Génesis

21 Te Jehová la snaʼ te Sara jich te bitʼil yalojix-ae, sok te Jehová la spas ta stojol te bin yalojbeyix-ae. 2 Te Sara la yikʼ yal ta schʼujt, jich la yakʼbey snichʼan te Abrahán te kʼalal mamalix-ae, kʼot ta pasel ta mero yorail jich te bitʼil albot ta jamal yuʼun te Diose. 3 Te Abrahán la yakʼbey sbiilin Isaac te alal te ayinelto,* te snichʼan te akʼbot yuʼun te Sara. 4 Te kʼalal swaxakebaltonax kʼajkʼal yayinel-a* te Isaac, te Abrahán la spasbey circuncisión jich te bitʼil pasot ta mantal yuʼun te Diose. 5 Kʼalal 100 yaʼbilal-a te Abrahán, ayin* te snichʼan jaʼ te Isaac. 6 Te Sara jich la yal: «La yakʼ tseʼejinon te Dios, spisil te machʼa ya yaʼiy stojol te bin kʼot ta pasel pajal ya stseʼejinon sok».* 7 Sok jich la yalxan: «Maʼyuk machʼa tal ta yoʼtan te yato jchuʼuntes alal. Pero lato kakʼbey snichʼan te Abrahán manchukme mamalix».

8 Chʼi te alal sok la yijkitay schuʼ. Te Abrahán la spas jun mukʼul kʼin te bin-ora la yijkitay schuʼ te Isaac. 9 Pero, te Sara la yil bitʼil te yal te Agar, te egipcia-ants, —te snichʼan te la yakʼbey te Abrahán— ya slaban te Isaac. 10 Jaʼ yuʼun, jich la yalbey te Abrahán: «¡Tena lokʼel te j-abat ants ini sok te yale! Te kal, Isaac, ma xjuʼ te pajal ya yichʼbat jilel te bintik ay awuʼun sok te yal te j-abat ini». 11 Te Abrahán bayal la smel yoʼtan ta swenta te bin la yal te Sara ta stojol te snichʼane.* 12 Te Dios jich la yalbey te Abrahán: «Ma xa amel awoʼtan yuʼun te bin la yal te Sara ta swenta te akerem sok te j-abat awuʼun. Aʼiybeya skʼop, melel te atsʼumbal te albil skʼoplale yame xchiknaj tal ta stojol te Isaac. 13 Pero, jaʼnix jich ya xlokʼ jun mukʼul nación ta swenta te yal te j-abat awuʼun, melel jaʼnix atsʼumbal-euk».

14 Te Abrahán buen sabto jajch, la yichʼ tal pan sok jun nujkul yuʼun jaʼ, jich la yakʼbey te Agar. La yakʼbey ta snejkʼel spisil-abi, ta patil la stikun bael sok te yale. Te Agar lokʼ bael sok bayuk banti bajt ta jochol takin kʼinal ta Beer-Seba. 15 La sta yorail te laj te jaʼ te yichʼoj ta nujkul sok la yijkitay jilel te yal ta yeʼtal teʼ. 16 Jich beenxan bael, la snajkan sba ta jich snamalil* te bitʼil ya yichʼ tʼimuyel bael te tʼimalteʼ, melel jich la yal: «Ma jkʼan ya kil ya xlaj te kale». Jaʼ yuʼun namal jtebuk te banti la snajkan sba sok jajch ta tulan okʼel.

17 Te Dios la yaʼiybey skʼop te kerem. Te chʼul-abat yuʼun Dios la skʼopon te Agar kʼalalto ta chʼulchan sok jich la yal: «¿Bin la apas Agar? Mame xiwat, melel te Dios la yaʼiybey skʼop te kerem teyto te banti aye. 18 Jajchan, nita jajchel sok tsaka ta akʼab, melel jaʼ ta swenta te ya kakʼ chiknajuk jun mukʼul nación». 19 Jich te Dios la yakʼbey yil te Agar jun pozo yuʼun jaʼ. Jich bajt snojes ta jaʼ te nujkul sok la yakʼbey yuchʼ te yale. 20 Te kʼalal yak ta mukʼubel-a te kereme, jokinbil yuʼun te Diose. Nain ta jochol takin kʼinal sok ta patil la snop stuuntesel ta lek te tʼimalteʼ. 21 Te Ismael bajt ta nainel ta jochol takin kʼinal yuʼun Parán, sok lebot yinam yuʼun te snan* ta skʼinal Egipto.

22 Ta yorail-abi, te Abimélec sok te Ficol —te machʼa ya swentain te soldadoetik— bajt skʼoponik te Abrahán. Te Abimélec jich la yalbey: «Te Dios sjokinojat ta spisil te bin ya apase. 23 Jaʼ yuʼun, ta ora ini albon ta jamal ta stojol Dios te maba ya akontrainon, te maba ya akontrain te jnichʼnab sok te stsʼumbal te jnichʼnab. Jaʼnix jich albon ta jamal te ya awakʼ ta ilel te kʼuxul oʼtanil te ma x-ijkitaywan ta jtojol soknix ta stojol te kʼinal te banti yakat ta nainel ta ora ini, jich te bitʼil kakʼoj ta ilel ta atojole». 24 Te Abrahán jich la yal: «Ya kal ta jamal te jich ya jpase».

25 Te Abrahán la yalbey te Abimélec te bitʼil te j-abatetik yuʼun la spojik jun pozo yuʼun jaʼ. 26 Te Abimélec jich la yal: «Ma jnaʼ te machʼa jich la spase. Maʼyuk bin awalojbon-a, jaʼtonax ta ora ini te la jnaʼ stojole». 27 Kʼalal jich la yaʼiy stojol te Abrahán, la yikʼ tal tuminchijetik sok wakaxetik, jich la yakʼbey te Abimélec. Tey-abi, ta schebalik la spasik jun chapbilkʼop. 28 Kʼalal te Abrahán la xat lokʼel juk-kojt jkolel* smeʼ tuminchijetik, 29 te Abimélec jich la yal: «¿Bin yuʼun te la axat lokʼel juk-kojt jkolel* smeʼ tuminchijetik?». 30 Te Abrahán jich la yal: «Ya skʼan ya awichʼ te juk-kojt jkolel* smeʼ tuminchijetik ya kakʼbate. Yuʼun ya yakʼ ta naʼel te joʼon la jokʼ te pozo ini». 31 Jaʼ yuʼun, Beer-Seba* la yakʼbey sbiilin te lugar-abi, melel tey ay bin la yalik ta jamal ta schebalik. 32 Jich yuʼun la spasik jun chapbilkʼop ta Beer-Seba. Jich te Abimélec sujt bael ta skʼinal te filisteoetik sok te Ficol, te machʼa ya swentain te soldadoetik. 33 Ta patil, te Abrahán la stsʼun jpejt* tamarisco ta Beer-Seba, tey jajch yalbey sbiil-a te Jehová, te Dios te stalel ay ta sbajtelkʼinal. 34 Te Abrahán bayal kʼajkʼal jil ta nainel jich bitʼil jyanlum ta skʼinal te filisteoetik.