**Nea Ɛbɛma Yɛatu Mpɔn wɔ Asɛnka Mu—Fa Bible Kyerɛkyerɛ Nwoma no Kyerɛ Nkurɔfoɔ Sɛnea Yɛyɛ Bible Adesua**

Nea Enti a Ɛho Hia: Sɛ yɛka sɛ yɛne nkurɔfoɔ sua Bible a wɔntua hwee a, ɛyɛ a nnipa pii nte aseɛ. Ebia ɛbɛyɛ wɔn sɛ ɛsɛ sɛ wɔdɔm adesua kuo bi, anaa wɔfa krataatwerɛ so sua adeɛ. Enti sɛ́ anka wobɛka akyerɛ obi sɛ wopɛ sɛ wo ne no sua Bible no, adɛn nti na wonkyerɛ no sɛnea yɛyɛ no mmom? Wobɛtumi agyina obi pon ano de simma kakraa bi akyerɛ no sɛnea yɛyɛ Bible adesua ma no ahu sɛ ɛnyɛ den koraa, na ɔbɛtumi asua nneɛma pii ma n’ani agye.

Ɔkwan a Wobɛfa so Ayɛ:

Sɛ woda wo ho adi wie a, bisa onipa no sɛ ɔtaa dwene ne daakye ho anaa?
Toa so sɛ nnipa pii dwene nneɛma a ɛte saa ho. Afei fa nsɛmti a wɔahyehyɛ wɔ Bible Kyerɛkyerɛ nwoma mu no kyerɛ no. Ma no nhu sɛ nwoma no mu adesua nyɛ den koraa, na ɛbɛboa no ma wahu nea Bible ka fa daakye ne nneɛma foforɔ pii ho. Afei ma no nkyerɛ asɛmti a n’ani gye ho.
Ma no nwoma no bi na ɔmmue nkɔ ti a ɔkyerɛeɛ no. Kyerɛ no nsɛmmisa a ɛwɔ ti no mfiaseɛ no, na ka kyerɛ no sɛ berɛ a morekenkan nkyekyɛm ahodoɔ no, mobɛnya ɛho mmuaeɛ.
Sɛ onipa no ani gye ho sɛ ɔbɛkan a, ɛnneɛ ma no nkan nkyekyɛm a ɛdi kan no. Ɔkenkan wie a, bisa asɛm a ɛwɔ aseɛ hɔ no na monsusu ho. Afei monkenkan twerɛnsɛm a ɛfoa asɛm no so na monsusu ho. Fa wo nwoma no kyerɛ no ma ɔnhu mmuaeɛ a woasensan aseɛ no.
Monkenkan nkyekyɛm a ɛdi hɔ no, nanso wei deɛ ma ɔno ara mfa ne nsɛm mmua asɛmmisa no.
Kamfo no na monyɛ nhyehyɛeɛ na woasan akɔtoa adesua no so.
Sɛ ɛbɛyɛ yie a, monkɔ jw.org so nkɔhwɛ video a wɔato din, Yɛne Obi Sua Bible a, Yɛyɛ no Sɛn?

Sɔ Wei Hwɛ Bosome Yi Mu:

Bɔ mpaeɛ ma Yehowa mmoa wo na fi Bible adesua foforɔ ase.—Filip. 2:13.
Wokɔ asɛnka a, bɔ mmɔden fa Bible Kyerɛkyerɛ nwoma no kyerɛ obi sɛnea yɛyɛ Bible adesua. Wopɛ nso a, yi video a wɔato din Yɛne Obi Sua Bible a, Yɛyɛ no Sɛn? Anyɛ yie koraa no sɔ wei hwɛ pɛnkoro wɔ asɛnka mu.