Sɛnea Afofantɔ Fitaa Bi a Ne Din De Cabbage White Bue Ne Ntaban Mu

Sɛ afofantɔ biara pɛ sɛ otu a, odi kan to awia ansa na nam a ne ntaban tuatua so no mu ayɛ den ama watumi abɔ ne ntaban mu atu. Nanso, afofantɔ fitaa bi a yɛfrɛ no cabbage white no de, wim yɛ kusuu a, otumi tu ntɛm gyaw mfofantɔ a aka no. Dɛn na ɛma otumi yɛ saa?

Susuw ho: Sɛ mfofantɔ reto awia ansa na wɔatu a, ebinom mmue wɔn ntaban mu. Afoforo nso bue wɔn de mu ma esi. Afofantɔ a wɔfrɛ no cabbage white no de, sɛ ɔreto awia a, obue ne ntaban mu, nanso ɔntrɛw mu mma ensi. Wɔayɛ nhwehwɛmu ahu sɛ, sɛ saa afofantɔ no reto awia a, nea enti a obue ne ntaban mu kakraa bi ne sɛ, ɛma otumi twe ahoɔden fi owia no mu ntɛmntɛm. Sɛ obue ne ntaban mu saa a, ahoɔden a efi owia mu no kɔ nam a ɛwɔ ne bo a ne ntaban tuatua so no mu tẽẽ ma ɛyɛ hyew. Wei ma otumi tu.

Nhwehwɛmufo a wɔwɔ Exeter Sukuupɔn mu wɔ England no yɛɛ nhwehwɛmu bi. Wɔyɛe sɛ wɔbɛhyehyɛ sola panɛl (ade bi a wɔde twe ahoɔden fi owia mu de yɛ anyinam ahoɔden) ama ayɛ sɛnea cabbage white butterfly reto awia a obue ne ntaban mu no. Wɔhyehyɛɛ no saa no, wohui sɛ, anyinam ahoɔden a wonyae no kɔɔ anim bɛyɛ ɔha mu nkyekyɛm 50.

Nhwehwɛmufo no san hui sɛ afofantɔ no ntaban anim yɛ hyɛnn paa. Enti wɔyɛɛ sola panɛl a anim yɛ hyɛnn, na wɔhyehyɛɛ no sɛnea cabbage white butterfly bue ne ntaban mu bere a ɔreto awia no. Wei ma wotumi yɛɛ sola panɛl a emu yɛ hare na etumi nso twe ahoɔden fi owia mu ntɛmntɛm. Nea wohui no maa Ɔbenfo Richard ffrench-Constant a ɔka nhwehwɛmufo no ho no kaa sɛ cabbage white butterfly no “nim sɛnea yɛtwe ahoɔden fi owia mu paa.”

Wudwen ho sɛn? Sɛnea afofantɔ fitaa a ne din de cabbage white no bue ne ntaban mu to awia no, obi na ɔyɛɛ no saa, anaa ɛno ara na ɛbae?