Mmabun—Mommɔ “Nnwuma Pa Ho Mmɔden”

Krataa a honhom kaa ɔsomafo Paul ma ɔkyerɛw kɔmaa Tito mu no, ɔka kyerɛɛ Tito ne mmerante nyinaa sɛ wɔnna wɔn ho adi “biribiara mu” sɛ nnipa a wɔyɛ “nhwɛso wɔ nnwuma pa mu.” (Tit 2:6, 7) Wohwɛ saa ti no ara mu a, Paul kaa sɛ Yesu bɛtew Yehowa nkurɔfo ho sɛnea ɛbɛyɛ a wɔbɛbɔ “nnwuma pa ho mmɔden.” (Tit 2:14) Nnwuma pa no mu baako ne sɛ yɛbɛka Onyankopɔn Ahenni no ho asɛm, na yɛakyerɛkyerɛ nkurɔfo. Sɛ woyɛ aberante anaa ababaa a, bisa wo ho sɛ, ‘Metumi de ahoɔden a mewɔ seesei no ayɛ akwampaefo boafo anaa daa akwampae adwuma no bi anaa?’—Mme 20:29.

Sɛ wopɛ sɛ woyɛ ɔkwampaefo a, ɛho hia sɛ wototo wo nneɛma yiye. (Lu 14:28-30) Sɛ nhwɛso no, wobɛyɛ dɛn anya sika de atwitwa wo ho na ama woatumi ayɛ akwampae adwuma no? Wobɛyɛ dɛn anya nnɔnhwerew a wɔhwehwɛ fi wo hɔ no? Bɔ mpae srɛ Yehowa sɛ ɔmmoa wo sɛnea ɛbɛyɛ a wobɛtoto wo nneɛma yiye. (Dw 37:5) Nhyehyɛe a woayɛ no, wo ne w’awofo ne wɔn a wɔatumi ayɛ akwampae adwuma no yiye no bi mmɔ ho nkɔmmɔ. Afei tu anammɔn a ɛbɛboa ama woadu wo botae no ho. Kae sɛ, sɛ woyere wo ho wɔ Yehowa som mu a, ɔremma wo nsa nsi fam; obehyira wo!

HWƐ VIDEO A YƐATO DIN MMABUN A WƆREYI YEHOWA AYƐ NO. WUWIE A, BUA NSƐMMISA A EDIDI SO YI:

• Nsɛnnennen bɛn na ebinom atumi adi so ma enti wɔatumi abɛyɛ akwampaefo, na wɔyɛɛ no sɛn?

• Dɛn na awofo betumi ayɛ de aboa wɔn mma ma wɔabɛyɛ daa akwampaefo?

• Adɛn nti na ɛho hia sɛ yenya nhyehyɛe pa a yɛde bɛkɔ asɛnka?

• Ɔkwan bɛn so na anuanom a wɔwɔ asafo no mu betumi aboa akwampaefo na wɔahyɛ wɔn nkuran?

• Sɛ obi yɛ akwampae adwuma no bi a, nhyira bɛn na obenya?