Nea Ɛbɛma Yɛatu Mpɔn wɔ Asɛnka Mu—Tete Bible Asuafo Ma Wɔn Ani Nnye Adesua Ho

Nea Enti a Ɛho Hia: Sɛ Bible asuafo gye bere sua nneɛma foforo ka nea wɔnim dada ho a, ɛbɛma wɔanya nkɔso ntɛmtɛm. (Heb. 5:12–6:1) Ɛgye animia na obi atumi asua adeɛ yie. Sɛ obi resua adeɛ a, ɔhwehwɛ nneɛma foforo ka nea ɔnim dada ho na ɔhwɛ sɛnea ɔbɛtumi de ayɛ adwuma. (Mmeb. 2:1-6) Sɛ yɛboa Bible suani no ma ɔno ara tumi yɛ nhwehwɛmu a, ɛrenyɛ den mma no sɛ ɔbɛnya nsɛmmisa ahorow ho mmuaeɛ wɔ yɛn nwoma mu. Sɛ asuafo no bɔ mmɔden de nea wɔresua yɛ adwuma a, ɛbɛsiesie wɔn na sɛ daakye wɔhyia sɔhwɛ wɔ wɔn som mu a, wɔatumi agyina ano.—Luka 6:47, 48.

Ɔkwan a Wobɛfa so Ayɛ:

Ma ɔnhu sɛ ɔrebɛsua adeɛ a, ɛsɛ sɛ ɔdi kan bɔ Yehowa mpaeɛ.—Yoh. 14:26; 1 Kor. 2:10.
Wonya Bible suani foforo a, ahyɛase no ara hyɛ no nkuran ma ɔnni nkan nsua nwoma no ansa na moahyia. Fa wo nwoma no kyerɛ no na ɔnhu sɛ woatwitwa nsɛntitiriw no nko ara ase; ɛbɛma ɔno nso ayɛ saa.
Moresua adeɛ a, ma osuani no mfa ɔno ara ne nsɛm mma mmuaeɛ. Mma adesua no nyɛ nsɛmmisa ne mmuaeɛ nko ara; anyɛ saa a, osuani no bɛkenkan mmuaeɛ no afi nwoma no mu kɛkɛ.
Hyɛ osuani no nkuran ma ɔnkenkan Bible daa. Fa Bible akenkan ho nhyehyɛe a ɛwɔ jw.org so no kyerɛ no. Wei bɛboa ma wahu ɔkwan a ɔbɛfa so ayɛ no. Ɛgye animia na obi atumi akenkan Bible no daa, nanso sɛ ɔyere ne ho yɛ saa a, ɔbɛnya mfaso pii.—Dw. 1:2, 3.
Kyerɛ osuani no sɛnea ɔbɛnya nsɛmmisa ahorow ho mmuaeɛ wɔ Watchtower Library anaa Watchtower INTANƐT SO NHOMAKORABEA. Boa no ma ɔnhu nwoma a yɛtaa sua wɔ Ahenni Asa so no ahyɛnsodeɛ. (Nhwɛso ni: be gyina hɔ ma Nya Teokrase Ɔsom Sukuu Adesua So Mfaso; ia gyina hɔ ma Suasua Wɔn Gyidi; my gyina hɔ ma Me Nhoma a Ɛka Bible Mu Nsɛm.)

Sɔ Wei Hwɛ Bosome Yi Mu:

Mosusu asɛmti anaa ɔfã bi ho wie a, ma osuani no mmɔ nea wasua no mua. Sɛ wonni Bible suani a, ɛnneɛ worekenkan Bible anaa woresua Ɔwɛn-Aban a, bɔ mmɔden sɛ wobɛbɔ nea woasua no mua. Wei bɛboa ama woate aseɛ yie.