Nea Ɛbɛma Yɛatu Mpɔn wɔ Asɛnka Mu​—Yɛ Anigyefo Ho Kyerɛwtohɔ

“Ma w’ani mmra wo ho ne wo nkyerɛkyerɛ so bere nyinaa.” (1 Tim. 4:16) Sɛ afei ara na yɛahyɛ asɛnka ase anaasɛ yɛayɛ akyɛ mpo a, afotu a honhom kaa ɔsomafo Paulo ma ɔde maa Timoteo no fa yɛn nyinaa ho, na ɛkyerɛ sɛ ɛsɛ sɛ yɛyere yɛn ho tu mpɔn wɔ asɛnka adwuma no mu. Wɔde asɛm foforo bi bɛba Yɛn Ahenni Som mu a ɛbɛboa yɛn ma yɛanya nkɔso wɔ asɛnka adwuma no mu. Wɔato din “Nea Ɛbɛma Yɛatu Mpɔn wɔ Asɛnka Mu.” Emu biara bɛka biribi a ɛho hia a ɛbɛma yɛatu mpɔn ho asɛm, na ɛbɛma yɛn ɛho nyansahyɛ ahorow. Sɛ wɔde nyansahyɛ bi ma yɛn wɔ ɔsram bi mu a, wɔhyɛ yɛn nyinaa nkuran sɛ yɛmmɔ mmɔden mfa nyɛ adwuma. Afei nso, sɛ ɔsram no wu a, Ɔsom Nhyiam dwumadi fã bi bɛma yɛanya kwan aka sɛnea nyansahyɛ no aboa yɛn no ho asɛm. Ɔsram yi mu de, wɔhyɛ yɛn nkuran sɛ obiara a yebehyia no a ɔbɛkyerɛ asɛm no ho anigye no, yɛnyɛ ne ho kyerɛwtohɔ.

Nea Enti a Ɛho Hia: Sɛ yebetumi ayɛ asɛmpaka adwuma a wɔde ahyɛ yɛn nsa no yiye a, ɛnde sɛ yɛka asɛm no kyerɛ nkurɔfo a, ɛsɛ sɛ yɛsan kɔkyerɛkyerɛ wɔn, na yegugu aba a yɛadua no so nsu. (Mat. 28:19, 20; 1 Kor. 3:6-9) Eyi kyerɛ sɛ ɛsɛ sɛ yɛkɔ onipa no nkyɛn kobua nsɛm a obisae no, na yɛtoa nkɔmmɔbɔ no so. Enti obiara a yebehyia no a ɔbɛkyerɛ asɛm no ho anigye no, ehia sɛ yɛyɛ ne ho kyerɛwtohɔ.