Fa Nsɛmma Nhoma Ma Wɔ W’asɛnka Adwuma Mu

1, 2. Ɔkwan bɛn so na Ɔwɛn-Aban ne Nyan! no aka nkurɔfo abrabɔ?

¹ “Emu nsɛm yɛ anigye, ɛba wɔ ne bere mu na ɛhyɛ nkuran nso.” “Ɛyɛ nsɛmma nhoma a ɛhyɛ nkuran paa sen nea makenkan pɛn biara.” Saa nsɛm yi kyerɛkyerɛ sɛnea Ɔwɛn-Aban ne Nyan! akenkanfo a wɔwɔ wiase nyinaa te nka wɔ ho no mu. Nokwarem no, ɛda adi sɛ yɛn nsɛmma nhoma no yɛ nnwinnade a ɛsom bo a yɛnam so de asɛmpa no du “nnipa nyinaa” nkyɛn.—1 Tim. 2:4.

² Oguadini bi a adwuma agye ne ti nsa kaa Nyan! nsɛmma nhoma bi a na emu nsɛm yɛ no anigye paa. Akyiri yi ɔkenkan Ɔwɛn-Aban a ɛka Nyan! ho no, na emu asɛm bi kanyan no ma ɔhwehwɛɛ Baasakoro nkyerɛkyerɛ a na ɔde bere tenten agye adi no mu. Eyi kanyan n’anigye kɛse. Asram asia akyi no, ɔbɔɔ asu. Na ɔbarima foforo nso gye nsɛmma nhoma no bi daa nanso na ɔnkenkan. Nea ɛne eyi bɔ abira no, na ne yere mpɛ Adansefo no anim ahwɛ nanso na ɔkenkan nsɛmma nhoma a wɔde gyaw ne kunu no. Bible mu bɔhyɛ a ɛfa paradise a ɛbɛba asase so a atreneefo nkutoo na wɔbɛtra mu ho no kaa ne koma. Bere bi akyi no, ɔbea no, ne babarima ne ɔbea no nuabea kumaa bɛyɛɛ Yehowa asomfo.

3. Sɛ yɛde nsɛmma nhoma abien no nyinaa ma a, mfaso bɛn na ɛwɔ so?

³ Fa Abien no Nyinaa Ma: Sɛnea nhwɛso a yɛaka ho asɛm kyerɛ no, yɛrentumi nhu nnipa a wɔbɛkenkan yɛn nsɛmma nhoma no ne emu nea ɛbɛkanyan wɔn anigye. (Ɔsɛnk. 11:6) Ne saa nti, mfaso wɔ so sɛ yɛde Ɔwɛn-Aban ne Nyan! no nyinaa bom ma, ɛwom sɛ biako pɛ na yɛbɛka ho asɛm bere a yɛde rema no de. Wɔ tebea horow bi mu no, ebia ɛbɛyɛ papa sɛ wode yɛn nsɛmma nhoma horow pii ma wɔ nsrahwɛ bi mu.

4. Nhyehyɛe bɛn na yebetumi ayɛ de akɔkyekyɛ nsɛmma nhoma?

⁴ Mfaso wɔ so sɛ dapɛn biara yɛyɛ nhyehyɛe de dakoro kyekyɛ nsɛmma nhoma. Wɔ 2005 Calendar of Jehovah’s Witnesses so no, wɔayi Memeneda biara asi hɔ sɛ “Nsɛmma Nhoma Kyekyɛ Da.” Nokwarem no, esiane sɛ ɛsono sɛnea beae biara te na ɛsono ankorankoro nsɛm tebea nti, ebia ebinom beyi da foforo asi hɔ a wɔde bɛkyekyɛ yɛn nsɛmma nhoma no. So eyi ka wo dapɛn biara bere nhyehyɛe ho?

5. Hokwan a ɛbɛma yɛatumi de nsɛmma nhoma ama bɛn na ɛsɛ sɛ yɛma yɛn ani ku ho, na dɛn na ebetumi aboa yɛn ama yɛayɛ saa?

⁵ Fa Botae Bi Si W’ani So: Nsɛmma nhoma dodow a yɛpɛ sɛ yɛde ma ɔsram biara ho botae a yɛde besi yɛn ani so no betumi aboa ma yɛn ani aku nsɛmma nhoma a yɛde bɛma no ho paa. Wowɔ nnipa a woma wɔn nsɛmma nhoma bere nyinaa? Wode nsɛmma nhoma ma wɔn a wuhyia wɔn wɔ asɛnka mu no? Wubetumi de nsɛmma nhoma ama wɔ mmɔnten so, asasesin a nnwuma wom anaa wɔ baguam?

Boa Wɔn Ma Wɔnkɔ So Nni Wɔn Adanse

¹ Bere a yɛka asɛmpa no, yɛtaa hyia nnipa a wɔnte yɛn asasesin mu anaa yɛnte wɔn kasa. Kasa no bi ne mum kasa. Afoforo a yɛne wɔn taa bɔ Bible mu nkɔmmɔ no tumi tu fi yɛn asasesin mu kɔ. Yɛbɛyɛ dɛn ayɛ nhyehyɛe ama saafo no, na ama afoforo akɔ so adi wɔn adanse? Ɛne sɛ yɛde Please Follow Up (S-43) kratasin no bedi dwuma.

² Mpɛn pii no nnipa tie asɛm no yiye bere a yɛka asɛmpa no wɔ wɔn kurom kasa mu no. (Aso. 22:1, 2) Eyi nti, mpɛn pii no sɛ yehyia obi na sɛ yɛnte ne kasa a, ɛsɛ sɛ yɛhyehyɛ Please Follow Up (S-43) kratasin no bere mpo a onii no nkyerɛ Ahenni nkrasɛm no ho anigye no. Nanso sɛ nnipa dodow bi a wɔka ɔman foforo so kasa te baabi a wɔtaa de wɔn kasa di wɔn adanse a, ebia ɛho renhia sɛ wohyehyɛ kratasin no bi, gye sɛ onipa no akyerɛ asɛm no ho anigye ansa.

³ Kratasin No a Wobɛhyehyɛ: Bɔ mmɔden fa anifere kwan so nya onipa no din, n’address ne ne telefon nɔma. Kyerɛ mpɛnpɛnso a asɛm no ho anigye a wanya no akodu, bere a wobenya onipa no, nhoma a wode maa no anaa obisae, ɛne kasa a onii no tumi ka no yiye. Bere a woahyehyɛ kratasin no awie no, fa ma asafo mu kyerɛwfo no ntɛm ara, na ɔno nso de bɛma asafo anaa kuw a ɛfata ma wɔadi ho dwuma.

⁴ Kratasin No a Wode Bɛma: Sɛ ɛba sɛ ɔkyerɛwfo no nhu asafo anaa kuw a ɛsɛ sɛ ɔde kratasin no kɔma wɔn anaa onni wɔn address a, obetumi afrɛ Betel wɔ telefon so abisa “Territory Desk” (Dwumadibea a Ɛhwɛ Nsasesin So) no na obenya ho nsɛm pii. Sɛ ɔde kratasin no remena a, ɛho nhia bio sɛ ɔka kyerɛ kuropɔn sohwɛfo no.

⁵ Bere biara a asafo anaa kuw bi nsa bɛka Please Follow Up kratasin a wɔahyehyɛ no, ɛsɛ sɛ wɔyɛ nhyehyɛe kɔhwehwɛ onii no ntɛm. Bere a yɛde nsi yɛ nea yebetumi nyinaa no, yebetumi anya ahotoso sɛ Yehowa bebue wɔn a “wɔayi wɔn ama daa nkwa no” koma mu ma wɔatie asɛm no.—Aso. 13:48.