Adesua 1

Sɛnea Wubetumi Ahu Nea Onyankopɔn Hwehwɛ

Asɛm a ɛho hia bɛn na ɛwɔ Bible no mu? (1)

Hena ne Bible no kyerɛwfo? (2)

Dɛn nti na ɛsɛ sɛ wusua Bible no? (3)

1. Bible no yɛ akyɛde a ɛsom bo a efi Onyankopɔn hɔ. Ɛte sɛ krataa a agya bi a ɔwɔ ɔdɔ de kɔma ne mma. Ɛka Onyankopɔn ho nokwasɛm kyerɛ yɛn—onii ko a ɔyɛ ne ne gyinapɛn ahorow. Ɛkyerɛkyerɛ sɛnea yebetumi agyina ɔhaw ahorow ano ne sɛnea yebenya nokware anigye mu. Bible no nkutoo na ɛka nea ɛsɛ sɛ yɛyɛ na yɛasɔ Onyankopɔn ani kyerɛ yɛn.—Dwom 1:1-3; Yesaia 48:17, 18.

2. Nnipa ahorow bɛyɛ 40 na wɔde mfe bɛboro 1,600 kyerɛw Bible no, na wofii ase wɔ 1513 A.Y.B. mu. Ɛyɛ nhoma nketewa 66. Onyankopɔn na ɔde ne honhom kaa wɔn a wɔkyerɛw Bible no. Ne nsusuwii na wɔkyerɛwee, na ɛnyɛ wɔn de. Enti Onyankopɔn a ɔwɔ soro no ne Bible no Kyerɛwfo, na ɛnyɛ asase so nipa biara.—2 Timoteo 3:16, 17; 2 Petro 1:20, 21.

3. Onyankopɔn hwɛ ma wɔkyerɛw Bible no pɛpɛɛpɛ na wɔkoraa so. Wɔatintim Bible pii sen nhoma foforo biara. Ɛnyɛ obiara na n’ani begye ho sɛ obehu sɛ woresua Bible no, nanso mma ɛno mmma wunnnyae. Wo daakye a ɛbɛtra hɔ daa no gyina Onyankopɔn a wubehu no na woayɛ n’apɛde a ɔsɔretia biara mfa ho so.—Mateo 5:10-12; Yohane 17:3.