Nea Ɛbɛma Yɛatu Mpɔn wɔ Asɛnka Mu—Yɛ Sankɔhwɛ Ho Nhyehyɛe Pa

Nea Enti a Ɛho Hia: Sɛ yɛhyia obi wɔ asɛnka mu na ɔkyerɛ asɛm no ho anigye a, ɛyɛ a yɛpɛ sɛ yɛhu bere a ɔwɔ fie na yɛasan akɔgugu nokware aba a yɛduae no so nsu. (1 Kor. 3:6) Ɛno nti, yɛkɔ obi nkyɛn a, ɛsɛ sɛ yɛyɛ nhyehyɛe a ɛbɛma yɛasan akɔ ne nkyɛn bio, enti ɛho hia sɛ yɛbisa onipa no ma ɔkyerɛ bere a ɔpɛ sɛ yɛsan ba. Afei nso, ɛyɛ papa sɛ yɛbɛgya asɛmmisa bi a bere foforo sɛ yɛkɔ hɔ a yɛne no bɛsusu ho. Eyi bɛma ofiewura no ahwɛ yɛn kwan. Sɛ asɛmmisa no ho mmuae wɔ nhoma a yɛde gyaw no no mu a, ne ho bɛpere no sɛ ɔbɛkenkan. Sɛ yɛma ofiewura no hu asɛm a yɛbɛsusu ho bere foforo a, ɛno nso ma ɛyɛ mmerɛw sɛ yɛbɛsan akɔ ne nkyɛn, efisɛ yɛnim nea yɛrekɔka, na ofiewura no nso nim nea yɛrebɛbɔ ho nkɔmmɔ. Sɛ yɛkɔto no a, yɛbɛtumi aka sɛ, asɛmmisa a nnaano yɛde gyaw wo no ara nti na yɛnam, yɛaba sɛ yɛrebɛma wo ho mmuae. Afei, na yɛde nea aka no atoa so.

Ɔkwan a Wobɛfa so Ayɛ:

Sɛ yɛresiesie asɛm a yɛde bɛkɔ afie afie asɛnka a, ɛsɛ sɛ yɛsan pɛ asɛmmisa a sɛ yɛkɔto obi a yɛde bɛgya no na yɛakɔma ho mmuae bere foforo. Yɛbɛtumi apaw asɛm bi afi nhoma a yɛde rekɔma no mu. Yɛbɛtumi nso apaw asɛmmisa afi yɛn nhoma a yɛde yɛ Bible adesua no bi mu, sɛnea ɛbɛyɛ a bere foforo yɛkɔ hɔ a yɛbɛtumi atwe adwene asi nhoma no so.
Sɛ obi kyerɛ asɛm no ho anigye na worefi ne nkyɛn akɔ a, ma ɔnhu sɛ wopɛ sɛ wosan ba ne nkyɛn. Afei fa w’asɛmmisa no gyaw no. Mmeae bi wɔ hɔ a, nnipa a wɔte hɔ no nni adagyew koraa, enti sɛ wo ne wɔn kasa a, wɔmpɛ sɛ wobɛsan aba wɔn nkyɛn bio. Sɛ ɛba saa a, wobɛtumi abisa no sɛ: “Sɛ da foforo meba saa bere yi a, mɛto wo wɔ fie? [Twɛn ma ommua.] Nnawɔtwe sɛ nnɛ, mepɛ sɛ mefa ha bua saa asɛmmisa yi . . . Sɛ meba na woreyɛ ade a, yɛbɛtumi ayɛ no da foforo.”
Sɛ woka kyerɛ ofiewura no sɛ wobɛsan aba bere foforo a, hwɛ sɛ wobɛdi wo bɔhyɛ so. (Mat. 5:37) Woyɛ sankɔhwɛ a edi kan no wie a, yɛ sankɔhwɛ foforo ho nhyehyɛe.

Sɔ Eyi Hwɛ wɔ Ɔsram Yi Mu:

Sɛ woredwendwene nea wobɛka ho a, kae sɛ wobɛdwene asɛmmisa a wode bɛgya ofiewura no nso ho. Ɛyɛ a ka ho asɛm kyerɛ adawurubɔfo a wo ne wɔn bɛkɔ asɛnka no.