Nsɛm a Yebetumi Aka

De afi Bible adesua ase wɔ Memeneda a edi kan wɔ January mu

“Nnipa bi gye di sɛ Bible no yɛ nkɔmhyɛ nhoma a yebetumi de yɛn ho ato so. Afoforo nso te nka sɛ nkɔmhyɛ a ntease nnim a wobetumi akyerɛ ase wɔ akwan horow so na ɛwom. Wususuw ho dɛn?” Twɛn ma ommua. Afei fa January 1 Watchtower no ma ofiewura no, na wo ne no nsusuw nsɛm a ɛwɔ asɛmti ketewa a edi kan wɔ kratafa 16 ase no ho. Anyɛ yiye koraa no, monkenkan kyerɛw nsɛm a ɛwom no mu biako. Fa nsɛmma nhoma no ma no na yɛ nhyehyɛe ne no nkosusuw asɛmmisa a edi hɔ no ho.

The Watchtower January 1

“Wususuw sɛ yebetumi asua nneɛma pa pii afi mmarima ne mmea atitiriw a wɔka wɔn ho asɛm wɔ abakɔsɛm mu no hɔ? [Twɛn ma ommua.] Kyerɛwsɛm yi ka ɔbarima titiriw bi a ɔno nkutoo na wɔfrɛ no sɛ ‘Onyankopɔn adamfo’ wɔ Bible mu ho asɛm. [Kenkan Yakobo 2:23.] Saa nsɛmma nhoma yi kyerɛkyerɛ nea enti a Onyankopɔn frɛɛ no sɛ n’adamfo ne nea yebetumi asua afi nhwɛso a Abraham yɛe no mu.”

Awake! January

“Adanmude, di-bi-ma-minni-bi, ne nneyɛe afoforo a ɛnkyerɛ nokwaredi abu so wɔ nnwuma mu. Ebinom te nka sɛ adwumayɛ mu nneyɛe bi a ɛnkyerɛ nokwaredi ho hia na ama adwuma no ayɛ yiye. Wudwen ho dɛn? [Twɛn ma ommua.] Hyɛ abebusɛm a ɛkanyan adwene yi nsow. [Kenkan Mmebusɛm 20:17.] Saa nsɛmma nhoma yi kyerɛkyerɛ nea enti a mfaso wɔ nokwaredi so no mu.”