Nea Ɛbɛma Yɛatu Mpɔn Wɔ Asɛnka Mu​—Yɛ Sankɔhwɛ Ho Nhyehyɛe

NEA ENTI A ƐHO HIA:

Yɛpɛ sɛ yegugu nokware aba a yɛadua no so nsu. (1Ko 3:6) Enti obi kyerɛ asɛm no ho anigye a, ɛyɛ papa sɛ yɛde asɛmmisa bi gyaw no, na da foforo yɛne no akosusuw ho. Eyi bɛma ɔde anigye ahwɛ yɛn kwan bere foforo na ɛbɛyɛ mmerɛw sɛ yebesiesie yɛn ho ama sankɔhwɛ no. Enti sɛ yɛsan kɔ ofiewura no nkyɛn a, yebetumi aka akyerɛ no sɛ yɛrebɛma asɛmmisa a yɛde gyaw no no ho mmuae.

ƆKWAN A WOBƐFA SO AYƐ:

• Sɛ woresiesie wo ho akɔyɛ afie afie asɛnka a, pɛ asɛmmisa a wode begyaw ofiewura no na da foforo wokɔ a, woama no ho mmuae. Wubetumi abisa asɛm bi a ɛho mmuae wɔ nhoma a wopɛ sɛ wode ma no no mu. Anaasɛ wubetumi abisa asɛm bi a ɛho mmuae wɔ nhoma foforo mu na sɛ wosan kɔ a, wode nhoma no ama no.

• Sɛ wo ne obi a wakyerɛ asɛm no ho anigye bɔ nkɔmmɔ wie a, ma onhu sɛ w’ani gye ho sɛ wobɛsan aba ne nkyɛn. Afei fa asɛmmisa a wopɛ sɛ mususuw ho da foforo no gyaw no. Sɛ ɛbɛyɛ yiye a, gye ne tɛlɛfon nɔma anaa n’address.

• Sɛ wohyɛ no bɔ sɛ wobɛba da foforo anaa bere pɔtee bi a, bɔ mmɔden sɛ wubedi so.​—Mt 5:37.