“Upendo Alio Nao Kristo Hutuchochea”

1-2. (a) Huenda tukapatwa na hisia gani tunapotafakari maisha na huduma ya Yesu? (b) Tutajifunza nini katika makala hii?

TUNAPOFIWA na mpendwa wetu, tunamkosa sana mtu huyo! Mwanzoni, huenda tukahisi uchungu mwingi tunapokumbuka siku za mwisho kabla ya kifo chake, hasa ikiwa mpendwa wetu aliteseka kabla ya kufa. Hata hivyo, baada ya muda kupita, tunaanza kupata shangwe tunapofikiria kuhusu jambo ambalo alitufundisha au jambo alilofanya au kusema ili kututia moyo au kutufanya tutabasamu.

² Vivyo hivyo, tunahuzunika tunaposoma kuhusu mateso na kifo cha Yesu. Wakati wa majira ya Ukumbusho, sisi hutumia wakati hasa kutafakari umuhimu wa fidia ya Yesu. (1 Kor. 11:24, 25) Hata hivyo, tunapata shangwe nyingi tunapotafakari mambo yote ambayo Yesu alisema na kufanya alipokuwa duniani. Pia, tunatiwa moyo tunapofikiria kuhusu mambo anayofanya sasa na mambo atakayotufanyia wakati ujao. Kutafakari kuhusu mambo hayo na upendo wake kwetu, kunaweza kutuchochea kuonyesha shukrani kwa njia hususa, kama tutakavyoona kwenye makala hii.

TUNACHOCHEWA NA SHUKRANI KUMFUATA YESU

3. Tuna sababu gani za kuonyesha shukrani kwa ajili ya fidia?

³ Tunakuwa wenye shukrani tunapotafakari maisha na kifo cha Yesu. Katika huduma yake yote duniani, Yesu aliwafundisha watu kuhusu baraka ambazo Ufalme wa Mungu utaleta. Tunathamini sana kweli hizo za Ufalme. Tunathamini fidia kwa sababu inatufungulia njia ya kufurahia uhusiano wa karibu pamoja na Yehova na Yesu. Wale wanaoonyesha imani katika Yesu pia wana tumaini la kuishi milele na kuwaona tena wapendwa wao waliokufa. (Yoh. 5:28, 29; Rom. 6:23) Hatujafanya jambo lolote ili tustahili baraka hizo; wala hatuwezi kumlipa Mungu na Kristo kwa mambo ambayo wametufanyia. (Rom. 5:8, 20, 21) Lakini tunaweza kuonyesha shukrani zetu. Jinsi gani?

4. Maria Magdalene alionyeshaje shukrani kwa jambo ambalo Yesu alimfanyia? (Tazama picha.)

⁴ Fikiria mfano wa mwanamke Myahudi aliyeitwa Maria Magdalene. Alikuwa akiteseka sana kwa sababu ya kusumbuliwa na roho saba waovu. Bila shaka, alihisi kwamba hangepata msaada wowote. Basi wazia jinsi alivyokuwa mwenye shukrani Yesu alipomweka huru kutoka kwa wale roho waovu! Alichochewa na shukrani kuwa mfuasi wake na kutumia wakati, nguvu, na mali zake kumuunga mkono katika huduma. (Luka 8:1-3) Ingawa Maria alithamini sana jambo ambalo Yesu alimfanyia kibinafsi, huenda hakuelewa kwamba angepokea zawadi kubwa hata zaidi wakati ujao. Yesu angetoa uhai wake kwa ajili ya wanadamu, “ili kila mtu anayemwamini” afurahie uzima wa milele. (Yoh. 3:16) Hata hivyo, bado Maria alionyesha uthamini kumwelekea Yesu kwa kuwa mshikamanifu. Yesu alipokuwa akiteseka kwenye mti wa mateso, Maria alikuwa amesimama hapo karibu ili kumfariji Yesu na wengine. (Yoh. 19:25) Baada ya Yesu kufa, Maria na wanawake wengine wawili walileta manukato kwenye kaburi kwa ajili ya maziko ya Yesu. (Marko 16:1, 2) Maria alibarikiwa sana kwa sababu ya ushikamanifu wake. Alipata shangwe ya kukutana na Yesu aliyefufuliwa na kuzungumza naye—pendeleo ambalo wanafunzi wengi hawakupata.—Yoh. 20:11-18.

5. Tunawezaje kuonyesha shukrani kwa mambo yote ambayo Yehova na Yesu wametufanyia?

⁵ Sisi pia tunaweza kuonyesha shukrani kwa mambo yote ambayo Yehova na Yesu wametufanyia kwa kutumia wakati, nguvu, na mali zetu za kimwili kuendeleza kazi ya Ufalme. Kwa mfano, tunaweza kujitolea kusaidia ujenzi na udumishaji wa majengo yanayotumiwa katika ibada safi.

KUMPENDA YEHOVA NA YESU HUTUCHOCHEA KUWAPENDA WENGINE

6. Kwa nini tunaweza kusema kwamba fidia ni zawadi ambayo kila mmoja wetu amepewa kibinafsi?

⁶ Tunapofikiria jinsi Yehova na Yesu wanavyotupenda sana, tunachochewa kuwapenda wao pia. (1 Yoh. 4:10, 19) Tunawapenda hata zaidi tunapotambua kwamba Yesu alikufa kwa ajili yetu binafsi. Mtume Paulo alitambua jambo hilo na kuonyesha shukrani zake alipowaandikia hivi Wagalatia: “Mwana wa Mungu, [alinipenda] na kujitoa mwenyewe kwa ajili yangu.” (Gal. 2:20) Kwa msingi wa fidia, Yehova amekuvuta kwake ili uweze kuwa rafiki yake. (Yoh. 6:44) Je, huhisi shangwe moyoni kujua kwamba Yehova ameona jambo zuri ndani yako na amelipa bei kubwa zaidi ili uhesabiwe kuwa rafiki yake? Je, hilo haliimarishi upendo wako kwa Yehova na Yesu? Tunapaswa kujiuliza hivi, ‘Upendo huo utanichochea mimi kufanya nini? ’

7. Sisi sote tunawezaje kuonyesha upendo wetu kwa Yehova na Yesu, kama inavyoonyeshwa kwenye picha? (2 Wakorintho 5:14, 15; 6:1, 2)

⁷ Upendo wetu kwa Mungu na Kristo hutuchochea kuwaonyesha wengine upendo. (Soma 2 Wakorintho 5:14, 15; 6:1, 2.) Njia moja tunayoonyesha upendo wetu ni kwa kushiriki kwa bidii katika kazi ya kuhubiri. Tunazungumza na kila mtu tunayekutana naye. Hatumbagui mtu yeyote kwa sababu ya jamii, kabila, hali yake ya kifedha, au jinsi anavyoonekana katika jamii. Kwa njia hiyo, tunatenda kupatana na kusudi la Yehova kwamba “watu wa namna zote waokolewe na kupata ujuzi sahihi wa kweli.”​—1 Tim. 2:4.

8. Tunawezaje kuwaonyesha upendo ndugu na dada zetu?

⁸ Pia, tunathibitisha upendo wetu kwa Mungu na Kristo kwa kuwaonyesha upendo ndugu na dada zetu. (1 Yoh. 4:21) Tunapendezwa nao kibinafsi na kuwasaidia wanapokabili majaribu. Tunawafariji wanapofiwa na mpendwa wao, tunawatembelea wanapokuwa wagonjwa, na tunafanya yote tunayoweza ili kuwafariji wanapovunjika moyo. (2 Kor. 1:3-7; 1 The. 5:11, 14) Tunaendelea kusali kwa ajili yao, tukikumbuka kwamba “dua ya mtu mwadilifu ina nguvu nyingi.”—Yak. 5:16.

9. Ni kwa njia gani nyingine tunaweza kuwaonyesha ndugu na dada zetu upendo?

⁹ Pia, tunawaonyesha upendo ndugu na dada zetu kwa kujitahidi kudumisha amani pamoja nao. Tunajitahidi kumwiga Yehova kwa kusamehe. Ikiwa Yehova alikuwa tayari kumwacha Mwana wake afe kwa ajili ya dhambi zetu, je, hatupaswi kuwa tayari kuwasemehe ndugu na dada zetu wanapotutendea dhambi? Hatungependa kuwa kama yule mtumwa mwovu, aliyetajwa katika mfano mmoja wa Yesu. Hata baada ya bwana wake kufuta deni lake kubwa sana, mtumwa huyo alikosa kumsamehe mtumwa mwenzake ambaye alikuwa na deni dogo zaidi. (Mt. 18:23-35) Ikiwa hali ya kutoelewana imetokea kati yako na mtu fulani kutanikoni, je, unaweza kuchukua hatua ya kwanza ili kufanya amani kabla ya kuhudhuria Ukumbusho? (Mt. 5:23, 24) Ukifanya hivyo utaonyesha kwamba unampenda sana Yehova na Yesu.

10-11. Wazee wanaweza kuonyeshaje upendo wao kwa Yehova na Yesu? (1 Petro 5:1, 2)

¹⁰ Wazee wa kutaniko wanaweza kuonyeshaje kwamba wanampenda Yehova na Yesu? Njia muhimu ni kwa kushughulikia mahitaji ya kondoo wa Yesu. (Soma 1 Petro 5:1, 2.) Yesu alimtajia waziwazi jambo hilo mtume Petro. Baada ya kumkana Yesu mara tatu, Petro alitamani sana kuthibitisha kwamba anampenda Yesu. Baada ya kufufuliwa, Yesu alimuuliza hivi Petro: “Simoni mwana wa Yohana, je, unanipenda?” Tunaweza kuwa na uhakika kwamba Petro angefanya jambo lolote ili kuthibitisha kwamba anampenda Bwana wake. Yesu alimwambia hivi Petro: “Chunga kondoo wangu wadogo.” (Yoh. 21:15-17) Na katika kipindi chote cha maisha yake, Petro aliwatunza kwa wororo kondoo wa Bwana, na kuthibitisha kwamba alimpenda Yesu.

¹¹ Wazee, wakati wa majira ya Ukumbusho mnawezaje kuonyesha kwamba maneno ambayo Yesu alimwambia Petro ni muhimu kwenu? Unaweza kuonyesha jinsi unavyompenda sana Yehova na Yesu kwa kufanya kwa ukawaida ziara za uchungaji na kufanya jitihada za pekee kuwasaidia wale wasiotenda wamrudie Yehova. (Eze. 34:11, 12) Pia, unaweza kupendezwa na wanafunzi wa Biblia na wapya wanaohudhuria Ukumbusho, ukifanya yote unayoweza kuwafanya wahisi kwamba wamekaribishwa kwa sababu tunatumaini wao pia watakuwa wafuasi wa Yesu.

KUMPENDA KRISTO HUTUCHOCHEA KUWA NA UJASIRI

12. Kwa nini kutafakari maneno ambayo Yesu alisema usiku wa kabla ya kifo chake kunatupatia ujasiri? (Yohana 16:32, 33)

¹² Usiku wa kabla ya kifo chake, Yesu aliwaambia hivi wanafunzi wake: “Ulimwenguni mtapata dhiki, lakini jipeni moyo! Mimi nimeushinda ulimwengu.” (Soma Yohana 16:32, 33.) Ni nini kilichomsaidia Yesu kukabiliana na maadui wake kwa ujasiri na kuendelea kuwa mwaminifu hadi kifo? Alimtegemea Yehova. Akijua kwamba wafuasi wake wangekabili majaribu kama hayo, Yesu alimwomba Yehova awalinde. (Yoh. 17:11) Kwa nini hilo linatupa ujasiri? Kwa sababu Yehova ana nguvu kuliko adui zetu wote. (1 Yoh. 4:4) Anaona mambo yote. Tuna uhakika kwamba ikiwa tutamtegemea Yehova, tunaweza kushinda woga wetu na kuonyesha ujasiri.

13. Yosefu wa Arimathea alionyeshaje ujasiri?

¹³ Fikiria mfano wa Yosefu wa Arimathea. Aliheshimiwa sana na Wayahudi. Alikuwa mshiriki wa Sanhedrini, mahakama kuu ya Wayahudi. Hata hivyo, wakati wa huduma ya Yesu duniani, Yosefu alikosa ujasiri. Yohana alisema kwamba alikuwa “mwanafunzi wa Yesu lakini kwa siri kwa sababu aliwaogopa Wayahudi.” (Yoh. 19:38) Ingawa Yosefu alipendezwa na ujumbe wa Ufalme, hakutaka wengine wajue kwamba alikuwa na imani katika Yesu. Bila shaka, aliogopa kwamba angepoteza cheo chake chenye kuheshimika katika jamii. Hata hivyo, Biblia inatuambia kwamba baada ya Yesu kufa, mwishowe Yosefu “[alijipa] moyo na kwenda kwa Pilato, akaomba apewe mwili wa Yesu.” (Marko 15:42, 43) Sasa ilikuwa wazi kwamba Yosefu alikuwa mwanafunzi wa Yesu.

14. Unapaswa kufanya nini ikiwa unapambana na woga wa wanadamu?

¹⁴ Je, umewahi kuogopa wanadamu kama alivyofanya Yosefu? Unapokuwa shuleni au kazini, je, wakati mwingine wewe huaibika kujitambulisha kuwa Shahidi wa Yehova? Je, unasitasita kuwa mhubiri au kubatizwa kwa sababu unaogopa jinsi ambavyo huenda watu wakafikiri kukuhusu? Usiruhusu hisia hizo zikuzuie kufanya jambo unalojua kwamba ni sahihi. Sali kwa bidii kwa Yehova. Mwombe akupe ujasiri wa kufanya mapenzi yake. Unapoona jinsi Yehova anavyojibu sala zako, utakuwa mwenye nguvu na ujasiri zaidi.​—Isa. 41:10, 13.

SHANGWE HUTUCHOCHEA KUMTUMIKIA YEHOVA BILA KUACHA

15. Baada ya Yesu kuwatokea wanafunzi wake, shangwe yao iliwachochea kufanya nini? (Luka 24:52, 53)

¹⁵ Wanafunzi walihuzunika sana Yesu alipokufa. Jiwazie ukiwa katika hali yao. Hawakuwa tu wamempoteza rafiki yao mpendwa, bali pia walihisi kana kwamba wamepoteza tumaini. (Luka 24:17-21) Hata hivyo, Yesu alipowatokea, alitumia muda ili kuwasaidia waelewe jukumu lake katika kutimizwa kwa unabii wa Biblia. Pia, aliwapatia kazi muhimu. (Luka 24:26, 27, 45-48) Kufikia wakati ambapo Yesu alirudi mbinguni siku 40 baadaye, huzuni ya wanafunzi ilikuwa imegeuka na kuwa shangwe kubwa. Kujua kwamba Bwana wao alikuwa hai na tayari kuwasaidia watimize jukumu lao jipya, kuliwaletea furaha. Shangwe yao iliwachochea kumsifu Yehova bila kuacha.—Soma Luka 24:52, 53; Mdo. 5:42.

16. Tunawezaje kuwaiga wanafunzi wa Yesu?

¹⁶ Tunawezaje kuwaiga wanafunzi wa Yesu? Tunaweza kupata shangwe tunapomwabudu Yehova, si katika majira ya Ukumbusho tu, bali mwaka mzima. Hilo linamaanisha kutanguliza Ufalme wa Mungu maishani mwetu. Kwa mfano, wengi wamefanya marekebisho katika ratiba yao ya kazi ili waweze kushiriki katika huduma, kuhudhuria mikutano, na kufanya ibada ya familia kwa ukawaida. Hata wengine wameamua kuishi bila vitu vya kimwili ambavyo wengine wanaona kuwa vya lazima ili wafanye mengi zaidi kutanikoni au ili watumikie mahali ambapo kuna uhitaji mkubwa wa wahubiri wa Ufalme. Ingawa tunahitaji uvumilivu ili tuendelee kumtumikia Yehova, anaahidi kwamba atatubariki sana ikiwa tutatanguliza masilahi ya Ufalme maishani mwetu.​—Met. 10:22; Mt. 6:32, 33.

17. Umeazimia kufanya nini katika majira haya ya Ukumbusho? (Tazama picha.)

¹⁷ Tunatazamia kwa hamu kuadhimisha Ukumbusho siku ya Jumanne, Aprili 4. Hata hivyo, usisubiri mpaka wakati huo ili kutafakari kuhusu maisha na kifo cha Yesu na upendo ambao yeye na Yehova wametuonyesha. Tumia kila fursa katika majira yote ya Ukumbusho kufanya hivyo. Kwa mfano, tenga muda wa kusoma na kutafakari kuhusu matukio yaliyo kwenye chati “Juma la Mwisho la Maisha ya Yesu Duniani,” inayopatikana kwenye Nyongeza B12 ya Tafsiri ya Ulimwengu Mpya. Unapofanya hivyo, tafuta masimulizi ya Biblia yanayoimarisha shukrani, upendo, ujasiri, na shangwe yako. Kisha utambue njia hususa ambazo unaweza kuonyesha uthamini wako unaotoka moyoni. Unaweza kuwa na uhakika kwamba Yesu atathamini mambo yote unayofanya ili kumkumbuka katika majira ya Ukumbusho.​—Ufu. 2:19.