ASƐM A ƐDA SO | WOBƐTUMI AFA ONYANKOPƆN ADAMFOƆ
Dɛn na Ɛkyɛn Wei?
Sɛ wopɛ sɛ wo ne Onyankopɔn nya ayɔnkofa papa a, dɛn na wobɛtumi ayɛ? Yɛadi kan ahu sɛ sɛ wofa akwan a ɛdidi so yi so a, wobɛtumi afa no adamfoɔ:
Ɛsɛ sɛ wohu Onyankopɔn din Yehowa no na wobɔ.
Ɛsɛ sɛ wo ne no bɔ nkɔmmɔ daa. Ɔkwan a wobɛfa so ayɛ saa ne sɛ daa wobɛbɔ mpaeɛ na woasua n’Asɛm Bible.
Kɔ so yɛ nea Yehowa pɛ.
Wopɛ sɛ woyɛ Onyankopɔn adamfo a, ɛnneɛ hu ne din na bɔ, bɔ no mpaeɛ, sua n’Asɛm, na yɛ nea ɔpɛ
Wohwɛ nea yɛaka yi a, woreyɛ wo fam deɛ na ama woabɛn Onyankopɔn? Anaasɛ aka kakra? Ɛwom, ne yɛ nna fam, nanso emu nhyira dɔɔso.
Ɔbaa bi a wɔfrɛ no Jennifer a ɔfiri United States kaa sɛ, “Woyɛ wo fam deɛ sɛ wobɛfa Onyankopɔn adamfoɔ a, ɛrenyɛ ɔbrɛguo da. Wo ne Onyankopɔn adamfofa no bɛma woanya nhyira pii. Ebi ne sɛ, ɛbɛma Onyankopɔn mu gyidie a wowɔ no ayɛ kɛse. Wobɛhu sɛnea ɔte ankasa, na ɔdɔ a wowɔ ma no no nso bɛyɛ kɛseɛ. Dɛn na ɛkyɛn wei?”
Sɛ wopɛ sɛ wo ne Onyankopɔn fa adamfoɔ a, Yehowa Adansefoɔ ani bɛgye sɛ wɔbɛboa wo. Wɔbɛtumi ne wo asua Bible a wɔnnye wo sika biara. Yɛsan to nsa frɛ wo sɛ bra yɛn Ahennie Asa so bɛsua nneɛma pii fi Bible mu. Woba a, wobɛnya hokwan ne nnipa a wɔyɛ Onyankopɔn nnamfo abɔ.a Woyɛ saa a, wo nso wobɛte nka te sɛ ɔdwontofoɔ a ɔtwerɛɛ Bible mu asɛm yi: “Me deɛ, Onyankopɔn a mɛbɛn no no yɛ ma me.”—Dwom 73:28.
a Wopɛ sɛ obi ne wo bɛsua Bible anaa wokɔ Ahennie Asa a ɛbɛn wo so a, yɛsrɛ wo, wo ne nea ɔde nhoma yi brɛɛ wo no nkasa. Wobɛtumi nso akɔ yɛn Wɛbsaet, www.jw.org/tw. Wokɔ hɔ a, klik ɔfã a wɔato din WO NE YƐN NNI NKITAHO a ɛwɔ aseɛ hɔ no so.