Nkaebɔ Ahorow

◼ Nhoma a yɛde bɛma October: Life—How Did It Get Here? By Evolution or by Creation? November: Nyan! anaa Ɔwɛn-Aban anaasɛ n’abien nyinaa kra. December: New World Translation ne The Bible—God’s Word or Man’s? nhoma no. January: Onipa a Ɔsen Biara a Watra Ase Pɛn. MONHYƐ NO NSOW: Asafo ahorow a wonnya nkraa atifi hɔ ɔsatu nhoma ahorow no betumi ayɛ saa wɔ wɔn ɔsram biara Literature Order Form (S-14) a edi hɔ no so.

◼ Ɛsɛ sɛ ɔhwɛfo guamtrani no hwɛ hu sɛ wɔahwehwɛ asafo no sika akontaabu mu. Sɛ wɔyɛ eyi wie a, ɛsɛ sɛ wɔbɔ asafo no amanneɛ.

◼ Ɛsɛ sɛ adawurubɔfo a wɔreyɛ nhyehyɛe ayɛ akwampaefo aboafo adwuma wɔ November mu no de wɔn akwammisa nkratasin no ma ntɛm. Eyi bɛma mpanyimfo no ayɛ nhoma ne asasesin a ehia ho nhyehyɛe.

◼ Wɔde akwankyerɛ ama wɔ nea wobetumi de aka asɛnka akontaabu ho wɔ Nhyehyɛe a Wɔayɛ Ma Yɛde Awie Yɛn Som Adwuma nhoma no nkratafa 103-4. Ebinom ntumi nhu sɛ ebia ɔdawurubɔfo a ɔkyerɛ ɔkasa a obi rema ase no betumi abu bere no ho akontaa anaa. Yiw, ɔkasafo no ne ɔkasa no asekyerɛfo baanu nyinaa betumi de bere a wɔde dii dwuma no aka wɔn asɛnka akontaabu ho.

◼ Nhoma Foforo a Aba:

Engiresi: Theocratic Ministry School Guidebook (1992 de); Jehovah’s Witnesses In the Twentieth Century (1989 de).

◼ Wɔasakra Wubetumi Atra Ase Daa Wɔ Paradise Wɔ Asase no mu nsɛm no bi (wɔ 1989 mu). Faako a nsonsonoe bi wɔ no, ɛsɛ sɛ wɔde nea wɔasakra emu nsɛm no bi no mu asɛm di dwuma ma ɛne Mmebusɛm 4:18 hyia.

◼ Ɔsom Boayikuw ahorow nhwɛ nhu sɛ wɔayɛ nea edidi so yi:

So mode Congregation Analysis Report (S-10) no amana Asafo ti no dedaw?

So mode Literature Inventory kratasin (S-18) a moahyehyɛ awiei no asan amana Baa Dwumadibea?

So mode mo asafo no 1993 Special Service Forms Order amana?

Biakoyɛ Mu a Yebekura Sɛ Kristofo a Wonni Afã Biara

¹ “Onyamesom a ɛho tew na ɛho nni fĩ Agya Onyankopɔn anim ne sɛ obi . . . yi ne ho fi wiase nkekae mu.” (Yak. 1:27) Sɛ ɛba amammui mu dwumadi ahorow so a, wɔde nnyinasosɛm yi bedi dwuma dɛn? Kristofo ‘nyɛ wiase no fã, te sɛ nea na Yesu nyɛ wiase no fã no’; wonni afã biara.—Yoh. 17:16.

² Reasoning nhoma no kratafa 269 kyerɛ afã biara a wonni ase sɛ “wɔn a wɔnkɔ akuw abien anaa nea ɛboro saa a wodi aperepere no mu biara afã anaa wonnyina wɔn akyi no gyinabea. . . . Wɔ ɔman biara ne wɔ tebea horow nyinaa mu no, nokware Kristofo abɔ mmɔden sɛ wɔrenkɔ obiara afã koraa wɔ wiase no mu akuw horow ntam ntawntawdi mu. Wɔmfa wɔn ho nnyigye nea afoforo yɛ wɔ . . . amanyɛkuw a wɔdɔm, amammui dibea a wɔpere, anaa abatow ho no mu. Nanso wɔn ankasa som Yehowa, Bible no Nyankopɔn nkutoo; wɔahyira wɔn nkwa so koraa ama no, na wɔde mmoa a wɔwɔ nyinaa ma n’Ahenni.”

³ Nea eyi kyerɛ ne sɛ wiase nyinaa Yehowa Adansefo mma wɔntow aba mpaw wɔn mma amammui dibea, wɔnkɔdɔm amammui ahyehyɛde ahorow, na wonnya abatow mu kyɛfa de suasua Kristo, wɔn kannifo no. (Yoh. 6:15; 18:36) Nea enti a wɔapaw gyinabea yi ne sɛ “wiase nyinaa da ɔbɔne no [tumi] mu,” enti obiara a “ɔpɛ sɛ ɔyɛ wiase adamfo no gyina hɔ sɛ Onyankopɔn tamfo.”—1 Yoh. 5:19; Yak. 4:4; fa toto Mateo 4:8-10 ho.

⁴ So eyi kyerɛ sɛ Yehowa Adansefo nnwen ɔman a wɔte mu no yiyedi ho? Ɛnte saa koraa! Sɛ nokware Kristofo no, wɔkɔ so yɛ ɔmamma pa denam wɔn tow ahorow a wotua daa, ne ɔman nkɔso nnwuma a wɔyɛ bi no so. Wokura abrabɔ pa mu nso wɔ fie, sukuu, ne wɔn nnwuma mu. Ɛdenam abrabɔ bɔne, asabow, nnuru a wɔde di dwuma ɔkwammɔne so, ne nnebɔne afoforo a nokware Kristofo kwati so no, wɔmma ɔman no haw ahorow nyɛ pii, na mmom wɔboa ma emu asetra yɛ papa.

⁵ Nokware Kristofo ahu afi Bible no mu sɛ Onyankopɔn Ahenni a ɛrenkyɛ ebedi asase no so no na ɛwɔ adesamma haw ahorow pii no ano aduru koro pɛ a ɛtra hɔ daa no. (Dan. 2:44; Adi. 21:3-5) Enti, sɛ anka Yehowa Adansefo de wɔn ho bɛhyɛ amammuisɛm mu akyinnyegye mu mmom no, wɔde nnamyɛ boa wɔn mpɔtam hɔfo ma wɔnantew ɔkwan a ɛkɔ daa nkwa mu no so. (1 Tim. 4:8; Yoh. 3:16) Bere a nokware Kristofo de wɔn adwene si Ahenni no ho nokware anidaso so no, wokura wɔn biakoyɛ ne afã biara a wonni no mu wɔ wiase a emu apaapae mu.—1 Kor. 1:10; 1 Pet. 4:8.

So Yebetumi Ama Wɔasan Anya Anigye?

¹ “Anigye ne wɔn a wɔn honhom mu nneɛma ho hia wɔn.” (Mat. 5:3, New World Translation) Saa nsɛm a Yesu kae wɔ Bepɔw so Asɛnka no mu no kyerɛ biribi. Adesamma pii nhu sɛ wohia honhom mu nneɛma na ama wɔanya anigye ne atirimpɔw wɔ wɔn asetra mu. Nanso ebinom wɔ hɔ a, na bere bi honhom mu nneɛma ho hia wɔn, nanso afei de ɛnte saa bio. Biribi nti, wɔamma honhom mu nneɛma ho anhia wɔn bio. Wɔtwee wɔn ho fii ade ankasa a ɛyɛ mfaso ma wɔn ho. Asemmisa no ne sɛ, So yebetumi ama saafo no asan anya anigye bio? Anigyesɛm ne sɛ yebetumi ama ebinom ayɛ saa.

² Ebia wunim obi a ɔne Yehowa Adansefo suaa Bible no mfe bi a atwam ni, ebia na ɔyɛ abofra mpo, nanso wankɔ so ne Onyankopɔn nkurɔfo ammɔ. Nanso, ebia na wɔde Bible nkyerɛkyerɛ ne trenee nnyinasosɛm ahorow bi ahyɛ saa onii no adwenem, ma ɔda so ara kae. Bere a wiase no mu tebea kɔ so sɛe, na asetra mu nsɛm tebea sakra no, onipa no kae nneɛma a wasua dedaw no, na ebia ɔbɛdan aba Onyankopɔn nkyɛn, na wayɛ krado sɛ obenya Bible mu nimdeɛ pii. Saafo a yɛbɛkɔ wɔn nkyɛn a atirimpɔw no ne sɛ yɛbɛsan ne wɔn akɔyɛ Bible adesua no so betumi aba mfaso a ɛsen biara.

³ Nokwarem no, ɛsɛ sɛ wobɔ mmɔden wɔ bere ne bere mu sɛ wobɛkɔ wɔn a wɔbaa Nkaedi afahyɛ no nkyɛn. Ma wonhu sɛ wudwen wɔn honhom mu yiyedi ho ankasa, na ka kyerɛ wɔn sɛ wo ne wɔn besua Bible no. Ɛsɛ sɛ yɛbɔ mmɔden titiriw sɛ yɛbɛboa nnipa a wɔbaa “Wɔn a Wɔpɛ Onyankopɔn Ahofadi” Ɔmantam Nhyiam no, ne nnanu anaa dakoro nhyiam a yɛyɛe nnansa yi wɔ ɔmansin no mu no. Wɔ tebea horow bi mu no, ebetumi ayɛ nea mfaso wɔ so sɛ ɔdawurubɔfo foforo bɛkɔ obi a nkɔso a onnya nti wogyaee adesua no nkyɛn.

⁴ Nokwarem no, yɛhwɛ kwan sɛ nnipa a yɛne wɔn sua ade no bebu Yehowa som aniberesɛm, na wɔada nsiyɛ bi adi wɔ wɔn Bible adesua no mu. Nanso yɛn de, yɛpɛ sɛ yɛhwɛ hu sɛ yɛabɔ mmɔden a ɛsɛ de aboa, na yɛte nka wɔ afoforo ho sɛ ɔsomafo Paulo bere a ɔkae sɛ, ‘Me ho afi nnipa nyinaa mogya ho’ no.—Aso. 20:26.