So Woayɛ Sɛnea Wɔyɛ Bible Adesua wɔ Nsrahwɛ a Edi Kan mu Akyerɛ Obi Pɛn?

Sɛ yɛka Bible adesua ho asɛm kyerɛ afiewuranom a, wɔn mu bi taa ka sɛ wɔn ani nnye ho anaasɛ wosua Bible wɔ wɔn asɔre mu. Esiane sɛ wonnim sɛ ɔkwan a yɛfa so yɛ Bible adesua yɛ soronko wɔ asɔre afoforo de ho nti, wonnim sɛ Bible a wobesua no betumi ama wɔate emu nsɛm no ase yiye na ama wɔn ani agye. Enti sɛ́ anka wobɛka Bible adesua ho asɛm kɛkɛ no, dɛn nti na womfa bere kakra nkyerɛ no sɛnea wɔyɛ Bible adesua wɔ nsrahwɛ a edi kan no mu? Mfatoho bi ni: Nka nkyerɛ wɔn kɛkɛ sɛ minim aduannoa na mikura aduan bi a ɛyɛ dɛ, nanso mɛbrɛ mo bi akyiri yi; ma wɔnka bi nhwɛ wɔ hɔ ara! Ɔkwan a wubetumi afa so de bere tiaa bi akyerɛ no sɛnea wɔyɛ no no ho nyansahyɛ na wɔde ama wɔ March 2006 Yɛn Ahenni Som no kratafa 6 yi:

“Wususuw sɛ bere bi bɛba a saa nsɛm yi bɛba mu? [Kenkan Yesaia 33:24, na twɛn ma ommua.] Ma memfa biribi a ɛfa eyi ho nkyerɛ wo.” Fa Bible Kyerɛkyerɛ nhoma no ma ofiewura no, na fa asɛm a ɛwɔ kratafa 36, nkyekyɛm 22 no kyerɛ no. Kenkan asɛmmisa a ɛwɔ ase hɔ no, na ma ofiewura no nhwehwɛ mmuae no bere a worekenkan nkyekyɛm no. Afei bisa asɛm no bio, na tie mmuae a ofiewura no de bɛma. Wo ne no mmom nkenkan kyerɛwsɛm foforo. Bisa asɛm bi a sɛ wosan kɔ a mubesusuw ho, na wo ne no nhyɛ da pɔtee a wobɛsan akɔ hɔ. Woafi Bible adesua ase ara nen!