyɛ pii wɔ asɛnka mu? “Ɔma nea wabrɛ no tumi.” (Yes. 40:29-31) So worehyia ɔtaa anaa ɔsɔretia? “Dan w’adesoa to Yehowa so, na obeso wo mu.” (Dw. 55:22) So ɛtɔ mmere bi a, wunni wo ho mu ahotoso? “Kɔ, na worekasa a, mɛka wo ho.” (Ex. 4:11, 12) So wowɔ ɔyare bi a ɛmma wuntumi nyɛ pii wɔ ɔsom adwuma no mu? Nea w’ahoɔden betumi biara a wobɛyɛ no, Yehowa ani sɔ ɛmfa ho sɛ esua no.—1 Kor. 3:6, 9.
4. Ɔkwan bɛn so na Yehowa mu ahotoso a yebenya no betumi aboa yɛn?
4 Yehowa ‘ateɛ ne nsa, hena na obetumi akoa mu?’ (Yes. 14:27) Yehowa mu ahotoso a yɛwɔ sɛ obehyira yɛn som adwuma no so nti, momma yɛnkɔ so mfa ‘Yehowa tumi nkasa akokoduru so’ a yennyae.—Aso. 14:3.