Génesis

20 Te Abrahán la stsob bael te campamento yuʼun, jich bajt ta skʼinal Négueb, jajch ta nainel ta yolil te Cadés sok te Sur. Kʼalal ayto ta nainel ta Guerar jich bitʼil jyanlum, 2 te Abrahán jich la yal ta stojol te Sara, te yinam: «Jaʼ kijtsʼin». Jaʼ yuʼun, te Abimélec, te ajwalil yuʼun Guerar, la yakʼ ta ikʼel tal ta stojol te Sara. 3 Ta patil, ta jun ajkʼabal te Dios la yakʼ sba ta ilel ta swayich te Abimélec sok jich la yalbey: «Yame xlajat ta skaj te ants te la atikun ta ikʼele, melel ayme smamalal». 4 Pero, te Abimélec mato sjokinoj ta wayel-a te Sara. Jaʼ yuʼun, jich la yal: «Jehová, ¿yabal alajin jun nación te yuʼun-nix maʼyuk smul-ae? 5 ¿Yuʼunbal ma jichuk la yalbon te Abrahán ‹Jaʼ kijtsʼin›? Sok ¿yuʼunbal ma jichuk la yalbon-euk te Sara ‹Jaʼ jbankil›?* Ma sokuk schopolil koʼtan te jich la jpase sok ma jnaʼoj-a te chopole».* 6 Te smelelil Dios jich la yalbey ta swayich: «Ya jnaʼ te ma sokuk schopolil awoʼtan te bin la apase. Jaʼ yuʼun ma la kakʼ te ya ajokin ta wayel te jich ya ata amul ta jtojole. 7 Jaʼ yuʼun sujtesa bael te ants ta stojol te smamalal, melel jaʼ j-alwanej. Yame skʼopon Dios ta atojol yuʼun maba ya xlajat-a. Pero, teme maba ya asujtes baele, ya kalbat ta jamal te jaʼat sok te machʼatik ay awuʼun, yame xlajex».

8 Buen sabto jajch te Abimélec, la stikun ta ikʼel te j-abatetik yuʼun sok la scholbey yaʼiyik te bin kʼot ta pasele. Bayal xiwik yuʼun. 9 Ta patil, te Abimélec la stikun ta ikʼel te Abrahán sok jich la yalbey: «¿Bin-a te la apasbone? ¿Bin jmul jtaoj ta atojol te la awakʼ te kʼan yalukon ta tulan mulil soknix te ya sta smul te wentainel kuʼune? Jkʼaxel ma lek te bin la apasbone». 10 Te Abimélec jich la yalbeyxan te Abrahán: «¿Bin yuʼun te jich la apase?». 11 Te Abrahán jich la yal: «Yuʼun jich la jnop ta koʼtan: ‹Te ants winiketik ta lugar ini maba ya xiʼik* te Diose, jich yuʼun yananix smilonik-a ta swenta te kiname›. 12 Ta melel, jaʼnix kijtsʼin-a, melel jun-nax te jtatik jaʼ yanyantik-a te jnantike.* Pero, ta ora ini jaʼ kinamix. 13 Jaʼ yuʼun, kʼalal te Dios la yalbon ta mantal te yakuk kijkitay te sna te jtat sok te bayuk banti ya xboone, jich la kalbey te kinam: ‹Awokoluk, bayuk te banti ya xbootike, ala te jaʼ abankilone.* Jich ya awakʼ ta ilel ta jtojol te skʼuxul awoʼtan te ma x-ijkitaywane›».

14 Te Abimélec la yakʼ ta ikʼel tal tuminchijetik, wakaxetik sok j-abatetik, jich la yakʼbey te Abrahán. Jaʼnix jich la yakʼbey sujtel te Sara, te yiname. 15 Te Abimélec jich la yalbeyxan: «Ay ta akʼab te kʼinale. Ya xjuʼ ya xnainat te banti ya amulane». 16 Yan te Sara jich la yalbey: «Ya kakʼbey jmil sejp plata te abankile.* Jich ya yichʼ naʼel te maʼyuk amul ta sit spisil te machʼatik ajokinoj sok te yantik ants winiketik. Jich maʼyuk machʼa ya xjuʼ ya slebat amul». 17 Jaʼ yuʼun, te Abrahán la skʼanbey wokol te smelelil Dios, jich te Dios la slekubtes te Abimélec, te yinam sok te j-abat antsetik yuʼun, jich jajch sta yalik. 18 Melel te Jehová la yakʼ te ma sta yalik spisil te antsetik te ayik ta sna te Abimélec ta swenta te Sara, te yinam te Abrahán.