Yɛbɛyɛ Ɔsatu Titiriw Bi Wɔ September Mu a Ɛbɛma Yɛafi Bible Adesua Ase

September mu no, yɛkɔ asɛnka a, ofie biara a ɛwɔ yɛn asaasesin mu no, yɛbɛbɔ mmɔden aka Bible adesua ho asɛm akyerɛ nnipa a ɛwɔ hɔ. Yɛde Wubetumi Anya Anigye Daa! nhomawa no na ɛbɛyɛ adwuma. Wɔn a wɔbɛyɛ akwampae boafo saa bosome no betumi de nnɔnhwerew 30 ayɛ. Saa ɔsatu yi, yɛbɛyɛ no sɛn?

• Bere a Yɛreyɛ Nsrahwɛ a Edi Kan: Asɛm a ɛwɔ nhomawa no akyi no, wo ne nkurɔfo mmɔ ho nkɔmmɔ. Afei kyerɛ wɔn sɛnea yɛyɛ Bible adesua. Wɔn a wo ne wɔn abɔ nkɔmmɔ pɛn, ne wɔn a wokɔ wɔn nkyɛn sankɔhwɛ a wunim sɛ wɔn ani gye asɛm no ho nso, mma wo werɛ mmfi wɔn. Sɛ bere bi a atwam mpo wɔkaa sɛ wɔmpɛ sɛ wo ne wɔn besua Bible a, ebia nhomawa foforo yi ne ɔkwan a seesei yɛfa so ne nkurɔfo sua ade no, wɔn ani begye ho. Sɛ wokɔ fie bi mu na woankɔto obiara a, nnyaw nhomawa no bi wɔ hɔ. Afei nso, worekyerɛw krataa akɔma obi, na wunnim sɛ n’ani begye asɛm no ho a, ɛnsɛ sɛ wode nhomawa no bi ka ho ma no. Nna a mode yɛ asɛnka nhyiam no, edu September a, Asafo Ɔsom Boayikuw no betumi de bi aka ho.

• Hokwan Afoforo a Yɛde Bɛyɛ Ɔsatu No: Sɛ mo asafo no wɔ trɔk a yɛde yɛ baguam adansedi no bi a, monhyehyɛ Wubetumi Anya Anigye Daa! nhomawa no bi wɔ so. Sɛ obi ka sɛ n’ani gye nhomawa no ho a, ka kyerɛ no sɛ yebetumi nso ne no ayɛ Bible adesua a ɔrentua hwee. Kyerɛ no sɛnea yɛne nkurɔfo reyɛ Bible adesua a yɛyɛ no. Wubetumi akyerɛ no wɔ hɔ ara anaa wo ne no ayɛ nhyehyɛe na woakyerɛ no akyiri yi. Ɔsom adwuma sohwɛfo no betumi ayɛ nhyehyɛe ama adawurubɔfo a wɔfata akɔ mmeae a nnwuma-nnwuma wɔ wɔ asaasesin no mu akɔka Bible adesua ho asɛm akyerɛ wɔn. Wubetumi aka akyerɛ w’adwumamfo sɛ wopɛ sɛ wo ne wɔn sua Bible. Sɛ ɛnyɛ asɛnka mu mpo na wowɔ na wudi obi adanse a, wubetumi aka akyerɛ no sɛ wopɛ sɛ wo ne no sua Bible.

Yesu maa yɛn ahyɛde sɛ ‘yɛnyɛ nkurɔfo asuafo’ na ‘yɛnkyerɛkyerɛ wɔn.’ (Mt 28:19, 20) Yɛn mpaebɔ ne sɛ, ɔsatu titiriw yi bɛboa yɛn ama yɛde Wubetumi Anya Anigye Daa! nhomawa no ayɛ saa adwuma no.