Fa Nneɛma a Ɛsom Bo Paa Ma Wo No Ma Yehowa

5:5-7, 11

Tete no, sɛ Israelni bi yɛ ohiani a, na ɛnkyerɛ sɛ, sɛ ɔfom Yehowa a, ɔrentumi nsiesie ɔne no ntam. Israelni a na ahia no paa mpo no, na obetumi abɔ afɔre ma asɔ Yehowa ani. Nea na ehia ara ne sɛ, n’afɔrebɔde no bɛyɛ papa na afi ne komam. Ná wobetumi de esiam mpo abɔ afɔre, nanso na Yehowa hwehwɛ sɛ esiam no yɛ “muhumuhu”; esiam a na wobetumi de asom ahɔho. (Ge 18:6) Ɛnnɛ nso, ɛsono nea obiara refa mu wɔ n’asetena mu ne nea obetumi ayɛ. Nanso sɛ “ayeyi afɔre” a yɛbɔ no fi yɛn koma mu nko ara de a, Yehowa ani sɔ.—Heb 13:15.

Sɛ yare anaa w’apɔwmuden a ɛnyɛ papa nti, wuntumi nyɛ pii sɛ kan no a, sɛn na saa asɛm yi betumi ahyɛ wo nkuran?